《愛在。貴族學園》: Ch 7 ~ 綁架 Part 12 & 13

Ch 7 ~ 綁架 Part 12 & 13（連載日期：2021/11/07）

「知道殷殷！」俊軒回答天殷之後，就望向仍然怒氣冲冲嘅韻喬，但好明顯俊軒都係好緊張。

過咗一陣俊軒都終於開口「呀…張韻喬同學呀」

「咩呀？你個死人頭係有嘢就好快啲講，唔好喺度浪費本小姐嘅寶貴時間！」

「係嘅！」俊軒戰戰兢兢咁回答。





喺清一清喉嚨啲痰之後「張韻喬同學，今次，其實我要借你過橋去幫我，而且仲要我死黨同你好姐妹去幫我隱瞞，真係對你地幾個都唔好意思。」

「不過我都知道，今次嘅事對於你黎講，委屈其實好都大，畢竟殷殷之前都有同我講過，點解其他女同學都會拒絕我嘅原因」

「不過講明先，我都唔知道一陣間食飯之前之後，仲可能會發生咩事。」

「但我林俊軒一定會應承你，經過今次之後，我唔會再喺學校風流快活，同其他女同學行得太過分，一定會做好自己。」

「所以，我都想你應承我，喺黎緊呢幾個鐘頭裏面，張韻喬可以做我林俊軒嘅女朋友，唔知道可唔可以嗎？」





俊軒非常認真咁同韻喬講，而且都係俊軒第一次咁認真同韻喬交流。

但係俊軒都好快有補充「同時為表達我對你嘅謝意同歉意，我自己買咗一份禮物送畀你，作為你對我嘅報答，希望你會收咗佢同你會鍾意。」
 
「喔，多謝先喎」韻喬於是由俊軒手中，接過俊軒送畀自己嘅賠罪禮，然後再帶點小脾氣對俊軒講

「其實我唔知你知唔知….你呢個行為對於一個女仔黎講，係好不負責任呀？」

俊軒低頭不發一語，任由韻喬發泄喺自己身上。不過都好在李氏夫婦出咗去，否則依家嘅場面都非常尷尬





「我同你講呀林俊軒，你個list上面啲女同學，個個都之所以唔應承你，就係因為你嘅計劃，同做一個player冇分別呀！趙完鬆就係你呢啲人呀！」

「你依家就係話緊畀全世界知，你只係當佢地係工具，而唔係人呀！」
 
「對唔住呀韻喬同學，我當初真係完全冇諗過我媽媽要玩到咁大…我以為佢會信我所講咖嘛......」
 
「一句對唔住就大哂呀依家？咩叫以為你媽媽會信你呀？!咩叫當初冇諗過媽媽會玩咁大呀？！」越黎越嬲嘅韻喬直接打斷俊軒嘅説話

「就係因為你媽媽知道你平時喺學校，對住啲女同學無黎正經，所以先會要你帶個“女朋友”返屋企食飯咋！你今次完完全全講大話講到玩出禍呀！」

「我知道……」喺韻喬面前，俊軒平時嘅氣焰完全冇哂

「知道！？咁唔該你以後做人就誠實啲啦，自己睇清楚後果係咩先好去做呀。」

「不過唔怕坦白同你講呀，其實去到呢一刻，我都好質疑你嘅誠意。」





「所以，我諗，今晚如果我可以用你朋友嘅身份，去食呢一餐飯會比較合適」

「今次就當買一個教訓吧，林同學。多謝你咁睇得起平凡嘅小妹我！」講完之後，韻喬想轉身返去天殷間房。

大家聽完韻喬咁講，都感覺情勢唔係太好。眼見韻喬想轉身而且，天殷就即刻拉住韻喬嘅手，然後哀求道

「小喬啊，求下你啦，就幫幫軒仔一次啦！」

「咁點解一定要我幫啫？佢自己搵唔到人係佢抵死呀嘛，點解要我喺佢面上貼金啫？我唔懂喎師父！」韻喬反駁道。

天殷之後嘗試説服韻喬「其實我喺後面安排咗咁多嘢，目的都係想幫一幫軒仔，脫離嗰種奇奇怪怪嘅戀愛咋嘛！」

「而且喺我決定出手幫軒仔之前，其實我地都已經話過佢咖啦，佢其實都已經知錯咖啦。」





