Ch 15 ~ 告白 Part 15(連載日期:2022/05/06)

至於喺律敦治醫院内科病房裏面,繼續留醫嘅韻喬,就因為今日兩個男孩突然對自己表白而訓唔着。
 
「呀!點解佢地兩個都會同一時間鍾意我咖?我到底又有咩吸引力,可以一次過吸引到兩個富家公子呀?」

「會唔會其實有一個係假嘅?我到底自己係咪鍾意禮謙多過俊軒?定係其實應該好似天殷所講,我係鍾意俊軒多啲?啊,好煩呀好煩呀!…….」
 
雖然韻喬不停咁喺度問自己,但係問極都搵唔到答案,結果喺張床上典咗差唔多成三四個鐘,先至因為攰得滯而訓得着。





但結果當然到第二日,喺醫生巡完房之後,韻喬再一次倒頭大睡。
 
到咗星期六嘅下晝,俊軒自己首先過咗去九龍,處理自己嘅私人事。

至於天殷,就喺溫書溫到差唔多兩點半,就換衫同執袋準備出門口,等林家座駕嚟接自己去探韻喬。
 
去到差唔多三點鐘,俊軒就打電話畀天殷「喂殷殷啊」

「軒仔你點呀?」天殷都好快就接咗俊軒嘅電話「我大概仲有15分鐘左右,就會去到你屋企出面,你準備好行得未咖?」俊軒直接問。
 




「我隨時都可以行得咖啦。不過呢,我地要唔要去買嘢食畀小喬做晚餐呀?」

「因為小喬頭先同我講呢,話佢喺醫院絲嗰啲飯冇味,覺得好dry,想食一餐街外嘢喎」天殷答俊軒嘅同時,又提出一個問題。
 
俊軒諗一諗之後,就話「都好呀,反正小喬都唔係話要點戒口,咁我地一陣喺車度再傾下買咩畀小喬食啦,好嗎?」

「嗯嗯!就咁決定先啦!咁我坐定喺大廳度等你啦,一陣見!」

「ok, bye!」天殷於是喺同俊軒收線之後,就落去大廳度等俊軒。





喺等嘅時候,李太都有問到韻喬嘅病情,而喺天殷講話韻喬嘅病情有進展之後,都表示高興,同時都有祝韻喬找人康復。

唔使好耐,林家嘅座駕就到達李家大宅,接天殷去律敦治醫院「小姐,林家嘅座駕到咗啦」「知道!唔該你蕭管家,媽媽我行啦,再見!」

「小姐再見!」「再見啦乖女!」天殷之後就帶住裝有功課嘅袋,行出大宅,登上林家座駕。
 
「Hi殷殷!」「喂軒仔,今次真係唔該哂你呀!仲有林家嘅司機上嚟車我!」天殷好有禮貌咁對俊軒同林家司機講。

「唔使客氣啦天殷小姐,但係兩位請記得扣好安全帶」喺坐穩之後,林家司機就開車,向觀塘方向開去。

「喂殷殷,你有冇諗過同小喬食咩呀?」俊軒第一件事就問天殷意見。

「嗯,一係食南記囉,我覺得佢啲春卷真係好正!」天殷好快就畀出一個答案,而且仲非常正經咁,搵論點支持自己嘅理由

「而且小喬依家仲未好返哂,雖然唔使點戒口但係都有好多嘢都唔可以食,由其係生冷野」




 
「所以咩煎炸呀、壽司呀、熱氣嘢,小喬全部都唔可以掂」

「嗯…你咁講都係嘅,不過,如果係湯粉麵嘅話,對小喬會唔會有少少dry呀?始終,粉麵其實出面食,應該同醫院差唔多掛?」俊軒反問天殷。
 
「但係醫院餐嘅味道為咗病人健康而整得好淡,就算都係一碗粉麵,都可以同出面差好遠咖喎!」天殷一邊照鏡一邊反駁俊軒道

「你估公立醫院啲飯,會好似我地住私家醫院咁好呀,連鮑魚都有你得食咩?林二少!」
 
俊軒完全駁唔到,畢竟天殷所講嘅都係事實,佢地自己嘅際遇,實在比出身平民嘅韻喬,實在喺好命得太多。
 
俊軒再考慮多一陣就話「司機,麻煩車我地去律敦治醫院最近嘅嗰間南記啦」

「知道,二少爺!」司機聽到俊軒嘅要求,就將車開向東隧。好快,司機就將座駕開到灣仔春園街嘅南記……





俊軒同天殷兩個人,就買埋佢地自己,仲有韻喬同禮謙兩個嘅晚餐,喺等完一輪之後,佢地兩個先再次上車,直切去律敦治醫院。
 
「喂小喬?我同軒仔買完今晚嘅晚餐,依家過緊嚟醫院咖啦,一陣間見啦!」天殷見差唔多到醫院,於是就打電話畀韻喬,通知對方話自己就快會到。
 
「好呀,今次真係麻煩你地呀殷殷,我真係好悶好悶呀!」電話裏頭嘅韻喬,聽到天殷嘅電話就好興奮,但同時都喺度扭計「唔知你地兩個可唔可以快少少到呢哈哈哈!」
 
「司機呀,求下你呀快少少少少少得唔得?因為張家大小姐話好悶,話想個“男朋友”可以快少少到醫院陪佢喎」

俊軒聽到韻喬嘅説話之後,就同司機講,當然俊軒都要繼續之前呃大家嘅演出。

(待續 ~)

IG link https://instagram.com/bear_big_big_writer
已有 0 人追稿