《愛在。貴族學園》: Ch 7 ~ 綁架 Part 2

Ch 7 ~ 綁架 Part 2（連載日期：2021/10/16）

「放心啦，我地唔會嘅。不過，始終都係叫“見家長”，做戲就當然就要做全套咖啦！」天殷續道；

兩個男仔於是就好專心咁，繼續聽天殷講「我呢，就會借套晚裝裙畀小喬，到時我會叫佢換同化埋妝。我屋企應該有啱佢size嘅晚裝。不過，我都想問下，禮謙同學你……聽日得唔得閒呀？」
 
「聽日我…應該下晝到夜晚都ok，但係上晝要去練琴呀，做咩呀天殷同學？」禮謙頭側側咁望住天殷。
 
「我覺得，如果我同謙謙同學都去嘅話，小喬嘅戒心應該會更加低……」天殷道。





「不過軒仔呀，唔知可唔可以請你屋企，聽日加多兩雙筷子得唔得呢？另外，麻煩你同auntie講話，我同另一個同學都會一齊黎。」
 
「呢個問題唔大啦，而且今次就算唔得都要得啦。呢層你放心啦殷殷，今晚我返到去，就會同譚管家講咖啦，叫佢同厨師安排好，煮多三個人嘅飯。」俊軒回答道。
 
然後天殷繼續喺度交代初步嘅行動細節「唔該軒仔你先。咁聽日大概…下晝兩點半左右，你地都換好一套禮服。」

「換好之後，請軒仔你安排司機同埋車，去禮謙屋企接佢去我屋企。」

「之後，謙謙同學就會同我坐我屋企部車去你地林家。至於軒仔你就……」





「俊軒你要做嘅，就係要說服你嘅“女朋友”張韻喬同學，上你地林家嘅座駕！始終你地聽日會係一對呀！」禮謙接下天殷嘅話。
 
「今次醒目唔少喎謙謙！」天殷好興奮咁like左禮謙，而且面紅紅咁。「我手上呢個計劃，兩位大俠唔知覺得小妹嘅佈陣如何呢？」

「簡直very nice 啦！」愁眉深鎖咗好耐嘅俊軒，喺聽到天殷嘅計劃之後，終於都露出笑容

「果然近得多天才之後，人都醒啲呀！世一啊殷殷」
 
「哈哈！呢個都係小喬平時carry我得多啫，佢先係世一囉好冇！」天殷好得戚咁回應





「邊似得你個林俊軒呀，直頭冇鬼用添呀！諗嗰少少嘢諗成晚都諗唔到！我自己用幾堂時間咋，就已經諗好一個你滿意嘅方案出黎啦！枉你仲畀人話你係學霸」

「得啦，頒個獎畀你好唔好呀？」俊軒喺度寸天殷道「好啦兩位公子，如果無異議嘅話，我地就咁樣決定啦！」

「ok！」天殷最後喺兩位男同學同意之下，就將自己諗出黎嘅辦法拍板。

「希望我地嘅計劃會成功啦！」三人同時叫道後，天殷就自己一個行去洗手間，而俊軒同禮謙兩個，就先返返入去班房裏面。
 
天殷喺去完洗手間之後，就見到韻喬喺位上面，於是自己返埋位之後，就直接問韻喬「天才喬！你頭先咪話呢兩日都得閒、冇咩特別嘢做嘅嘅？」

「係呀？做咩呀殷殷你，今日你好似奇奇怪怪咁，成日問我呢樣問我嗰樣」

「冇怪呀，邊度怪呢？」天殷質疑道，然後對韻喬提出一個煙幕邀請

「如果呢，我想邀請你聽日上我黎屋企玩下陪下我，你得唔得閒呀？」





「嗯，冇問題呀！如果唔係要去幫個花心軒嘅話就ok嘅」韻喬雖然都冇咩問題，但係依然對俊軒有啲戒心。
 
「你諗咗去邊呀張韻喬？我地兩個自己玩咋喎…關軒仔咩事呢？」天殷極度無奈咁回應，但其實講呢句嘅時候，天殷嘅内心虛到不得了。

不過，韻喬嘅戒心都不無道理「咩喎！咁你頭先先同我講過一件咁奇怪嘅事，我梗係會有少少懷疑咖啦！如果你約我係唔關佢事嘅話，咁我都ok嘅」

「多謝你呀小喬！好嘢！我終於都有人陪啦！」天殷非常興奮道，同時都鬆一口氣

「咁如果我聽日大概12點半度，我叫我屋企司機，揸車去你屋企接你啦，我到時都會出去接你，你ok嗎？」

「ok呀，咁你知道我屋企地址？」韻喬再問天殷道。

「知知地呀，但你一陣都係send多次畀我啦小喬，我怕會搞錯！」「好呀！一陣放學畀你啦！」





喺講完呢句之後，天殷就向俊軒示意韻喬會去天殷屋企，小息所講嘅計劃得以繼續。

（待續 ~）

IG link https://instagram.com/bear_big_big_writer