《愛在。貴族學園》: Ch 13 ~ 吵架 Part 1 + 百集感言

Ch 13 ~ 吵架 Part 1（連載日期：2022/03/09）

喺同韻喬收線之後，天殷、俊軒同禮謙佢地幾個，就好急咁行出校門。

不過喺上車之前，俊軒就同禮謙講「謙謙，你係咪未去過小喬屋企呀？」

「係呀，我怕我屋企個司機唔識路」禮謙點點頭道。

俊軒於是就話好快就話「咁你一陣上車之後同你司機講，話去一個同學屋企，喺北角渣華道，叫福生大廈。如果佢都係唔識路嘅話，你就叫佢跟住我同殷殷架車行就得咖啦」





「ok，我明白啦，咁一陣見啦」

大家上車之後，三家嘅座駕就一齊經由香港仔隧道開去北角。

雖然依家都已經有南港島綫，但係香港仔隧道都依然受紅磡海底隧道塞車影響，結果就自然係搞到間封啦。

但好彩佢地三個嘅車，都冇被隧道公司分開，可以貼住行。

當然，佢地幾個各自喺車上面，都顯得比較緊張，畢竟怕塞車塞得太耐嘅話，就會有多一份擔心韻喬嘅情況。





不過好彩，經過輕微嘅塞車，衆人嘅車都好快，各自去到福生大廈。

喺大家都齊集、各自吩咐自己嘅司機去搵地方擺低部車之後，天殷就同兩個男仔講「跟住我行啦」「嗯！咁我地入去啦」

天殷之後就停喺大廈大門嘅對講機前面，然後按下韻喬個單位….「喂，小喬，殷殷呀！我地幾個到啦，你開門畀我地啦」

「ok，度門開唔開到呀？」韻喬好快就問返天殷。

「開到啦，我地依家上嚟啦，唔該小喬！」「唔該小喬！」韻喬聽到之後就開定門畀佢地三個，同時都已經戴定口罩。





而喺經過尋日之後，俊軒都冇再唔習慣呢種香港典型住宅大廈嘅環境。

不過，今日唔習慣嘅，就到一直鍾意韻喬嘅禮謙，因為由落車去到依家喺大廈大堂裏面嘅時候，禮謙都一直不停咁喺度四圍望，感覺就好似非常不安同唔自在。

俊軒好快就記起尋日畀韻喬話自己離地嘅事，就同禮謙講……

「喂謙謙，你唔使咁緊張喎！依家我地又唔係玩咩迷離莊園，或者學校附近個大主題公園啲萬聖節鬼屋，唔會有嘢跑出嚟咖喎」

禮謙一臉茫然，轉身同俊軒講「下，你喺度講咩呀？我幾時有話怕呢啲嘢呀？」

「你唔使再掩飾啦，程禮謙！我知道你喺度諗緊咩」俊軒講道「因為……喺我尋日第一次，送小喬同學返嚟嘅時候，我都有好似有你依家呢種感覺咁」

「就係喺個腦裏面，你會質疑“點解小喬會住喺呢啲地方？乜係人住咖咩？“之類嘅感覺。不過一陣間你真係唔好畀小喬見到你依家個樣，不然佢一陣又話你就唔好啦」

其實喺講到一半嘅時候，佢地幾個已經入咗升降機裏面，準備上到韻喬屋企嗰層。





「我知道啦小軒，多謝你提一提我」俊軒冇再講太多嘢，而天殷就一直望住升降機個樓層顯示板，希望可以快啲見到韻喬。

“叮噹“升降機上到韻喬屋企嗰層，天殷就用一個小箭步，輕輕跑到韻喬屋企大門面前。兩個男仔都不敢怠慢，緊緊跟上天殷，免得天殷整親而受傷。

「喬喬！」天殷一見到戴住口罩嘅韻喬，就即刻同對方打招呼。

「殷殷！呃 hello俊軒、禮謙同學」韻喬嘅聲音依然非常虛弱，佢都有同俊軒、禮謙兩個打招呼「小喬！」

「你地除完鞋之後，再入嚟講啦」俊軒佢地幾個照住韻喬嘅意思，除好鞋之後先至入屋。

大家之後就去梳化嗰度坐。不過，喺韻喬除低個口罩飲水之後「陰功囉小喬，你係咪好唔舒服呀？」天殷見到韻喬之後驚呼道。

韻喬於是就好奇起嚟「嗯？做咩咁問呀殷殷？」





（待續 ~）

================================================================================================

百集感言

真係萬萬都估唔到，《愛在。貴族學園》咁快就連載到第一百集。不過都有少少嘢想同各位讀者分享下心底話。

首先第一件事，都係要同大家講唔好意思，因為都有讀者同我反映，話劇情去得慢，睇下可唔可以推返快少少個節奏。呢個我經過考慮之後，我承認係慢嘅，不過我之所以，可以將可能一件簡單嘅小事，都分兩集甚至三集出，都係因為我都想將一班角色嘅感情，可以寫得細膩少少，而且我都想喺寫嘅時候，喺腦海裏面浮現到個畫面，先會寫出黎，因為如果連作者本人，都唔可以透過自己嘅文字，去想象到應有嘅畫面嘅話，恐怕未免會有少少失敗。

不過，如果要考慮加長每個篇幅，去加快節奏減少集數嘅話，我都應該會考慮下，但其實都要視乎自己嘅伏筆會去到邊度……等等，都好難一概而論。

第二件想講嘅就係，主要都係想多謝大家，一直以黎對我嘅支持。畢竟我本身之前都未試過寫小説，而且唔怕同大家講，我中文其實真係唔係好好。所以一開始連載嘅時候，我都唔敢同太多人講，由其係身邊嘅人，所以初期嘅讀者，陌生人都佔去絕大部分。而令我意外嘅，你地當中有部分係其他作者，甚至有部分係已經出過書嘅，都令到我受寵若驚。

後來，經過呢一班讀者嘅支持同鼓勵，我先至敢同我身邊嘅人，開始提起呢件事。正如我喺上一段提及過，我中文其實唔係好好，但係我自己都覺得，中文當時唔好還唔好，但係都唔應該咁就一世。反而喺我開始執筆寫《愛在。貴族學園》之後，自己嘅中文能力反而仲好少少，畢竟我都要非常成功咁，將自己嘅諗法通過文字去表達。





所以佢地一知道之後，大家都好surprise我居然會成為一位作家，而且都成為我嘅讀者，去支持我繼續寫落去，呢個我都要特別多謝佢地。

最後，我都要多謝大家，一直嘅支持，無論你係喺邊一個平台或者渠道，認識《愛在。貴族學園》都好，我都真係要衷心同大家講多謝，真係冇你地嘅支持同鼓勵，我可能連呢一少少嘅成就，都未必可以達到。當然我自己都希望可以有更多嘅朋友，認識我嘅作品，同時我都唔介意大家會幫我宣傳。

至於加更嘅問題，相信過多幾日，就會到20萬總點擊嘅次數，不過呢D都係大家有份嘅，我都會想同大家分享我嘅喜悅。黎緊呢段時間，加更嘅條件都會有更改。但無論如何都好，我嘅初心，都係同當初一樣。

再一次感激不盡，希望大家都可以陪我，再過下一個一百集。

熊。大。大
《愛在。貴族學園》作者
2022年3月9日

IG link https://instagram.com/bear_big_big_writer