Ch 11 ~ 首次獨處 Part 4(連載日期:2022/01/14)

「嗱各位同學,喺開始前麻煩聽一聽我講先。」講嘢嘅係表演藝術科嘅老師Ms Chan。

「跳舞同做戲嘅要求完全唔同。尋日我地學做戲,強調嘅係演技同表情嘅發揮,去配合對白,能夠帶領觀衆進入情景,去明白故事嘅内容,但部分嘅戲劇,對體力要求會比較低……」

「不過跳舞嘅話,就因為舞蹈本身係冇任何對白嘅關係,表演者只能夠靠流暢嘅動作,以及到位嘅表情,去帶領觀衆進入同明白舞蹈之中所要表達嘅情緒。」

「而且部分嘅動作可能都比較大幅度,於是對於體力嘅要求就會更高。」



「一陣間你地開始練習嘅時候,可能會有部分同學會跟唔到拍子,又或者可能會因為合拍度不足而踩到對方隻腳,呢個都係跳舞比起演戲難度大嘅地方。」

「而今次嘅目標,就係要訓練兩個人之間嘅默契」

「但要注意嘅係,如果同學因為刻意睇住對方隻腳,而避免踩到對方痛甚至受傷嘅話,就可能會令到整個舞蹈嘅動作都唔流暢,影響欣賞嘅程度。」

「所以我都希望同學一開始,先慢慢培養默契,如果真係因為踩到腳而痛嘅話,記得一定要出聲,千祈唔好死頂呀下」

「好啦各位同學仲有冇唔明白嘅地方?如果冇嘅話,一陣音樂一起就可以慢慢跟住我嘅指示開始跳」
 


Ms Chan講完之後,就開始放音樂去畀同學培養感情同默契,而喺了解埋個動作之後,同學們都開始慢慢練習。

因為默契點都要慢慢培養嘅關係,對於初初接觸跳舞嘅同學,都好容易踩到舞伴嘅腳……

結果「哎呀」「好痛」「sorry」之聲不斷喺Studio内此起彼落。

面對如斯情況,身為老師嘅Ms Chan都要出聲提點,叫大家盡量放輕鬆,但係都當然要小心。

俊軒、天殷同埋韻喬、禮謙都開始練習,佢地幾個都好小心,避免整到對方。



但係呢,人算不如天算,喺禮謙其中一次將腳落地嘅時候……

「哎呀!」原來禮謙突然唔小心踩到韻喬隻腳。

然後韻喬都因為咁而失平衡,動作太大結果扭一扭到腳,於是成個人坐咗喺地下。

而韻喬再因為好痛而面容扭曲咁叫咗出黎「呀!好痛呀!謙謙!」

「對唔住呀小喬同學,你點呀,有冇事呀?」禮謙見狀就梗係即刻停止動作,同時都好細聲咁,問一問坐咗喺度嘅韻喬到底咩情況。

雖然係咁,不過韻喬嘅叫聲,都已經引起咗俊軒嘅注意。

「嗯……唔緊要呀謙謙,我諗我都應該冇咩事嘅,係有少少痛啫,不如我地都休息1-2分鐘好嗎?」韻喬表情有少少痛苦咁同禮謙講,然後繼續撳住自己隻腳,希望自己可以冇咁痛。

「好呀!小喬同學你要唔要飲啖水呀?」身為韻喬舞伴嘅禮謙,都顯出一下風度嘅一面「係嘅我就幫你拎你個水樽過黎啦!」



韻喬聽到之後就點點頭「好呀,藍色嗰個水樽係我嘅,唔該」

於是禮謙就去拎水樽「唔該禮謙」「唔使客氣,小喬同學」

不過,喺呢兩分鐘裏面,韻喬同禮謙都冇點傾過計,就連禮拜六嘅事都冇再提過,韻喬都只係靜靜咁,睇住其他同學跳舞。

喺過多幾分鐘之後,禮謙見時間都差唔多,於是就問「小喬同學你隻腳點呀?如果你ok嘅話,我地就繼續?」

「我諗我應該冇問題嘅」韻喬用一個比較勉強嘅語氣回答禮謙。

而禮謙見韻喬話冇問題,於是就伸出手想扶起對方「小喬同學你試下慢慢起身」「好,唔該禮謙」

不過,最壞嘅情況都係發生咗「哎呀!呀!」韻喬想嘗試起身,不過就發現自己嘅傷勢,比起自己想象中大。



(待續 ~)

IG link https://instagram.com/bear_big_big_writer 
已有 0 人追稿