特別篇 3 ~ 停一停,諗一諗 Part 5(連載日期:2022/02/03)

不過,唔想發生嘅事最後都係發生咗。因為喺河馬聚集嘅地方,突然發出非常大嘅叫聲之餘,而且啲河馬仲四圍散開。

「大獲!隻河馬中毒,大家小心!」身為獵豹嘅雪盈,留意到情況之後,即刻同全班同學講。至於隻中毒嘅河馬,不停發出叫聲之餘,仲開始嘗試去咬身邊嘅同伴。

咁當然,企鵝衛生部長見到之後,都嘗試要其他嘅動物,避開呢隻中毒嘅河馬,因為如果用武力咬嘅話,中毒嘅動物都只會再多一隻。

現場一下子陷入失控狀態,好多動物都撞埋一堆,包括可能係屬於獵物嘅動物,為咗避開感染病毒,而走到會食自己嘅獵食者面前,因此都有無辜嘅動物並非因為病毒而命喪AGM。



台上嘅犀牛雖然都出咗口術,要在場所有嘅動物冷靜,但係都冇太大用處,最後隻中毒嘅河馬,都咬咗超過10隻動物,包括有其他河馬同其他動物。

但喺咬完其他動物之後,中毒嘅河馬即刻倒地不起,不停咁喺都抽搐、嘔血。

而被咬過嘅動物,自己都知道自己命不久矣,部分選擇行開,但係更多嘅係有部分同伴因為唔捨得佢地,選擇留喺身邊。但企鵝部長唔知道,其實只要同染毒嘅動物過於接近嘅話,都會被傳染。

所以喺過多15分鐘之後,毒發嘅動物就唔止頭先畀河馬咬過嘅十幾隻,而係超過幾十隻動物一齊毒發。

今次嘅失控自然都畀頭先嘅一次大,好多動物都因為要逃避發癲嘅同伴慌忙走避,而且佢地都意識到,今次一定要走得夠快而且夠遠,先有機會保住自己嘅生命。



雪盈佢地都即刻同其他有跟住佢地嘅動物跑嘅跑,飛嘅飛,一走難就去咗好遠嘅地方。

就喺佢地坐低休息嘅時候,化身做一隻狐狸嘅林俊軒,突然之間聽到有人類嘅聲音,於是就即刻跑到雪盈面前,然後話「雪盈,你聽唔聽到好似有人聲越來越接近我地呀?」

雪盈起初都唔係太相信俊軒嘅説話「林俊軒你講真?」「我講真呀,唔信嘅話,你自己細心聽下啦雪盈」雪盈於是就照俊軒嘅意思,好留心咁聽。

「果然有類似人嘅腳步聲過緊黎!大家ready!幾位變咗做狗嘅同學,麻煩幫手大叫,然後吸引啲人過黎!」

「知道啦!!」喺雪盈下令之後,佢地就開始發出叫聲,希望可以吸引到人類嘅注意力,畢竟佢地一日唔變返做人類,佢地都會有麻煩,唔可以離開呢個奇怪嘅世界裏面。



至於其他不知就裏嘅動物同伴,都走去跟住啲人類喺都叫,簡單少少講其實就係鳩叫。

但係佢地嘅努力,終於都得到回報,因為佢地成功將人類吸引到過黎。而呢啲工作人員,居然都係身穿全套保護裝備嘅。

韻喬見到佢地之後,發覺呢個畫面似曾相識“唔知點解,好似上次我見到有人準備殺野豬嘅時候一樣,都係呢啲裝備嘅?”,於是韻喬都代入返上一次嘅思維,認為自己可能會惹上殺生之禍,於是就即可同雪盈講……

「雪盈,我地一定要同佢地講我地其實係人類先!如果唔係我怕呢啲着防護裝備嘅人,會當我地係帶病嘅動物,然後會殺我地咖!」

「咩話!咁我地一定要同佢地講到嘢,同埋得到佢地嘅信任呀!」

但係好快,呢班人已經走到雪盈佢地面前,然後就話「報告上司,Team A7/9E喺近住大網仔迴旋處,有近一百隻唔同種類嘅動物,未知佢地有冇帶virus」喺對講機裏面,好快就傳出類似指揮官嘅聲音

「全部人同我聽住,即刻同佢地做speed test,如果有一隻係positive嘅,即刻同我將佢地人道處理咗佢地」「知道!」於是呢班人就開始準備用具,幫呢班動物做快速測試。

