《愛在。貴族學園》: Ch 14 ~ 入院 Part 4

Ch 14 ~ 入院 Part 4（連載日期：2022/03/23）

「其實都係我唔好，所以先會搞到依家咁，真係好對唔住大家」上面一句係韻喬講嘅

「唉呀，咁客氣做咩呀小喬，最緊要依家都係養病啫，其他嘅事例暫時就唔好顧慮太多啦」俊軒嘅窩心回應，都令到韻喬塊面更加紅。
 
正如先前講過，韻喬張肺部x-光好快就有結果，然後一個喺敲門之後就入咗嚟。

四位學生於是就望住眼前嘅年輕女醫生「請問你叫咩名？」





「張韻喬」同時醫生都檢查一下韻喬右手上面嘅病人手帶，之後先再開始講……

「韻喬同學你好，我係呢個病房嘅駐院醫生，我姓梁。張x-光片頭先我已經睇過咖啦，就照到你個肺有啲花嘅部分喎，即係代表你有肺炎啦，相信頭先觀察病房嘅醫生都同你講過咖啦」

「係，我明白……」韻喬聽到之後，又係頭耷耷咁。至於俊軒佢地就喺旁邊聽。

「所以韻喬你需要要吊幾日鹽水，同時我地都會用針藥去治療。一陣間姑娘就會入嚟，幫你整個吊鹽水同打針藥嘅痘痘。」

「同時都因為你要吊住包鹽水嘅關係，所以你暫時唔可以沖涼住，只可以抹身，直到你吊完鹽水為止。」
 




「下梁醫生，唔打針得唔得呀？而且幾日唔可以沖涼，我個身咪會好臭囉？」韻喬嘟起小嘴咁望住梁醫生銅買俊軒講，好明顯就係想扭計唔打針。

天殷佢地幾個聽到韻喬咁扭計，就覺得好好笑，完全係一個小朋友咁。
 
「打針快啲好呀韻喬，而且你想唔想快啲好返出院，然後同同學一齊上堂？」梁醫生笑笑口咁，安撫扭計唔想打針嘅韻喬

「至於抹身嘅問題，其實你想抹嘅話，只要你撳個call bell，叫姑娘幫你就得咖啦。」

「不過你都知道啦，醫院嘅人手都唔係話太足夠，我地病人又多，所以可能都要等一等先有人」梁醫生道「不過我覺得，一係你依家趁未吊鹽水之前沖咗涼先，轉頭撳鐘叫姑娘同你整痘痘啦」





「好，唔該梁醫生」韻喬感謝道。
 
梁醫生好快都注意到天殷佢地嘅存在，於是就問「請問你地幾位，都係病人嘅同學嚟？而且都係你地送病人入嚟？」

「係呀醫生！」俊軒、天殷同禮謙三個一齊講。梁醫生跟住就話「既然係咁，我都同你地幾個簡單交代一下韻喬嘅情況先，等你可以同病人家屬同埋老師交待返」
 
「好嘅，唔該醫生你」俊軒代表埋天殷、禮謙回應「唔使客氣。正如我頭先講過，依家韻喬患有肺炎，咁一定要住幾日醫院喺度醫病咖啦。咁我會想你地幾位，每日都安排少少時間過嚟探佢。」

「當然，如果你地要帶功課、筆記過嚟俾韻喬繼續溫習嘅話，其實都可以嘅，但係test卷就真係唔好啦，因為病人喺醫院都需要休息，暫時唔好安排太過緊嘅時間表畀病人佢」
 
「至於想了解韻喬病情進展嘅方面，如果想了解嗰陣而醫生又唔喺度嘅話，你地可以直接去護士站搵姑娘就得。當然就唔好派藥嗰陣去搵佢地，因為派藥嘅時候，姑娘都會好忙」

「而且打擾到佢地嘅話，可能會令到佢地出錯，到時候如果因為做錯嘢，令到有醫療事故發生而引致嘅disclipinary action就唔好啦。」

「醫生大致上要講就係咁多啦，你地仲有冇其他問題？如果冇嘅話，我出去做嘢先啦」梁醫生道。




 
「冇啦，唔該醫生」三人回應。「呀仲有，一定要記得你地嚟探病，同埋進入、離開病房前後，都一定要上戴外科口罩，同埋徹底清洗雙手，如果唔係醫院好多細菌病毒，感染到自己同其他病人就麻煩啦」梁醫生再吩咐之後就行開咗，留返佢地幾個喺病房裏面。

（待續 ~）

IG link https://instagram.com/bear_big_big_writer