《愛在。貴族學園》: 特別篇 3 ~ 停一停，諗一諗 Part 4

特別篇 3 ~ 停一停，諗一諗 Part 4（連載日期：2022/01/31）

「前面隻野豬，到底你係邊個？」

韻喬一下就認出係雪盈把聲，於是就話「雪盈，係咪你呀？我係小喬呀！」

「你…係小喬？」化身成獵豹嘅雪盈，得知眼前嘅野豬係韻喬之後，原本凶猛嘅神態都即刻放鬆起黎。

「係呀，但係我地發現，殷殷同我依家個樣，同我地今晚帶住嘅動物頭套，係同一種類型。所以雪盈你依家先會變成一隻豹；而我同殷殷，依家就分別係野豬同埋倉鼠」





「原來係咁」雪盈若有所思咁講「但係，點解頭先我經過其他人嘅營舍嘅時候，佢地冇出到黎嘅？」

「大姐呀，你依家成隻豹咁樣，大家梗係怕咗你啦！」坐喺韻喬身上嘅天殷同雪盈講，雪盈都即刻無話可説。

韻喬於是就話「既然係咁，不如就我同天殷一齊去叫大家出黎啦」「好啦，唔該小喬、殷殷」

韻喬於是就同天殷，一齊行去營舍嘅方向。首先韻喬就返去自己原先住嘅營舍度。一打開道門，就發現有兩隻狗，坐喺張床上面，面露非常不安嘅表情。

天殷於是就開聲話「文曦、恩希，你地兩個唔使怕啦，係我天殷同小喬呀！」化身成其中一隻狗仔嘅文曦就話「你點解會知道係我咖？」





「因為……大家都變成咗頭套上面嘅動物。」野豬韻喬幫天殷答「頭先嚇到你地震嘅，係雪盈黎咖」

一講到雪盈所化身嘅豹，方文曦同趙恩希兩個，都再一次全身震起黎。

韻喬於是就反問話「其實野豬有攻擊性大家都應該知咖，但係點解你地會怕豹，但係又唔怕野豬嘅？」

「因為豹一定會食肉咖嘛，但係如果係野豬嘅話，可能會食其他食物咖嘛！」恩希試圖同韻喬解釋

「但係野豬都可以咬到狗屁股開花咖喎！要唔要試下？」於是韻喬就想行前一步，但係天殷就即刻阻止韻喬咁樣做……





「張韻喬呀！好心你就唔好嚇佢地啦，佢地已經驚到震哂啦！」「好啦好啦殷殷，我都係講下笑咋。你地都係同我地一齊出去睇下發生咩事先啦！」

韻喬兜完之後，文曦同恩希先至放低戒心，然後就跟住韻喬同天殷出去。

首先去到旁邊另一個女仔房，裏面居然有兩隻貓，一直倉鼠同兩隻松鼠。

同頭先一樣，佢地一見到韻喬呢隻野豬，就開始驚起黎。於是天殷同韻喬又要再一次，同呢間房嘅同學，交代返到底發生咩事。

但好快今次呢班女同學，都相信天殷同韻喬講嘅説話，然後跟埋一齊出去。

喺準備去到男仔房嘅時候，其中一間個屋頂，居然穿咗一個大窿。然後裏面有一隻長頸鹿伸咗個頭出黎。

「嘩！邊個扮長頸鹿結果撞爆埋個屋頂呀？哈哈哈！」天殷講完之後，成班女仔就喺度大笑。於是隻“長頸鹿”就話

「係我龐道明呀！頂佢啦我頭先起身想去厠所，點知我就變到咁大隻，仲撞穿咗埋屋頂，好癲呀，到底發生咩事呀？！」





「你不如伸個頭落黎先啦！」「哦！」“BANG！“不過好可惜，道明今次撞爛買間營舍幅牆，先可以行到出去，於是班女仔就喺度笑。而韻喬都叫裏面啲男仔出黎聽，先再一次講到底發生咩事。

喺班男仔都終於知咩事之後，成班動物就浩浩蕩蕩咁，出返去原先營火會嘅會場。

雪盈同其他頭先唔係度嘅男同學，都已經喺度等佢地，一切，就好似營火會未畀人搞寸之前冇分別。

不過，在場嘅動物，居然比起自己班同學嘅數目為多，起碼都有幾百隻唔同種類嘅動物喺度，而喺個台前面，上面居然掛起咗個”動物星球AGM“嘅banner喺度。

韻喬同一衆同班同學，見到之後都感到嘖嘖稱奇，因為雪盈就今次camp定落嘅主題，居然會成為真正嘅大會。

但同喺camp唔同嘅係，個主持人就唔係雪盈，而係換咗一隻大象同犀牛上去。

韻喬見到之後非常奇怪，於是就望向雪盈呢隻豹，不過雪盈就細細聲話「（其實我係畀呢堆唔識嘅動物趕落黎咖，佢地話呢度先係佢地主場喎）」「（嘩！原來啲動物對於地盤意識真係好認真喎！）」





