《愛在。貴族學園》: Ch 7 ~ 綁架 Part 3

Ch 7 ~ 綁架 Part 3（連載日期：2021/10/19）

不過，韻喬心裏面就有少少奇怪，點解天殷會唔知道自己屋企地址，明明之前都試過由李家司機車自己去李家大宅，但韻喬都冇再考究太多。

而喺遠處嘅俊軒，接收到韻喬同意嘅消息之後，佢地幾個就繼續上堂。就算喺食午飯嘅時候，佢地都冇再討論呢件事，免得走漏風聲。

話咁快就去到放學時間，韻喬喺離開學校之前，就將自己屋企嘅地址Signal咗畀天殷，之後喺放好書去locker之後，佢地就各自返屋企。

而去到夜晚，俊軒佢地都再各自confirm時間。「聽日只許成功，不許失敗，加油x3！！！！」
 




當日夜晚，為咗等自己聽日可以去天殷屋企玩之餘，而唔會耽誤自己功課嘅進度，所以韻喬都溫習溫到有少少夜。

但係喺臨訓之前，韻喬自己就覺得奇怪“做咩殷殷會突然之間想我陪佢嘅？平時就算要我陪佢嘅話，都唔會叫得咁急咖喎？”

“會唔會其實都真係同林俊軒個flirt女王有關係呢？畢竟呢兩日已經係deadline，雖然我都仲係覺得，林auntie逼林俊軒去相睇真係好搞笑。“

”但如果林auntie真係玩到童養媳嘅話，對佢地林家嘅名聲，都未必係一件好事黎喎”

“不過，既然殷殷都已經同我否認，今次約我係同林俊軒有關係，我都應該要相信自己個好姐妹吧。“





”如果少少嘢都唔信佢嘅話，我諗我都枉為叫殷殷做姐妹吧”韻喬續道之後，就同自己講，「到時候先算啦，仲喺度諗咁多做咩」

韻喬之後就訓到第二朝一早，喺刷完牙洗完面之後，就見到張太喺度食早餐，順便喺度睇電視

「小喬早晨呀」「早晨呀，媽！做咩今日星期六你又咁早起身嘅？你又要OT呀？」

張太於是就點點頭「係呀乖女，因為老闆都叫有好幾份大project喺手，佢係趕住要出，但係公司又唔係好夠人處理囉，所以今日媽咪都要返一返公司，處理埋啲手尾囉！」

韻喬聽見之後非常不悅「搞錯呀！你嗰個咩老闆黎咖？！成日都要你同爸爸OT，搞到我地一家人都冇時間可以相處！唔夠人就出高啲錢請人啦！」





張太嘆氣道「冇辦法啦，公司唔夠人手，而且我同你爸爸都冇咩可能依家走去轉工咖嘛」「但係你地有冇OT錢咖？」韻喬追問道

「有嘅乖女！不過小喬呀，媽媽都係想你依家俾心機讀書，等到時候可以出人頭地，唔使咁辛苦呀，知道未？」
 
「知道啦媽。係啦媽媽，我今日一陣間會去天殷同學屋企，今晚唔會返黎食晚飯。咁你自己今晚同爸爸搞掂佢啦喎！」韻喬趁機同張太講。

而食完早餐嘅張太就喺度執枱，好奇咁問「咦，阿女去行街呀？」
 
「唔係呀媽媽，只係天殷佢尋日喺學校話，想我今日上去佢度陪下佢咋嘛」韻喬解釋完之後，張太都好快就同意咗

「ok啦，咁你去到人地屋企自己小心啲啦，仲有唔好亂咁搞人地屋企啲嘢，萬一整壞咗嘅話，我地屋企賠唔起畀人呀，知道未呀？」
 
「我知道啦媽咪！」韻喬回應道「咁你一陣幾點會出去呀？」「我12點半左右就出去咖啦」

「好，咁你記得出門口之前，閂窗熄燈呀熄冷氣呀！」「知道啦！bye媽媽」





韻喬講完之後，張太就出門口返工，而韻喬就開始喺房度襯衫。

雖然韻喬個衣櫃裏面，大部分嘅衫都好普通。但其實韻喬對於着衫嘅觸覺，絕對唔會畀其他同學差，

再加上身材出衆，所以韻喬都可以carry到好多唔同類型嘅衫，而且效果都非常好。
 
到韻喬差唔多搞掂嘅時候，已經差唔多去到中午12點。此時韻喬嘅電話響起，原來係天殷打電話畀韻喬......

（待續 ~）

IG link https://instagram.com/bear_big_big_writer