《愛在。貴族學園》: Ch 9 ~ 嬲到爆炸嘅韻喬 Part 4

Ch 9 ~ 嬲到爆炸嘅韻喬 Part 4（連載日期：2021/12/07）

「城府好深？同媽媽、auntie鬥一定會輸？點解咁講呀禮謙？」另外嘅三個人帶點疑惑咁，齊齊去問禮謙呢段説話嘅原因。

「其實Auntie就係要小軒知難而退，要麼乖乖修心養性讀書，要麽正正經經搵個女朋友，唔好再咁風流快活玩弄女仔，傷害人地個女。」

「而且林太都可以知道，小軒同小喬嘅關係到底係咪認真。」禮謙繼續同大家分析

「而你地選擇成全auntie嘅要求，真係好勇敢，換轉如果我係小軒，我都未必夠膽做得出，仲何況係小喬同學」





「原來係咁…..」其他三人驚嘆，但係韻喬都要澄清一句「其實都係林俊軒個衰人想抽我水，一下就錫咗落黎我度咋嘛！」

「咁點解你又唔即刻推開我，仲要同我錫咗差唔多成分鐘咁耐呀？」俊軒突然之間反駁韻喬。

「咩……咩呀死人頭林俊軒！明明就係你特登攬……攬到我咁鬼實咋嘛！」韻喬聽到之後非常不滿，於是就同俊軒正面交鋒喺度鬥嘴

「你叫我點推開你喎！衰人喺度蝦我！都唔知點解Form 1嗰陣，Ms Lee會叫我跟你咖！？」

「咩呀！係Ms Lee叫我帶你咖！唔滿意呀？」「係呀！呃人初吻嘅死人頭！！」
 




天殷同禮謙兩個差少少就笑出聲，畢竟呢個畫面，都唔係咁時常出現。

喺佢地又坐低之後「不過小軒，既然你依家已經攞咗小喬嘅初吻，做兄弟嘅，就提醒你以後你自己真係要識做啦…」禮謙再次提醒俊軒，要開始負責任

「我知道咖啦，我一定唔會令大家失望咖啦，好兄弟」俊軒對禮謙表示感謝。

然後，韻喬都趁有少少時間，繼續同天殷講一講六國論嘅内容。喺經過韻喬同俊軒一齊教之下，天殷都終於明白個課文講咩「好多謝兩位學霸一齊教我呀！我終於都明啦！」

韻喬同俊軒同一時間微笑，然後韻喬就話「最緊要你學得識，明個課文講咩啫」「都係嘅！」





韻喬之後就睇一睇天殷枱面上個鐘，之後就話「殷殷呀，時間都唔早啦，我要返屋企啦！」

「下，小喬你咁快就走啦，9點幾咋喎？」天殷聽到韻喬咁快走，就有少少嘅唔開心，扁哂嘴咁講。

但係韻喬都講出自己堅持要走嘅原因「哎呀殷殷呀，我唔想因為夜返，搞到我爸爸媽媽太擔心我呀。」

「不過今晚都多謝大家陪我，我好返好多咖啦，唔使再擔心我。」
 
其餘三人聽到韻喬咁講，於是就鬆一口氣話「唔使客氣！」

「喬喬，無論點都好，我地好多謝你咁偉大嘅付出同埋配合就真啦。雖然我地嘅任務暫時成功，不過都留有一點嘅缺憾。」

「但點都好啦，我覺得今日嘅經歷，將會係大家生命中最重要嘅其中一日!」天殷好開心咁講，再上前抱一抱韻喬。

韻喬微笑之後向其他人道別「好啦，咁我走先啦，星期一見返學校見啦，bye！」





不過，禮謙好快就打咗個眼神畀俊軒，要對方好好報答韻喬。俊軒get到之後就同韻喬講「小喬呀……依家都已經夜啦，不如等我送你返去啦！」

「做咩……咁突然呀？」韻喬非常愕然咁回應。

「咁樣我媽先唔會再懷疑我，而且你……一個咁靚嘅女仔，自己一個落去大街坐巴士，我怕你會有危險嘛。」

「喔…咁好啦！」韻喬面紅紅咁答返俊軒「唔該你先」

「唔使客氣啦小喬！好啦，我送完小喬之後，我都要返去啦，星期一返學見啦，謙謙、殷殷！」俊軒同天殷、禮謙道別。

「ok 返學見！bye bye」於是韻喬同俊軒再次上林家嘅座駕，準備前往韻喬寓所樓下。
 
「張小姐，請問你住所喺邊度？」司機喺俊軒同韻喬上車之後，就問韻喬「司機，麻煩開去福生大廈，北角渣華道，唔該你！」





「知道，張小姐。」司機回答之後就即刻開車。而喺車上，韻喬同俊軒二人都仲係面阻阻，幾乎全程都不發一言。

（待續 ~）

IG link https://instagram.com/bear_big_big_writer