「不過小喬你都試下諗下喎，如果今日你要幫嘅，係你一直心儀嘅對象嘅話，你又會唔會咁忍心，睇住佢同啲auntie拍拖呢？」

「如果到時候軒仔真係同auntie結婚，你覺得又會對我地學校黎講，會係一件好事黎咩？」
 
畀天殷咁樣講一講，韻喬心裏面已經開始動搖，而且感覺到好揪心。

佢開始覺得，如果今晚唔去嘅話，就會浪費天殷一直以黎所做嘅一切，包括將自己變成依家咁大方得體嘅一面，重點係對天殷黎講都好無辜。

「放心啦韻喬同學，我同天殷同學今日都會陪你一齊去咖，所以你都唔會自己一個面對auntie」禮謙都開始加入勸説韻喬嘅行列

「而且重要嘅係，我地大家都係同班同學黎，日日返學都要見到大家，如果搞得太過僵嘅話，就真係好無謂啦！」
 
「但最重要嘅係，軒仔都已經做到咁啦，而且買禮物賠罪呢樣嘢，都係軒仔佢自己提出話要嘅。」

「如果佢真係冇誠意嘅話，佢都唔會一直擔心你嘅諗法。所以，作為你嘅同班同學，我都覺得你都應該應承軒仔」





經過禮謙咁樣講一講，韻喬心裏面嘅態度再度軟化，開始不停咁掙扎係咪要應承俊軒嘅要求。

結果，過多兩分鐘嘅考慮，韻喬都終於開口……

「好，就當小妹我今日心情好，今次就委屈一下自己，應承你呢個花心flirt女王。」

「不過，我警告咗你先呀林俊軒同學，星期一返到學校同埋以後，都唔準喺大家面前或者我背面，提及今日發生嘅事。」

「如果唔係，萬一畀我知道咗嘅話，你自己就睇路啦下！」
 
俊軒聽到韻喬應承之後，終於都放下第一件心頭大石，於是就同韻喬講「多謝你，真係好多謝你幫我啊，張韻喬同學。」

「我知道，由呢一刻開始，我可能就會欠你好多人情，但係我林俊軒，一定會感激你今日對我嘅恩！」
 




天殷同禮謙喺聽到韻喬終於應承俊軒之後，都感到非常開心，同時都不忘提醒俊軒「軒仔，至少你以後都做到畀喬喬知道，今日佢嘅付出係值得咖」

「而且你都係時候要學識，點樣留一個好印象畀一個女仔呀，知道未呀林俊軒？」

「知道啦，我都好多謝你地呀！」俊軒依然非常感激道，而天殷都好快就話「記得請食飯啦最少！」

「呢個一定會，殷殷你就放心啦！」天殷之後就睇一睇電話「好啦軒仔，我地係咪應該都夠鐘要行啦？」

俊軒於是都睇一睇表「係呀，我屋企都應該準備緊咖啦，而且我父母都想我地早少少上去，所以殷殷麻煩你叫你地管家準備車」

「知道！蕭管家，麻煩幫我準備車去林家大宅」「知道！小姐」

「咁我…係咪要跟你屋企部車？」韻喬好怕醜咁問俊軒

「係呀小喬，今晚你係軒仔個“女朋友”呀嘛，你就梗係要跟林家嘅車啦」天殷回應道，韻喬塊面就比頭先更加紅啦。

「而我同禮謙就會坐我部車過去林家，所以小喬你一陣間，就要同軒仔喺車上面夾定口供啦！知道未？」韻喬點頭表示明白天殷嘅意思

「至於軒仔你丫，難得我個好姐妹最後都應承你，我警告你呀，你以後唔準再蝦佢呀，知道未呀死人頭？！」
 
「知道啦殷殷，真係好多謝你地嘅幫忙」俊軒對大家鞠躬表示謝意

「小喬同學，行啦我地。殷殷、謙謙，一陣間喺林家大宅見！」

之後，佢地四人分兩部車開去林家大宅。

而身為韻喬嘅“男朋友”，俊軒都有幫韻喬開門啦（平時都係由司機代勞）

（Ch 7 綁架 ~ 完）

IG link https://instagram.com/bear_big_big_writer