《愛在。貴族學園》: Ch 13 ~ 吵架 Part 4

Ch 13 ~ 吵架 Part 4（連載日期：2022/03/15）

「我……咪遲咗個幾鐘食藥咋嘛！有咩咁大不了喎！你地幾個一上到嚟就係咁不停喺度話我，到底算點喎？！」

俊軒聽到韻喬嘅狡辯之後，勃然大怒道「咩話？！遲咗個幾鐘食藥！張韻喬你真係呀，枉你讀咁多書成績又咁好，仲要係我地全校最傳奇嘅優等生，居然都唔知道唔可以遲食藥咖咩？你仲好意思反問我地幾個話遲食藥有咩咁大不了？！」

開始鍾意韻喬嘅俊軒，其實呢刻個心好痛，因為自己對韻喬都好緊張。但如果唔大聲嘅話，韻喬都未必知道問題嘅嚴重性。
 
「喂小軒，你冷靜少少先啦，不如你都聽下韻喬同學嘅解釋先啦，可能佢都係休息耐咗，所以先會遲咗食藥咖啫」禮謙拉住激動嘅俊軒，因為佢都怕俊軒同韻喬都咁激動嘅話，對韻喬嘅情況都唔係咁樂觀。





「林俊軒…..你……依家咁惡做咩喎？！我只不過因為個人攰，去咗訓教….所以遲咗少少咋嘛，咁病咗去訓覺遲食藥又有咩所謂喎？！我依家食返嘅話，又唔會死咗去嘅！」韻喬都好大聲一輪嘴咁講，之後就慢慢流下眼淚。

不過，天殷就發現，韻喬講完之後，塊面好紅，而且不停咁捽自己雙手，顯得非常緊張咁。

面對如斯尷尬嘅氣氛，天殷都被逼要出手調停，於是就叫俊軒暫時行埋一邊「乖啦小喬，小軒都係擔心你先會咁惡咖咋！」天殷安慰住喊緊嘅韻喬，同時都要抱住韻喬去安撫佢。

「咁又點呀？我又唔係…..佢邊個，佢….擔心我咁多做咩喎？同埋邊個畀你咁大聲同我講……講嘢咖死人頭！」韻喬又再斷斷續續咁，表達自己嘅不滿。
 
「因為你係…..算啦，依家最重要都係醫好你嘅病先病先。頭先我都係緊張你，所以大聲咗，對唔住」俊軒本來想趁機會表明心跡。





但覺得依家都唔係探討兒女私情嘅時候，所以都收返埋想講嘅嘢。同時因為啱啱自己嘅語氣重咗少少，搞到韻喬同大家咁尷尬，所以俊軒都同大家道歉。

過咗兩分鐘之後，禮謙非常冷靜咁，突然之間開口道「韻喬同學呀，不如呢，我地幾個依家陪你入醫院，check下你點解咩事先啦，因為你咁樣持續發咁高燒，其實係好唔正常，同時都對你個腦有危險……」

「而且你喺醫院嘅話，最起碼都叫做有姑娘可以無時無刻照顧你嘛，睇住你食藥同食飯，我們幾個先反而會冇咁擔心啊。」禮謙講完之後，天殷同俊軒都點點頭表示同意禮謙嘅説話。

「下，但係我唔想爸爸媽媽擔心我啊，所以我先冇講畀佢地知咋。」韻喬一臉擔心咁講「而且我入醫院嘅話我，怕佢地會冇心機做嘢呀，影響到就……唔好啦。」

「放心啦小喬，其實喺我地上嚟之前，我已經同Uncle Auntie講咗啦，佢地都覺得如果有需要嘅話，都希望你住醫院休息下」天殷道





「而佢地容許我地咁做嘅原因，就係正正因為佢地兩位，唔可以一時三刻就話返香港照顧你。但係，如果你去醫院反而冇咁擔心呀，咁先可以專心完成佢地嘅工作啊。」
 
「所以呢，你就乖乖地聽我地話啦，小喬，我地大家都真係唔想你有事。你都唔想你身邊嘅人，個個都喺度擔心你啦係咪？」經過頭先激烈嘅責駡，俊軒好溫柔勸韻喬聽話入醫院檢查。

韻喬考慮咗一陣就決定聽大家勸告「既然你地都咁講，咁好啦，我入醫院啦，怕咗大家啦…..」

「咁咪好囉小喬，大家都唔使擔心你啦，又可以有人照顧你」天殷微笑道。

「今次…真係麻煩到大家啦！真係好對唔住！」韻喬再一次同大家道歉。

大家笑一笑，同通知各自嘅司機準備開車之後，就幫韻喬執一下簡單嘅行李，然後韻喬就坐李家嘅座駕，直去灣仔律敦治醫院。

而至於兩個男仔，就帶同韻喬嘅行李，坐返自己嘅座駕過去醫院會合。

（Ch 13 吵架 ~ 完）





IG link https://instagram.com/bear_big_big_writer