《愛在。貴族學園》: 特別篇 2 ~ 女孩們的聖誕節 Part 2

特別篇2 ~ 女孩們的聖誕節 Part 2（連載日期：2021/12/26）

於是天殷一早就喺觀塘站等韻喬。韻喬一去到之後，就同天殷講「殷殷你等咗我好耐呀？」

「唔係呀，我都係等咗十分鐘左右咋嘛，頭先過黎嘅時候又塞車，觀塘成日都係咁」天殷回答韻喬。

「不過，喬喬今日做咩將自己包到咁實呀？今日都唔係話好凍咋喎！」天殷見到韻喬今日嘅私服裝束之後，就非常好奇咁問。

韻喬於是就話「下！始終個影師咩底細我都只係透過作品同網上面嘅評論去了解，我點知佢其實咩料咖？我梗係要保護自己先啦！」





「原來係咁，不過你都有你嘅道理嘅，雖然我都已經講明，唔會影性感大尺度」天殷好似發現新大陸咁，但同時都想韻喬安心而表明立場「好啦，時間都差唔多啦，我地都要行啦」「嗯嗯！」

天殷於是就同韻喬，按照影師提供嘅地址，去到一個影樓，天殷喺核對地址之後，撳門鐘之前，先望一望韻喬。

韻喬知道天殷嘅意思，於是就話「殷殷，你依家後悔都仲有機會，係咪真係怕個攝影師對我地有不軌企圖而唔想影？」

「唔……唔係啦喬喬，我只不過係問你ready未咋嘛！」天殷其實再一次畀韻喬睇穿自己，只不過唔想韻喬埋門先黎縮沙退出，所以唯有故作鎮定。但韻喬即刻就同天殷講「我冇事，撳鐘啦!」

天殷隨即按下門鈴，好快就有一個年輕嘅男人，走到玻璃門面前「請問你地就係天殷同韻喬妹妹？」





「係呀，你就係……影師Vincent？」「係呀，麻煩兩位請入黎呀！」「係！」

然後，喺影師嘅帶領之下，好快就去到化妝間同埋影樓，喺衣架上面，影師已經預備好幾套聖誕主題嘅衫，畀韻喬同天殷揀。

韻喬同天殷都趁機四處張望，視察一下環境，到底個影師係咪真係老實人。

但觀乎影師所提供嘅幾套衫，都係正正常常，完全冇咩bikini甚至情趣内衣喺度，所以韻喬同天殷兩個都即刻放心起黎。

喺同Vincent再次確定，今日攝影嘅内容同尺度之後，佢地都先化妝，然後換上衣服，喺攝影棚正式“埋位”拍攝。





起初，佢地兩個嘅笑容都有少少生硬，畢竟都係第一次喺學校外邊做被寫體，佢地都要經過Vincent不斷提點必須要放鬆之後，韻喬同天殷先慢慢咁放鬆，而且好多動作都好容易做到，將兩位少女嘅天真活潑嘅形象，徹底咁呈現出黎。

