《愛在。貴族學園》: Ch 10 ~ 韻喬復仇記 Part 3

Ch 10 ~ 韻喬復仇記 Part 3（連載日期：2021/12/22）

「我OK呀，我同邊個都可以夾到戲嘅」俊軒果然對韻喬毫無戒心，幾乎諗都冇諗答應韻喬嘅提議，完全意識唔到自己將會喺一陣嘅練習裏面，畀韻喬報復星期六晚一吻之仇。

「咁謙謙就同天殷兩個一齊去練啦！」「好呀！行啦謙謙！」

於是天殷就面紅紅咁，同禮謙一齊去練習，不過禮謙都發現唔到天殷嘅異樣。

今日要練習嘅内容，其實就係一場女主角因為男主角喺金錢問題上，激嬲咗個女主角，因而畀女主角一巴打埋去嘅戲，完全就係類似《溏心風暴》嗰種商戰愛情劇。





“哈哈，今日嘅練習，正正就合我心意啦，林俊軒你換個死人頭，今次你仲唔畀我打死？“

對於今日嘅聯係内容，韻喬就係完完全全可以得到一報仇嘅機會，心裏面覺得簡直天助我也嘅感覺。

當然俊軒到呢一刻，都完全唔知道，自己已經踏入韻喬嘅圈套裏面。「小喬同學你ready未？」

「我ready啦」於是韻喬就同俊軒開始排練。
 
「發，點解你要咁樣利用公司資金啊？你知唔知你咁做係犯法，要坐監咖！」韻喬語帶激動去讀出劇本上嘅内容。





「我都係想畀幸福我地兩個姐，有咩唔啱？！」到俊軒讀出臺詞。當然兩人都有加上自己嘅感情落去。

「啪！」劇本上指示女主角喺呢個位要打男主角一巴，韻喬就覺得呢個係一個可以爆seed嘅好機會，於是韻喬就借機出好大力，一巴打落俊軒塊面到，而且仲要打得好大聲。

「孫永發，你真係好自私！萬一你畀人拉咗，咁我以後點呀？你有冇考慮過我感受呀？你講呀！」
 
韻喬嘅呢一巴重擊，完全打到俊軒塊面紅哂，而且俊軒都覺得塊面異常地痛，於是就用手遮住自己塊面，再同韻喬講

「唔好意思呀韻喬同學，我地可唔可以稍為停一停先？我塊面好似有啲痛」
 




「ok咁你抖一陣先囉！」韻喬語帶輕佻同意俊軒要求，同時都望向天殷微笑。

不過俊軒好快都發現到韻喬同天殷之間嘅眼神交流，覺得佢地兩個好似夾埋咁，於是就問韻喬

「喂張韻喬同學，啱啱呢下你做咩打得咁大力呀？我地依家都係練習做戲咋喎，又唔係正式roll機埋位！？」

「下！？乜我頭先嗰巴，真係有好大力咩？」韻喬扮哂嘢咁反問俊軒「而且頭先開始之前，Ms Chan唔係都叫我地，要好好體會主角嘅感覺咖咩？」

「於是我咪諗住幫一幫你，等你入戲啲囉哈哈。咁依家你係咪好入戲呢？」韻喬繼續扮無辜咁回應俊軒嘅質問。

「咁你都唔使咁大力掛！真係…..呀好鬼痛」俊軒抗議道，但當佢醒起啱先韻喬同天殷嘅眼神交流之後，就有少少不滿咁質問韻喬「哦張韻喬，你應該唔會係特登打咁大力下話！？」

對於俊軒畀自己嘅一巴車到佢面容扭曲，韻喬心裏面不知幾爽，於是就話「打到你咁痛，小妹真係唔好意思啦，係唔係有心呢，呢個我都唔知囉，如果你自己覺得係咪係囉！」

此時俊軒都暫時放低自己隻手，可以好清楚見到畀韻喬打過嘅痕跡。





韻喬離遠一望之後，就回應話「不過呢，做戲就算係練習都好，逼真啲好啲呀嘛！」

「如果太過揸流攤嘅話，咁就不如唔好練啦好冇？」「你！……」

（待續 ~）

IG link https://instagram.com/bear_big_big_writer