當然,韻喬佢地身邊呢班真係動物嘅動物,喺見到人類嘅動作之後,就顯得非常不安,甚至不停向後退。



但韻喬佢地為咗保護眼前嘅同伴,於是佢地打個眼色之後,就主動上前。呢種強烈嘅落差,自然都引起呢啲工作人員嘅注意力。

「喂,Sharky,你地有冇發現呢啲動物有少少唔尋常呀?」其中一個工作人員同佢嘅同事講,呢位叫Sharky嘅工作人員,就即刻望住韻喬呢隻野豬,就話「呢度有野豬都好正常啫,但係點解又會有豹、長頸鹿同倉鼠呢?」

「你又講得冇錯喎,呢度好似好奇怪咁!」於是Sharky就望真一下,眼前奇奇怪怪嘅動物組合

「各位同事,麻煩同我地準備幾十個籠,同我將堆動物捉返哂去檢疫」「Yes Sir!」

雪盈同韻喬佢地,喺聽到眼前嘅人類,決定捉自己去檢疫之後,大家都急得如熱鍋上嘅螞蟻一樣,不停打眼色畀雪盈。

雪盈心裏面覺得,依家係一個好時機,等眼前嘅人類去救自己同大家。

於是,就算會畀人投以奇異目光都好,雪盈都決定出口「唔好意思呀!我想問你地有冇辦法,幫我地變返做人類呀?」



當然,呢辦工作人員聽到之後,都非常驚訝咁望向雪盈,然後Sharky就反問「你係人類?」

雪盈即刻點頭就話「係,其實呢度有我同幾十個同學喺度,因為唔知咩原因跌咗落黎呢個世界,所以,我都想你地可以幫一幫我地,至少都變返做人類先!」

當然一衆工作人員都半信半疑啦,於是就反問雪盈「就算你係嘅話,我地要憑咩去信你地呢?跌落黎呢個世界?哈哈,咁就更加要捉返去研究啦!」

Sharky呢句説話非常有冒犯性,令到全班同學都顯得非常不滿,覺得佢地有心留難大家。

雪盈面對呢種咁睇唔起自己嘅政府官員,就話「你可以唔信,但我地幾十個都可以同你講,我地本身就係人類。而且你地着到咁,都可能想知道動物世界裏面有神秘疫症傳播嘅事」

「如果你可以將我地變返做人類嘅話,我都或者可以合作去調查呢件事。如果唔係你地今日冇嘢返去交差嘅話,你地頂烏紗帽仲保唔保得住呀啦?」

雪盈型到爆嘅對話,都令在場工作人員忌三分。而Sharky,都即刻下意識向後退一步。

雙方喺經過一輪眼神嘅對峙之後,Sharky就決定讓步「OK,我就信你地,但係我地都希望你地同我地合作。」



「人黎,準備還原劑。邊個原先係人類嘅就過黎啦,但係如果本身喺動物嘅話,服用還原劑嘅話,就會即時因為排斥反應而死亡」

一班工作人員既要同時準備還原劑,但係都要準備幫佢地做快速病毒測試,確定相關嘅動物冇受神秘病毒感染。當然,班同學都要接受病毒快速測試,先可以用還原劑轉返做正常人。

但係好好彩,雖然頭先喺會場度,有唔少動物受到感染,但係能夠走得出跟到雪盈佢地出黎嘅,都冇受到感染。

所以,當喺雪盈佢地變返做人類之後,Sharky就提出話返去總部,詳細去了解到底發生咩事,同時都畀時間等雪盈佢地重組一下到底發生咩事。

雖然大家都可以變返做人類,但係因為佢地原先都係着住睡衣出黎嘅關係,所以班女同學都覺得有少少尷尬。不過,能夠可以有一個咁難得同美好嘅時光,班男同學都梗係十分珍惜啦。

過多一陣之後,佢地就去到一個秘密研究所。雪盈佢地於是就跟住Sharky入去。

至於啲動物就冇咁好彩,佢地要暫時放入去動物檢疫隔離室度隔離,而且就算之後冇中毒都好,都要等候衛生局局長發落。



於是,經過一輪商討之後,全班同學就將自己喺上床休息,到頭先遇上Sharky佢地之前嘅經過,同研究所裏面嘅職員交代。不過,佢地都不約而同咁話,喺訓着之後就跌落呢個夢境裏面。

(待續 ~)

IG link https://instagram.com/bear_big_big_writer
已有 0 人追稿