過咗差唔多兩個鐘，喺換過兩套衫之後，韻喬同天殷都喺攝影棚裏面做小休，然後Vincent就趁機整理一下，頭先喺攝影棚裏面嘅相做少少處理

「喬喬，頭先你覺得點呀？」天殷問坐喺度飲緊檸檬茶嘅韻喬。

「我覺得感覺都幾好呀，而且啲pose同我想要嘅，其實都差唔多，我諗出黎嘅效果都應該會幾好。殷殷你呢？」

「我都覺得係呀，雖然一開始嘅時候，Vincent哥哥都話我地表情好硬，但係後來放鬆個人之後，我同你都好似越來越夾咁」

「希望一陣間我地出到出面影外景嘅時候，都可以有更加多同更加好睇嘅相啦！」天殷繼續講「嗯嗯！」

「兩位妹妹，一陣間我地就會出去尖沙咀，夜晚就會出去中環影，你地ok嘛？」Vincent再問韻喬同天殷。

「我地都ok呀！」韻喬同天殷一齊答，於是Vincent就話「咁我地一陣就出發，然後同你地喺尖沙咀晚飯，之後先去中環影相啦」





「好呀！唔該哂你！」天殷好有禮貌咁回應，而韻喬都報以微笑。

兩個女仔除咗做Vincent嘅模特兒之外，當然自己都有自私影啦，佢地自拍咗幾張之後，都放咗一兩張上IG story。

當然就引起同班同其他同學，以及一大堆唔識嘅男fans支持點Like支持啦，當中仲包括公認全校嘅Flirt女王，4A嘅林俊軒。

「嘩班男仔使唔使咁誇張呀？喺度Mon po咖佢地？秒讚囉好冇！」韻喬喺個電話因為畀人洗讚而響個不停之後，就喺度同天殷講「仲包括我地班個flirt女王囉！」

「你話軒仔？」天殷非常好奇咁反問韻喬「我記得我有同佢講我去私影」

韻喬於是就有少少不滿咁講「搞錯呀？！咁啫係佢知道我依家同你一齊啦？」

「呃可以咁講嘅！」天殷好細聲咁回應韻喬「不過喬喬呀，其實我冇同軒仔講我地一齊去影相咖，只係話同朋友咋！」





「總……總之我就係唔想佢知啦！就算佢係當初帶我嘅人都好！」韻喬非常緊張咁講，搞到天殷都有少少覺得奇怪，但係天殷都冇再追問落去。

喺攝影棚裏面影多一套之後，Vincent同埋兩個助手，就帶埋韻喬同天殷出去尖沙咀海旁一帶影外景。

平安夜傍晚嘅尖沙咀，早已經有好多提早放工嘅上班族，仲有三五成群放緊假嘅學生，當然同埋街上一對對嘅情侶，不停喺附近有聖誕裝置嘅地方影相，所以韻喬同Vincent佢地，都要等一陣先可以影到相。

不過，始終影相嘅地方都係室外為主，所以韻喬同天殷都係着住同一套衫，不停喺聖誕裝置同聖誕樹前擺pose，務求可以將自己最好嘅一面，完全紀錄喺今一套私影作品裏面。

喺影咗大概都差唔多兩個鐘，Vincent一行人就去海運大廈嘅餐廳食飯。

當然，天殷身為李家大小姐，家人喺香港社會都有咁上下地位，所以Vincent所揀嘅餐廳都唔可以太差。

「Vincent哥哥，今晚真係唔好意思，要你咁破費請我同喬喬，黎咁貴嘅餐廳度食飯」「係囉，我都唔係好意思」韻喬都跟住講。

Vincent聽完之後都即刻咁大笑話「咁，畢竟天殷小姐你都出身貴族，點都要食好少少嘅。」





「不過，其實我都好好彩，先話可以喺娛樂圈有咁多exposure」然後Vincent都喺食飯嘅時候，同韻喬、天殷分享自己嘅故事。

當然，韻喬同天殷都有分享下自己喺學校嘅事，當Vincent知道韻喬係一個高材生之後，就即刻非常驚嘆，搞到韻喬自己都唔係幾好意思。

飯後，佢地喺尖沙咀再影多少少相之後，就坐天星小輪去中環，繼續影夜景相。佢地由海邊影完之後，再沿住行人天橋行去皇后像廣場嘅聖誕樹度影。

不過，因為韻喬同天殷兩個本身都外貌出衆，再加上化妝同埋主題服裝，所以喺影相擺pose嘅時候，好多旁邊嘅人都不時望向佢地兩個。

甚至有人都想同佢地合照，或者同埋Vincent一齊影，搞到真係好似明星咁。

終於都差唔多九點幾十點，全日嘅私影先至完結。喺車上面，Vincent一邊揸車，一邊感謝團隊付出時間同專業，仲有天殷同韻喬嘅合作

「今日真係辛苦你兩位嘅體力啦，但係我都希望可以將最完美嘅作品送畀兩位」





天殷於是就話「我地都多謝你地就真，可以將我同小喬都影得咁好睇，係咪呀，喬喬？」

韻喬面紅紅咁微笑，畢竟自己對於其他人對自己外貌嘅稱讚，韻喬都會變得非常怕醜。

（待續 ~）

IG link https://instagram.com/bear_big_big_writer