Ch 8 ~ 逃過一劫的吻 Part 3(連載日期:2021/11/13)

(3萬點擊次加更,多謝大家支持)

「喔,呢啲都係好小嘅事啦。你地幾位唔洗太過拘謹,當呢度係自己屋企就可以咖啦!」「知道啦Auntie!」

「譚管家,麻煩安排工人斟杯茶畀我、二少爺、同埋二少爺幾位同學」「知道啦夫人!」

喺譚管家離開大廳之後,林太繼續報以笑容面對佢地幾個,但係話風一轉,就令到場面有少少尷尬「小軒….,你仲成碌木咁企喺度做咩呢?你仲唔快啲介紹你個女朋友仔畀我認識?」



「小……小軒?!啊哈哈哈……」禮謙、天殷同韻喬都笑咗出黎「哈哈!估唔到學霸軒原來喺屋企,有個咁“可愛”嘅名號喎!」

雖然天殷一直都知道“小軒”呢個稱呼,但係禮謙同韻喬兩個就真係唔知,變咗頭先佢地兩個都忍唔到笑。

所以天殷決定再補多刀,強烈恥笑一下呢位身為爸爸生意夥伴嘅二少爺,順便將大廳裏面緊張嘅氣氛壓低。

至於都企埋喺一邊嘅俊軒,聽到天殷喺度笑自己好難為情,紅都面哂咁,睇得出俊軒佢好無奈,於是點都要抗議一下……

「哎呀媽啊,我之前咪叫咗你,唔好再喺其他人面前叫我“小軒”咖咩?」



「我依家都已經16歲咖啦,一啲都唔“小”咖啦,就好似平時喺殷殷面前咁,叫返我做軒仔咪得囉,ok?」俊軒要林太糾正對自己嘅稱呼。

不過衆人都係再笑咗一次,因為成個畫面真係有少少搞笑。

「好啦好啦,我怕咗我個皇帝仔你啦」林太打圓場道,但係天殷都仲係要繼續玩俊軒

「呢啲唔緊要嘅林auntie,其實我地都覺得“小軒”呢個稱呼幾match二公子嘅形象咖」

俊軒喺呢個時候,根本就已經唔知道再點樣面對佢地幾個。林太聽到之後又一次微笑



「哈哈,睇黎你啲同學,都比較鍾意叫你做“小軒”喎。不如以後就咁叫啦我地都!」

林太嘅説話又一次引起大家笑,搞到俊軒非常無奈。

但話風再一轉,林太好正經咁講「不過小軒,你幾時先肯介紹你旁邊呢位女仔畀我認識呢?請你唔好忘記今日有呢個飯局嘅原因」

韻喬個心喺踏入林家大宅之後,就一直都跳得好快。今次林太直接要俊軒介紹自己之後,就顯得更加緊張。

不過,韻喬心裏面其實都好想知道,到底林俊軒呢個花花公子,到底會點樣形容自己

「好啦好啦媽咪呀,你就唔好咁心急啦,依家就介紹啦……」於是俊軒就輕輕拉一拉韻喬去林太面前,而韻喬塊面都即刻紅起黎

「佢叫做張韻喬,係我嘅女朋友。大家平時喺學校都會叫佢做小喬,而且佢係我地班次次都考第一嘅超級高材生」俊軒好簡單咁將韻喬介紹畀林太認識。

而韻喬都好似好高興咁,微微一笑。



林太於是再一次對韻喬同俊軒微笑,不過就對俊軒嘅介紹有少少怨言「喔,頭先張小姐都已經自我介紹咗啦,小軒你做咩又重覆呢?」

「你好呀張小姐,幸會幸會,我林auntie好多謝你。一直以黎都細心咁照顧同喜歡我地小軒。」

同頭先對住俊軒抱怨嘅語氣唔同,林太對住韻喬就非常親切,然後再望真啲韻喬個樣

「張小姐你嘅樣子都幾清秀,打扮又夠大方得體。睇黎小軒你嘅眼光都唔錯!今次媽媽我應該可以放心囉」

天殷聽到之後都暗爽,畢竟今日韻喬整個打扮都由自己操刀。

而心裏面依然好亂嘅俊軒,聽到林太讚自己個“女朋友”之後,心中同樣暗爽,而且都打一個眼色畀韻喬。

但係韻喬冇理俊軒,只係答林太嘅讚美「嗯,多謝auntie你嘅讚賞!」



但其實韻喬回答嘅時候,佢塊面有少少面容扭曲「不過auntie唔使多謝我啦,我都好樂意去照顧俊軒佢咖。」

「而且auntie呀,其實你叫我小喬就可以咖啦,就好似禮謙同天殷同學佢地平時叫我一樣。」

「好呀,小喬。」林太繼續用親切嘅笑容回應韻喬,但其實韻喬頭先奇怪嘅面部表情,就已經引起咗林太嘅注意......

(待續 ~)

IG link https://instagram.com/bear_big_big_writer
已有 0 人追稿