Ch 5 ~ 張韻喬同學,請你幫一幫忙吧(上) Part 5(連載日期:2021/10/05)

「嗱好坦白啦軒軒,雖然我見你都好似好慘咁,本來都想話賣個人情想幫下你嘅……」

「但係我自己諗多兩諗之後,我諗,我應該都唔可以應承你啦。」天殷向俊軒道出絕望真相

「下,點解要咁殘忍對我呀殷殷?」俊軒反問道。

天殷於是又開始講「你自己都知啦,我地兩家本身就有往來開,我又識林auntie,你又識我父母喎......」



「基本上如果我地兩個真係拍緊拖嘅話,又點可能收得埋呢?所以呢,今次我真係對你唔住啦!」
 
「唉,就算我地兩家人唔識嘅話,我都預咗你會reject我咖啦李小姐」俊軒用失望嘅語氣道。

但天殷好快就糾正對方「咩呀?!我頭先咪話本來想賣個人情畀你嘛,啫係原本我都考慮下應承你咖,ok?」
 
「ok ok,我明嘅!」「不過,你唔係自己有一個價值連城嘅珍藏咖咩?全校你如果認第二嘅話,我相信都唔會有人敢認第一咖啦」天殷又開始講

「所以呢,你都係去返你個list度,試下搵啦先下」其實天殷都知道俊軒有哂全級女仔,除左韻喬,嘅電話,於是都趁一個機會抽俊軒水。
 


殊不知,天殷呢句無心插柳嘅説話,搞到俊軒非常緊張,佢第一時間就去反問對方「殷殷,點解連你都會知道我遊呢樣嘢咖?究竟係邊個同你講咖?」
 
天殷於是就話「咪喬喬囉!上次喺上堂嘅時候,小喬自己喺個位度同方文曦同學講嘅」

「不過嗰次咁啱又畀我聽到喎,所以我咪知道你,原來有一個學校嘅“紀錄”喺身囉!」

「咁我寧願喺陸運會或者水運會嘅紀錄,都好過係呢啲囉」俊軒極度無奈回應道。

「唔係吖,我覺得都幾特別呀!相信全校都冇你呢個人咁勁咖啦,無論讀書定係溝女都係」天殷選擇無視俊軒嘅無奈,繼續喺度取笑俊軒



「而且呀,男子漢,既然真係有做過嘅話,又怕咩認喎哈哈哈!」
 
「唉呀,你地咁樣講都有嘅,今次真係跳到黃河都洗唔清呀!」俊軒非常無奈道。

「而且我真係冇好似大家,或者張韻喬同學所講,我係一個花花公子,然後用堆電話號碼四圍溝女啊!饒命呀殷殷」

「咁你點解釋吖?點解你可以有哂全級女同學嘅電話,除咗喬喬之外」
 
「咁,有啲係同班識嘅,有啲就我自己主動問嘅,有啲就隔離班主動約我,然之後畀我嘅,所以都唔係全部都係我自己問咖下!講明先呀」俊軒義正詞嚴道

「但係殷殷呀?」「咩呀?」

「其實有一個人選,我心裏面都好想佢應承,不過我唔知得唔得咖,而且我又問唔到佢」

天殷聽到話係俊軒搵唔到嘅人,下意識就已經知道係邊個



「喂林俊軒,你唔係諗住越級挑戰,直接搵小喬扮你女朋友下話?」

「你……好聰明呀殷殷,但係點解你會知道咖?」俊軒詐傻扮懵道。

「車,你頭先話你自己搵唔到呀嘛,全級就得小喬你係搵唔到嘅,如果唔係小喬嘅話,你仲可以有邊個?」天殷回答道

「算你聰明啦殷殷,今次。但係其自己信心都唔係好大咋,因為你都知……」

「咁我當然都知道你個問題喺邊啦!但係我冇諗過你真係夠膽會付諸實行咖嘛大佬呀!」天殷驚奇道

「嗱,一係咁啦。我都可以試下幫你問一問下其他人,睇下佢地要唔要幫你啦。」

「不過我講明先呀下,佢地唔應承你嘅機會都仲係好大,大到98%都有可能。」



「所以,如果你有辦法可以包裝得好啲嘅話,搞不好你就有機會有埋嗰2%嘅機會。」
 
俊軒於是就非常認真咁,喺度考慮李家大小姐對自己嘅提議「唔錯唔錯,但係如果要博呢2%嘅話,我相信如果就咁問嘅話,就一定唔應承咖啦,咁......」

「咁你依家咪要諗辦法包裝定,等應承你嘅機會都高啲呀嘛!」天殷回答道。

「我明…..所以你叫我諗定個煙幕出黎?」「你可以咁講啦,但係因為你先係搞呢單嘢出黎嗰個,所以今次我都要你自己拆。」

「不過都講明先呀下,你唔準傷害我地小喬咖,如果唔係,我一定會打扁你咖!」
 
「好啦,我知道啦,唔該你先啦殷殷!」「加油啦你!你喺諗到點做之後再話我知啦」

「ok bye,咁喺學校見啦!」收線之後,俊軒就開始埋首度橋,點樣去令韻喬應承自己。

但最後,俊軒居然咩都未諗到就訓着咗……



(Ch 5 張韻喬同學,請你幫一幫忙吧(上) ~  完)

IG link https://instagram.com/bear_big_big_writer
已有 0 人追稿