《愛在。貴族學園》: Ch 7 ~ 綁架 Part 11

Ch 7 ~ 綁架 Part 11（連載日期：2021/11/04）

就喺由天殷睡房行落大廳嘅途中，聰明嘅韻喬就見已經到俊軒嘅背影。

於是韻喬就即刻鬆開拖住天殷嘅手，再聲音一沉質問天殷「李天殷，你可唔可以同我解釋一下，點解林俊軒個衰人會喺度？」
 
喺拎轉面面對韻喬之前，天殷已經將恐懼寫喺塊面上邊。

但係，天殷自己都知道，去到呢個位，自己都已經冇可能再隱瞞落去，於是都唯有冷靜咁面對好姐妹嘅質問「好對唔住，喬喬。」





「其實我知道我係唔應該呃你。但係喺呢幾日裏面，我自己都承受咗俊軒好大嘅壓力，希望你會明白同體諒我。」

天殷除咗誠心咁向韻喬道歉之外，為咗可以令韻喬跟住自己，點都要安撫一下韻喬嘅情緒

「放心啦小喬，今日我都會陪住你，直到今晚為止，乖」

韻喬聽到之後，曾經有一刻想掉頭走，返入去天殷嘅睡房，再做返原本嘅自己。

但係，韻喬聽到天殷都係受到俊軒嘅壓力，再加上兩家人嘅關係，所以先要去配合處理呢件事。





而且自己都覺得，自己都仲有機會今晚會以同學嘅身份出席飯局，所以韻喬選擇先收起黑到不能再黑嘅面，繼續跟住天殷走去大廳，會合俊軒同禮謙佢地兩個。
 
「Hi，禮謙同學、軒仔。真係唔好意思呀，要你地等我地咁耐」再一次拖住韻喬嘅天殷，落到大廳都先要講啲客氣説話。

兩個男仔於是就擰轉後面，見到亭亭玉立嘅天殷同韻喬之後，就好驚訝咁異口同聲呼叫「哇，你地兩個今日…..使唔使靚成咁呀？而且小喬你仲放埋頭髮落黎」
 
韻喬雖然冇出聲回應兩位男同學嘅讚賞，但係塊面都仲係好黑。

至於天殷，就突然之間韻喬上身咁「你仲好講喎林俊軒！為咗你今日啊，我都唔知付出左幾多時間同心機呀！」天殷非常不滿咁，一嘢打落俊軒手臂上。





「人情嘅嘢之後先算啦！」俊軒對住天殷微笑，但天殷依然好不滿

「你呀！唔好諗住你同我屋企熟，就唔使還個人情畀我呀！熟還熟，人情都要做足呀！唔係我就同紫渝姐姐講咖！林家二少爺！」
 
「知道啦李家大小姐」同天殷講完之後，兩個男仔就將視線，轉去盛裝打扮嘅韻喬身上，而且望到眼定定咁。

不過韻喬好快就已經覺得唔自在，於是韻喬就用返平時個串串地嘅tone同兩個男仔講野

「望咩呀你兩個？前世到依家都未見過靚女呀哈哈哈？！」

「係呀係呀，我地兩個比較孤陋寡聞呀嘛。呢位靚女，請問你叫咩名呢？唔知我地有冇機會可以認識你呢？」

兩個男仔於是就一齊扮哂蟹咁，喺度抄韻喬嘅牌。天殷見到之後就幾乎失控大笑，但係心裏面有一種不是味兒嘅感覺。

「妖食屎啦！你地兩個好鬼無聊囉」韻喬非常不滿咁抗議道「而且仲low到死，一啲都唔好笑添呀！」





天殷繼續喺旁邊失控大笑，已經將平日舉止大方嘅形象徹底放開。

「李天殷你到底有咩咁好笑？」韻喬已經叉起自己條腰，再反一下白眼向天眼抱怨。

「Sorry呀大家，頭先失禮咗」直到笑完之後，天殷先好正經咁再同俊軒講

「軒仔呀，有啲嘢呢，為咗表示你自己嘅誠意，有啲嘢你係咪應該要自己親口問人地嘅同意呢？」

然後，天殷就拉咗禮謙企去女仔嗰邊，等俊軒自己一個面對韻喬......

（待續 ~）

IG link https://instagram.com/bear_big_big_writer