「（係呀，不過我地被捲入呢度，事出必有因，我地都係睇下一陣將到底發生咩事先）」

雪盈之後就行開咗，走去同另外兩隻豹喺埋一齊，而且有豹喺度嘅話，都會嚇到喺韻喬身邊嘅其他豬隻。

但就喺等開始嘅時候，韻喬發現有一個形跡可疑嘅神秘人，將啲類似食物嘅嘢，黃喺會場附近嘅空地上，然後好快就走咗去，消失喺空氣之中。

韻喬於是就喺度諗”唔知呢個人喺度做咩呢？做咩放低啲嘢之後，就自己走咗去？奇奇怪怪咁“

韻喬為咗自己身邊班豬朋友，唔好亂食呢個神秘人所放低嘅可以食物，而令到自己同其他同伴有生命危險，於是韻喬都第一時間，都用新得到嘅技能——豬話，去同身邊嘅同伴溝通。

除咗同班野豬溝通之外，韻喬就梗係都要同自己班同學講，不然自己班同學有機會喺呢個奇怪嘅夢境裏面，失去自己嘅生命。

喺經過同大家嘅通風報信之後，大家都繼續將呢個消息傳開。好快，呢個動物星球AGM都正式開始。

一開始，喺台上面嘅大象同犀牛，都不停咁喺度吹噓自己過往一年裏面嘅”豐功偉績“，搞到韻喬同一齊嘅天殷，都唔知點樣去回應大象同犀牛嘅自我膨脹。





當然，除咗自我膨脹之外，呢班動物都趁機攻擊人類，到底為咗人類嘅幸福aka自私，去破壞野生動物嘅生存環境，甚至可能有人類，為咗自己免受野生動物嘅騷擾，而主動去攻擊野生動物。

呢一層，對於一衆同學黎講，自然都有好複雜嘅感覺。難受嘅係，呢班動物有時候未必明白，人類有時候嘅決定，都係有機會係為動物嘅幸福着想。

但係，人類其實都真係傷害得大自然太多太多，喺心裏面都慚愧起黎。

不過，雖然大家都已經盡力看住啲食物，避免有其他動物走到附近。但係久守必失嘅道理，往往都能夠應用喺唔同嘅場合。

因為好快，有一隻唔係韻喬化身而成嘅河馬，喺見到有個西瓜擺喺度之後，就走埋去一啖就吞咗個西瓜，而且仲非常滿足咁去享用。

原本裝扮成一隻牛，但最後真係做咗一隻牛嘅禮謙，離遠見到隻河馬將個神秘人放低嘅西瓜鯨吞之後，就即刻離開自己嘅“同伴”，首先走到去化身做鸚鵡嘅鄺頌賢度。

鄺頌賢一見到禮謙向住鸚鵡呢邊過黎，於是就飛返落地，就喺禮謙耳邊細細聲咁問「（喂禮謙，你咁急走過黎做咩呀？）」





禮謙今次就好心急咁話「（頌賢同學，頭先韻喬同學同埋雪盈同學，咪話呢度附近有神秘人放低食物就走咗去嘅？）」

「（係呀，跟住呢？）」「（跟住頭先我見到有一隻河馬，走去食咗一個由神秘人放低嘅西瓜，而且仲要一啖吞落肚！）」禮謙一反平日冷靜嘅常態，繼續非常緊張咁交代頭先自己見到嘅嘢。

鄺頌賢聽到之後，就即刻擺出一個頭痛嘅樣「（今次大獲啦，都唔知一陣會發生咩事咖！）」

「（不如我地同韻喬同學，同埋雪盈同學講咗先？）」禮謙於是點下個牛頭回答。

「（咁我飛上去睇下佢地喺邊，你跟住我行就得咖啦！）」頌賢講完呢句就即刻飛上天上，而禮謙就跟住頌賢飛嘅方向行。

至於AGM，台上面嘅“衛生部長”企鵝先生，就喺度講緊今日有一種怪病，喺動物世界裏面廣泛傳播嘅事。

而呢個病毒嘅特點，就係萬一感染到之後，就會開始不由自主咁瘋狂大叫，不停發出叫聲。

而受到神秘病毒感染嘅動物，佢嘅病毒基因會喺宿主裏面洗牌，然後再變成新嘅病毒喺宿主體内複製。

然後受感染嘅動物，除咗大叫之外，仲會通過咬其他動物，通過體液同血液去感染其他動物。

但係因為每次傳染，病毒嘅基因都會有微妙變化，而且複製能力都非常之快，所以基本上都冇可能可以康復。

一衆在場嘅動物，喺聽到企鵝部長咁講之後，頓時陷入一陣兵荒馬亂，畢竟呢個病毒都暫時未喺呢跟族群嘅動物裏面出現。

但喺根據企鵝部長嘅介紹，全球已經有多種動物因為大規模感染，而令一族動物團滅。

至於韻喬佢地，雖然佢地唔係理科生，但係聽到之後都覺得非常不安，而且都喺度思考到底對人類會唔會有影響。

而就喺韻喬同天殷喺都思考嘅同時，頌賢都已經先一步喺野豬群搵到韻喬。於是頌賢就飛到韻喬耳邊，將呢個壞消息講出去。

韻橋聽到之後，就即刻叫天殷坐穩，然後喺冇遠嘅地方，遇上搵緊自己嘅禮謙「韻喬同學，你已經聽過頌賢同學佢講過咩事？」

「大概有呀禮謙同學，我地都係即刻通知其他同學，同埋佢地嘅動物族群都要小心啊！」韻喬同樣都係非常冷靜咁講。

「我覺得我地都係要同雪盈同學講先會好啲，但係雪盈係豹，我都怕會畀佢依家身邊嘅同伴攻擊呀！」天殷非常擔心咁講。

不過韻喬就話「唯有麻煩頌賢，幫手將雪盈引去我地度。我地都係喺一個地方集合先啦！」於是佢地都兵分幾路合作。

但係，雖然佢地三十幾個同學，好快都可以喺其中一個地方度集合。不過，唔想發生嘅事最後都係發生咗。

（待續 ~）

IG link https://instagram.com/bear_big_big_writer