Ch 12 ~ 好從實招來啦下 Part 3(連載日期:2022/02/21)

「不過,我好肯定嘅係,你係鍾意咗佢囉!就算呢一刻唔係鍾意都好,你都可能對韻喬同學有意思,甚至話有好感,係唔係?」
 
面對禮謙嘅逼供,俊軒都仲想嘗試用反問呢招去甩身「我咩都唔知呀!張韻喬成日都咁暴力對我呀,我又點會無啦啦鍾意佢,然後話要拍長拖啦!」

「不過你都係唔好講我啦,不如講下你啦,你自己唔係都好鍾意張韻喬佢咩?!」

不過俊軒都估唔到「係啊,我認我係鍾意韻喬同學呀!至少我都肯認先呀!」相對於俊軒嘅守口如瓶,禮謙非常大方咁承認。



不過禮謙都選擇繼續補槍「但係有樣嘢我好肯定嘅係,如果你真係要同我比嘅話,你鍾意佢嘅感覺,絕對係唔會比我少,甚至比我仲要多都唔出奇」
 
然而,俊軒同頭先一樣,依然選擇否認禮謙嘅質疑「你自己覺得係就係啦!我真係冇禮謙你咁好氣。明明我……都話唔係啦,都唔知點解你係都要話我係,奇奇怪怪咁款!」
 
禮謙見俊軒依然守口如瓶,基本上都冇可能可以將俊軒逼供,於是就改用軟嘅方式同俊軒講,先拍拍俊軒膊頭,然後話「我都知道今晚我冇可能,可以逼到你講真話咖啦」

「不過,你自己不如今晚返到去墊高個枕頭,好好咁諗一諗啦,問心一句自己到底鐘唔鍾意韻喬同學啦,或者對韻喬同學有意思啦」

俊軒聽後,良久都不發一言,而且心裏面嘅起伏好大。



禮謙見自己可能講得太過凝重,於是就緩和一下氣氛話「打機啦大佬,呢個問題你自己返去慢慢先諗啦,最緊要呢,係順從自己嘅心意呀」

佢地兩個之後就拎PS4出黎打,玩到差唔多夜晚8點幾,俊軒先離開程家,返去林家大宅。
 
至於喺福生大廈裏面嘅韻喬,就自己一個繼續做功課同溫習,但當然就越做越冇精神,頭都自然越來越痛,而且都因為發燒嘅原因,所以個身都越來越熱。

韻喬最後為咗可以散熱,於是仲非常唔識死咁,走去沖個凍水涼降溫。當然,呢個凍水涼,冷與熱之間嘅反差,令自己再度諗起最近同林俊軒同學嘅一點一滴,甚至都有以前喺Form 1E班房初次見面嘅場景。

而喺諗嘅時候,韻喬個身都再一次熱起黎,所以過於冷靜嘅韻喬,就不停同自己講



“冇可能,冇可能咖!一直以黎,我都剩係當林俊軒係普通嘅同學咋,我係唔會而且冇可能鍾意佢呢個衰人咖!張韻喬呀,你快啲醒呀!你真係唔可以再迷戀林俊軒呢個衰人咁多咖!”。

但係喺冲凍水涼嘅同時,韻喬都無意中將自己推入一個深淵之中……
 
喺沖完涼過後,韻喬就一邊食飯,一邊就玩下電話睇下片咁(其實韻喬間中都會玩電話嘅,雖然佢平時一副認真魔人嘅樣),因為喺冲完個凍水涼之後,韻喬都依然覺得好熱,於是出黎之後完全冇着衫,就咁搵條大毛巾包住自己個身就算。

但係唔使好耐,韻喬就已經開始狂打乞嗤,有鼻水之餘而且非常頭痛,後來仲開始發冷。

所以後來韻喬意識到,自己都唔可以咁樣太耐,於是就即刻著返套睡衣,然後繼續溫習。
 
不過去到夜晚差唔多10點幾嘅時候,「呃……點解今日…乞嗤…我好似完全唔在狀態咁嘅?唔通……我真係唔可以忘記……乞嗤……林俊軒呢個人?」

韻喬到呢一刻依然都覺得,自己流鼻水、頭痛嘅原因,唔係因為唔識照顧自己而造成。

反之,韻喬覺得自己咁其實係因為掛住林俊軒,而搞到自己怕醜而造成,所以韻喬最後都係選擇放棄繼續溫習「啊,今日都係去到呢度好啦,聽晚先再溫啦,搽咗腳先」



於是,喺收好聽日要用嘅書之後,韻喬就去幫自己今日扭親嘅腳搽多次藥油。

但自己搽完之後,發覺都係俊軒嘅手勢好過自己好多,但同一時間韻喬都因為記起今日嘅事,再一次面紅起黎。

然而,因為極度頭痛嘅關係,韻喬再食咗粒頭痛藥,就直接上床休息。

(待續 ~)

IG link https://instagram.com/bear_big_big_writer
已有 0 人追稿