《愛在。貴族學園》: Ch 15 ~ 告白 Part 14

Ch 15 ~ 告白 Part 14（連載日期：2022/05/04）

天殷冇直接回應俊軒，但係就轉到另外一個話題，一個非常尷尬嘅話題「喂你地兩個，今日咁快同咗小喬表白啦？」天殷一邊倒水一邊問兩個男仔。
 
「係啊！……咦喂！咪住先！點解天殷你又會知，我同小軒今日都有同韻喬同學表白嘅？係咪韻喬同學頭先同你講咖？」聽到天殷咁嘅問題，禮謙就好驚訝咁反問對方。
 
「係呀，咪就係頭先喺醫院幫小喬抹完身嗰陣，我見到小喬好似心事重重咁，於是我咪問下發生咩事囉，然之後小喬就同我講哂成件事啦」天殷形容返頭先喺病房裏面同韻喬嘅對話

「原來係咁，不過小喬又會咁快就同你講嘅？」俊軒都表示不可思議。
 




「點解唔會呀林俊軒？！因為小喬肯定就係畀你地兩隻嘢嚇親啦，所以先會咁快同我求救啦啦哈哈哈！」

「但係個答案呢…..有少少出乎本小姐意料之外喎！」天殷有少少賣關子咁同俊軒、禮謙講。
 
「下？點解咁講呀殷殷？」畀天殷成功吊癮嘅禮謙，忍唔住即刻追問天殷，搞到天殷喺冲涼嘅時候，差少少就想笑出聲。
 
「嗱，喺我講之前，不如你地都同我講下，到底你地分別同小喬講咗啲咩先啦！冇可能得我一個講，你地就喺度聽咁唔公平咖喎！」八卦嘅天殷就扮哂嘢，以公平為由反問男仔爆料，於是兩個男仔都同天殷講返頭先表白嘅經過。

「原來呀，不過聽你地咁講，今次林二少你包裝得幾好呀！唔錯唔錯，果然有進步呀下！今次終於唔係冇鬼用啦」天殷聽完之後以呢句總結，同時都再一次暗寸俊軒上一次冇料到。
 




俊軒於是就好尷尬咁以笑遮醜，但天殷好快就講出韻喬嘅意思「嗱，你兩個同我聽住啦下，我只係講一次咖咋。」

「小喬呢，聽完你地咁樣表白之後，就當然係好愕然啦下，因為佢就一路都只係當你地兩個係朋友，但係當然，我唔知依家小橋點樣諗俊軒你啦」

「既然係咁，於是我再追問落去，問喬喬如果將對朋友嘅鍾意都當係嘅話，喬喬會點揀。結果喬喬居然同我講，話咁樣就鍾意……禮謙多啲喎！」天殷再繼續將埋落去。
 
「Yes！嗱學霸軒，你聽到啦，我一早都話韻喬同學會鍾意我咖啦！天殷麻煩你幫我多謝佢先」禮謙認叻咁講，但係天殷心裏面就再一次非常之唔好受，而俊軒佢都冇再出聲。
 
「不過呢！我未講完…」天殷特別强調呢兩個字，自然就引起兩個男仔嘅注意......





「點呀天殷同學？」「殷殷你就快啲講啦，好緊張呀！」

「我自己反而覺得，小喬其實會鍾意俊軒多少少，只不過係因為喬喬佢唔知道咩叫做鍾意，所以先會咁樣講」
 
「哈哈！頭先認叻認唔切吖啦，依家有人仲唔灰到爆咩！」俊軒借天殷嘅說話反將禮謙一軍，搞到禮謙心裏面完全不是味兒，所以就問天殷「但點解你會咁講？天殷同學」
 
「其實好簡單咋嘛！平時大家細心啲嘅都應該會注意到，因為喺俊軒同小喬傾計嘅時候，佢地嘅内容同語氣都比較生動，雖然好多時候佢地都好似喺度嗌交咁……」天殷回答道。

「反而喺同謙謙你傾計嘅時候，謙謙講嘢有時候比較公式化，畀人感覺好似有少少悶蛋嘅感覺。」

「所以謙謙你喺呢一方面，真係要再加油，試下講嘢生動有趣少少呀，雖然你呢種謙謙君子嘅風格，都會有女仔喜歡嘅…」天殷有意無意咁同禮謙表達自己嘅感覺。

「知道啦天殷，我…我會慢慢改咖啦！」禮謙終於都踏出第一個嘗試，喺答天殷嘅時候，收起“同學”兩個字，搞到天殷都忍唔住講一句「乖啦」回應。
 
「好啦，我唔同你地講啦，我想自己慢慢嘆下bath bomb先。喂你聽日上嚟之前，麻煩喺Signal裏面話我知呀，俊軒」天殷叫道





「我知道啦，咁唔阻你啦！聽日見！拜拜」俊軒道。

「bye天殷」三人通話就係咁結束。

（待續 ~）

IG link https://instagram.com/bear_big_big_writer