《愛在。貴族學園》: Ch 16 ~ 麻煩的一天 Part 1

Ch 16 ~ 麻煩的一天 Part 1（連載日期：2022/05/16）

就喺韻喬繼續留院嘅同時，Form 5A 嘅班房繼續過住冇韻喬喺度嘅日子，但大家都開始慢慢咁習慣。

不過都總有其他同學，包括隔離班一直留意開韻喬嘅同學，都依然會同俊軒、天殷、禮謙佢地，問候一下韻喬嘅情況。
 
而同時，因為上學期都已經過咗一段相當嘅時間，各科嘅老師都開始加強力度，去谷Form 5嘅學生，功課、quiz全部都排山倒海一湧而至。

結果喺老師嘅壓力之下，韻喬最後都要喺醫院做quiz，然而之前梁醫生有叫過俊軒佢地要畀韻喬休息，而嚴禁喺醫院做quiz。
 




「5A張韻喬：殷殷，醫生巡完房話我聽日可以出院啦！        21:46」就喺星期二夜晚9點幾，喺醫生巡房過後，韻喬就喺Signal度通知天殷。

而天殷見到之後就秒回韻喬......
 
「5A李天殷：Yeah！喬喬終於好返可以出院啦！        21:47」
「5A李天殷：咁聽日放學之後我地過嚟接你啦！       21:48」
 
不過韻喬就唔係咁諗啦……

「5A張韻喬：下唔好啦殷殷，你地如果唔得閒嘅話，我可以自己返去咖，我唔想再麻煩到大家           21:49」




「5A張韻喬：呢一段時間要你地日日都上嚟睇我，又要幫我做跑腿，我真係覺得唔好意思！             21:49」

「5A李天殷：唔好咁啦喬喬，你啱啱先好返咋，唔可以太過操勞咖！等我一陣叫埋兩個男仔都嚟幫你手啦！        21:50」

「5A張韻喬：咁好啦，唔該哂你地先啦        21:50」

「5A李天殷：唔好客氣啦，咁我一陣同佢地講聲先！另外，我聽日返到學校，都幫你通知Ms張啦！         21:51」

「5A張韻喬：好嘅，唔該殷殷。我休息先啦，聽日見啦          21:52」





「5A李天殷：聽日見，good night        21:53」

講完之後，天殷就將韻喬可以出院嘅消息，通知俊軒同禮謙。而兩個男仔知道之後都表非常示樂意幫忙，甚至更將原本嘅安排更改，方便自己可以陪到韻喬出院。
 
於是到第二日返學點名嘅時候......

「Ms張，張韻喬同學尋晚同我講，話今日下晝會出院，如無意外，張韻喬同學聽日應該會返學。佢叫我通知一聲你。」Ms張一開始點名，天殷就第一時間舉手，將呢個好消息同全班講。

Form 5A其他同學聽到都好開心，畢竟韻喬除咗因為外貌討好而人緣甚佳之外，更重要嘅係，都係因為可以參考功課同埋Carry大家嘅quiz。
 
「好，唔該你，李天殷同學。不過，麻煩你你幫我同張韻喬同學講聲，如果張韻喬同學想休息多少少時間嘅話，唔差在放多一日病假，喺星期五先返學都唔遲」Ms張聽到之後都好帶有微笑咁講。

其他同學聽到Ms張會咁慷慨咁，容許班上嘅天才放咁多日假，都表示非常羡慕但同時又冇妒忌。

天殷聽到Ms張嘅説話之後，就點頭表示知道「明白，咁等我喺放lunch嘅時候，我再同張韻喬同學商量，睇下佢會想點樣安排呢件事，唔該哂你先Ms張！」




 
至於之前一晚已經知道消息嘅俊軒同禮謙，各自心裏面都非常淡定。

不過，兩個人喺對到眼之後，就互相鄙視對方，畢竟大家過去一段日子，都經常喺韻喬背後互相傷害。

而喺放學之後，天殷佢地三個好快就去到locker放好書，然後一齊坐的士出去律敦治醫院，畢竟佢地覺得三個人開三架車會好浪費。

喺車上面，天殷就好語重心長咁同兩個男仔講「小軒、謙謙，我知道你地兩個最近都一齊追緊喬喬。雖然兩個男仔同時追一個女仔，一定會有競爭，有贏有輸。」

「但係你地兩個爭還爭，千祈唔好再搞出會傷害大家感情嘅事，我唔想小喬因為你地兩個為佢互相反目成仇而感到唔開心…」

「其實我都知道你地呢幾日，都冇再一齊去探小喬，我希望你地兩個一陣去到醫院之後，麻煩都好似之前咁樣相處，知道未？」

「知道！」畀天殷隔開嘅俊軒同禮謙都表示明白。





（待續 ~）

IG link https://instagram.com/bear_big_big_writer