《愛在。貴族學園》: Ch 11 ~ 首次獨處 Part 9

Ch 11 ~ 首次獨處 Part 9（連載日期：2022/02/12）

（三平台點擊數15萬次加更，多謝大家嘅支持。同埋正章都要大家久等啦）

但呢種“幸福”嘅時光真係過得好快，因為今日嘅交通尚算暢順嘅關係，俊軒佢地嘅座駕好快就去到福生大廈「喂小喬，起身啦，我地返到你屋企樓下啦」

「嗯！」俊軒好溫柔咁叫醒韻喬，當然韻喬好快都聽到，於是韻喬都孭返自己個書包。

俊軒於是就再同韻喬講「小喬，我依家同你返上去，搽多一次藥油先，等你今晚唔會再咁痛。」「知道，唔該小軒」韻喬好怕醜咁回答





「司機呀，我應該未必會咁快返落黎，你去附近泊低部車休息下先，我ok嘅時候再畀電話你，叫你返黎車我返屋企」俊軒再同司機講。
 
「知道啦二少爺。張小姐再見！」司機答道「唔該哂司機，下次再見」韻喬回答之後，司機就幫俊軒同韻喬開門，然後俊軒就扶住韻喬落車，一齊慢慢咁進入大廈。

當然一路上，俊軒都係跟住韻喬啦，不過對於呢種地方，俊軒有少少唔習慣。
 
好快就去到韻喬屋企所在嘅樓層，韻喬就喺裙袋裏面，拎出門匙插入大門度。

不過喺韻喬開門之前，韻喬就同身後嘅俊軒講「俊軒同學，麻煩你一陣喺門口除咗鞋先入屋」





「知道啦小喬！」俊軒點頭道，然後都準備除鞋「另外，都希望你一陣……唔會畀我屋企嚇親」韻喬非常怕醜咁講。

俊軒再一次點頭表示明白，於是韻喬就打開張家嘅大門。

喺入到張家之後，韻喬就叫俊軒將自己個書包，放喺客廳梳化上面。

雖然頭先自己先應承過韻喬，話明白可能會畀對方屋企嚇親，但係出身貴族嘅俊軒，又點會可能即刻接收到。於是就好驚恐咁問韻喬「小喬，你屋企就…真係得咁細呀？」
 
「嗯，係呀，裏面就已經係我地間睡房同洗手間，另外一邊就係厨房同飯廳，請問你係咪有咩意見？」坐喺梳化上面嘅韻喬，語氣已經有有少少不爽，因為佢覺得俊軒嘅思想極其“離地”。
 




「唔……唔係呀小喬，點會有意見。不過始終……我地學校啲學生都係有錢人多，基本上個個都住大屋嘅，所以見到你屋企，咪覺得有少少特別囉」俊軒試圖向韻喬解釋。
 
「哦，咁希望小軒同學你，真係唔會介意……我呢啲平民地方比較淺窄啦」韻喬嘅説話都仲係有骨，然後已經用遙控開電視睇。

而俊軒都已經坐喺另一張梳化上面，但同時韻喬再繼續講「哈，你都真係好嘢啦林俊軒，你係第一個上我屋企嘅男仔」
 
聽到韻喬咁樣講，俊軒嘅内心難免都會有少少激動，但俊軒都要壓低自己嘅情緒，於是就話「唔會呀，作為客人我走去挑剔人地屋企嘅話，都唔係太過適當嘅，不過我竟然係第一個上你屋企嘅男仔」

韻喬聽返俊軒呢一句就面紅起黎「係呢小喬啊，你隻腳依家仲痛唔痛呀？不如你話我知，你屋企支藥油放咗喺邊，等我幫你搽多次隻腳啦，好嗎？」俊軒依家都仲好擔心韻喬隻腳嘅情況。
 
「好呀，唔該小軒，不過其實都已經好好多啦。而支藥油就放咗喺電視櫃下面第三個櫃桶度，然後喺藍色蓋個透明膠盒仔入面」坐喺梳化上面嘅韻喬指一指住個電視櫃道。
 
「知道，唔該」俊軒於是就走去電視櫃度摷，而且都好快locate到支藥油，然後就準備開始幫韻喬搽……

「小喬，你伸直隻腳，然後放上我大髀上面先」「哦！」俊軒吩咐韻喬道，而韻喬都慢慢咁，將受傷嘅腳，抬到俊軒嘅大髀上面。





之後俊軒就開始幫韻喬搽藥油，但係「呀呀呀呀呀！！！死人頭你細力少少得唔得呀！？」韻喬再次痛到叫出聲，而且因為佢喺屋企嘅關係，所以就叫得比起學校更加大聲。

「你忍多一忍啦小喬，搽腳傷一定要畀少少力，咁樣先會好得快咖傻妹！」俊軒一邊好細心幫韻喬隻腳搽油，一邊安撫一下韻喬

「嗱，如果你乖嘅話，最多……一陣間幫你按下其他地方啦，好冇呀？」

（待續 ~）

IG link https://instagram.com/bear_big_big_writer