《愛在。貴族學園》: Ch 6 ~ 張韻喬同學，請你幫一幫忙吧（下） Part 1

Ch 6 ~ 張韻喬同學，請你幫一幫忙吧（下） Part 1（連載日期：2021/10/08）

第二日朝早，俊軒如常喺林家大宅食過早餐，然後再由司機車返學校，大概8點鐘左右，俊軒就返到自己Form 5A嘅班房。

而天殷同禮謙都已經返到，佢地一見到俊軒，就即刻分別行去俊軒面前。

「天殷、謙謙，你話哥我今次點算啊！？我諗咗成晚都仲未諗到辦法都算啦！」

「最大嘅問題係….我到依家都冇人應承…..唉，今次都係叠埋心水去party行行企企算啦」此時俊軒臉如死灰，好擔心咁同天殷、禮謙兩個講。不過，





「哈哈哈！今次抵啦！好似冇人叫你講大話講到咁大，同伯母拍哂心口話自己有女朋友咖嘛！」禮謙非常少有咁，喺度恥笑死黨俊軒道

「今次學霸軒講大話講到踢到鐵板啦，就睇下你以後仲敢唔敢呃媽媽吖拿？！」其他班上知情嘅另一位女同學，聽到之後都喺度偷笑。
 
「唉你地真係吖，唔幫手諗計之餘，仲要喺度落井下石！都唔知係啲咩死黨黎咖？」俊軒已經好灰。

但係到另一個男同學就話「咁你玩到咁大又真係唔抵幫嘅！但係，你使唔使落去低form度搵呀？我知道好似有啲妹妹仔鍾意你咖喎！」

「咪玩啦施主！」俊軒非常緊張咁反駁道「呢件事都已經開始喺Form 5搞到咁大反應啦，你仲叫我落去低form？」





「你地真係想幾個年級嘅人一齊笑我，然後你地就喺度食花生睇戲咁話啦喎？」冇錯，今日已經有人開始喺走廊，好含蓄咁提依件事。

「無所謂啦，反正你喺學校都係萬人迷黎咖啦，而且我地都可以順便知道，你到底喺樓下班妹妹之中，可以有幾大嘅叫座力啫」禮謙回應道。

禮謙今日一反常態，處處想令俊軒出醜，令俊軒都有少少不滿「喂，正經啲諗下計啦啊程禮謙！」

「我不嬲都好正經！係你搞出黎啲蘇州屎唔正經啫！」之後佢地都諗過其他方法出黎，但係全部都唔係行得通。

於是「算啦軒仔，不如都係等我黎扮你“女朋友”啦，最多今次我真係委屈少少…..」天殷突然開口話「但係你之後要請我食飯補數咖喎！」





俊軒聽到之後嘅反應非常大，睇黎都係出乎俊軒意料之外

「咩話？殷殷你話由你黎扮！？喂，我地尋晚喺電話裏面，咪已經講過呢招肯定唔work咖囉？！」

「而且唔係你自己親口講，叫我唔好打你主意咖咩？」

天殷於是咬住佢包朱古力奶問俊軒「係呀，我尋晚的確係有咁同你講過呀！咁你喺我地收線之後，有冇諗過要點樣”包裝“件事先？」

「同埋我想知道，方文曦同學到底有冇應承你先？」
 
「我……就係未諗到啊，所以咪返黎之後，第一時間問你地意見囉！」俊軒回應道

「同埋你都唔使再諗文曦啦，佢都已經reject咗我啦。如果文曦佢ok嘅話，我依家都唔使咁煩啦！」
 
「下！成晚流流長你都諗唔到？咁你收線之後到今朝返學之前呢十幾個鐘，你究竟做過咩黎？」天殷少有地高聲質問俊軒「唔好同我講你又係度掛住上網，然後喺度睇埋啲奇怪片啊下？！」




 
「乜嘢上網睇奇怪片啊！冇囉！」俊軒反駁道「不過，我就係咩都未諗到，就直接喺床上面訓死，直接訓到今朝」

「真係冇你咁好氣呀，咁大件事你都可以訓得着，真係服咗你呀！」天殷嘅白眼已經反到上天花板。

但就喺突然之間，禮謙好似有大發現咁話「啊！我明點解天殷話佢自己扮軒仔女朋友會唔work啦！」

「咁係因為李家同林家本身都有生意往來，雙方父母互相認識，如果真係拍拖嘅話，就一定會知道？」

「你知道就好啦謙謙！」天殷道「所以呢小軒，我就勸你呢唔好再諗住我可以幫你過橋呢個方向諗啦，」

「繼續諗辦法去包裝一下啦，話唔埋真係又女仔肯同你上去見家長呢？」「好吧」

正當俊軒三人組繼續沉思，應該用咩辦法解決嘅時候，平時喺北角坐巴士返學嘅張韻喬，靜靜咁推開Form 5A班房度門，再慢慢返到自己個位食早餐，同埋準備定一陣上堂嘅嘢。





於是，俊軒、天殷同禮謙三個，就喺度交換眼神......

（待續 ~）

IG link https://instagram.com/bear_big_big_writer