Ch 8 ~ 逃過一劫的吻 Part 5(連載日期:2021/11/16)

韻喬此時就做出一個well done眼神畀天殷,畢竟呢段説話都可以畀韻喬一個機會落下俊軒嘅面。但係就到俊軒完全冇辦法解釋。

林太於是就話「小軒,你唔可以咁樣咖,雖然你可能怕小喬唔鍾意,但係你身為一個男仔,如果女同學需要幫忙嘅話,點都要有少少風度,上前問一問要唔要幫手」

「知……知道啦!」俊軒回答道「咁小軒,媽媽又想知道下,到底你又鍾意小喬啲咩呢?」

雖然上一分鐘先話完俊軒,但係林太好快都繼續原本嘅話題。之前已經有充足時間準備嘅俊軒,就當然輕而易舉咁解答



「其實小喬佢心地好好,平時喺學校都冇咩架子,哪怕就算佢出身普通家庭都好,佢都好努力咁喺做好自己。」

「我好記得幾年前都有唔少同學,因為小喬嘅家庭背景,而嘲笑甚至杯葛小喬,不過小喬佢都冇怨天怨地。」

「反而,小喬喺學校非常努力,結果佢就用成績去打低呢班唔鍾意自己嘅人,等呢班人唔敢再蝦,呢個連續幾年獎學金嘅得主。」

「當然,小喬佢都有外表啦,咁呢個都係另一個吸引我嘅原因啦,就係咁」

同頭先一樣,林太都非常滿意咁微笑。而韻喬雖然都仲喺度嬲緊俊軒呃住大家,不過見俊軒都賣口乖賣得咁落力,於是都對俊軒笑一笑。



不過突然之間,譚管家就入到大廳……

「夫人,有事情要通知一聲你」譚管家講完之後,大家都一臉愕然。而林太就依然好從容咁問譚管家「譚管家,請問因何事通知我一聲?」
 
譚管家於是就同林太交頭接耳,喺講咗幾句之後,林太就同俊軒、韻喬佢地幾個講

「幾位,管家同我講晚餐應該仲有大半個鐘先會準備好,原本都想繼續同你地傾計嘅。不過Auntie突然之間有其他事需要處理,要暫時離開大廳」

「你地幾個後生嘅就繼續喺大廳傾住計先,一陣可以食飯嘅時候,管家會叫你地去飯廳食飯咖啦。幾位失陪先,一陣食飯見!」



「好,多謝auntie(媽媽),一陣見」四個後生回應林太道。於是,林太就跟住譚管家離開大廳。
 
林太一走開,韻喬就即刻好大力咁,一搥打落俊去軒心口到

「(喂!痛咖大佬!咁大力打落黎做咩呀?)」俊軒低聲吼叫道。

不過韻喬就好輕鬆,而且不停咁喺度笑「抵死啦!死人頭林俊軒!鬼叫你頭先夠膽喺你媽媽面前插我嘴!插我嘴呀啦!哼!睇你以後仲敢唔敢!」

韻喬居然仲想再打多次,而俊軒就基於自我防衛,於是想擋住韻喬嘅攻擊。

「好啦,對唔住啦小喬,頭先係我衰啦插你嘴,以後都唔蝦你啦,畢竟我今次都真係欠咗你好多」俊軒又再一次要同道歉,畢竟韻喬都唔係甘心喺呢度出現。

不過今次,韻喬居然一反頭先嘅暴力少女姿態,而係笑笑口咁對住俊軒回應「嗯….就算你啦…..今次」

「下!得今次咋?」俊軒聽到韻喬咁講,就即刻喺度扮可愛扭計。



但韻喬明顯唔受呢一套,於是就作狀想打俊軒,並且語帶脅逼咁話「咁你係咪想我連呢一次都要唔放過你丫,Form 5A嘅林俊軒同學?」

俊軒一諗返起韻喬頭先嗰一下,就即刻話「唔係唔係,我唔敢啦,張韻喬同學!」

但韻喬同俊軒呢一下耍花槍嘅場面,赤裸裸咁呈現喺天殷同禮謙面前。

天殷見機不可失,於是就笑笑口講「哎呀小喬、小軒,你地兩個咁快就喺我同禮謙兩隻單身狗面前,喺度打情駡俏啦?咁樣以後喺學校仲得了嘅?」

(待續 ~)

IG link https://instagram.com/bear_big_big_writer
已有 0 人追稿