《愛在。貴族學園》: Ch 15 ~ 告白 Part 18

Ch 15 ~ 告白 Part 18（連載日期：2022/05/13）

「好啦你地兩個，唔好再成日喺度大鬥法啦，喺學校又係咁，出到嚟醫院又係咁，如果我地唔係清楚大家一直以來嘅關係嘅話，其他人可能都會以為喬喬你喺度教訓緊自己個男朋友呀！係咪呀謙謙？」

不過，喺旁邊睇住嘅禮謙，見到俊軒同韻喬嘅互動咁有趣同埋真實，心裏面完全不是味兒。

但禮謙又要保持一貫嘅風度，避免呢間房裏面嘅其他人因呢少少事而搞到大家唔開心，於是禮謙都只係非常簡單咁微笑回應天殷。

但係，韻喬就好大反應啦，又一次喺病房裏面大叫話「車！我先唔會畀呢個成日話我暴力，又花心嘅人做我男朋友呀！你……你要做我男朋友嘅話，就麻煩喺學校排隊填表，然後等通知interview啦！」





其他三個人都喺度笑，但韻喬對俊軒笑就好大成見……「笑笑笑！笑咩呀？仲要笑到咁猥瑣！」

「冇呀，我覺得你可愛呀嘛！」俊軒講緊嘅時候，醫院嘅職員就將飯，送入韻喬嘅病房度，於是佢地四個人就先執枱，然後再一邊食飯一邊傾計。
 
「Yeah！今日有南記食！好掛住啲春卷呀！我唔客氣啦！」韻喬一打開個盒，見到裏面啲春卷之後，就即刻咬一啖...

「嗚呀！街外嘅嘢食，真係好食好多呀！頭先真係唔該你兩個呀，殷殷、小軒！」韻喬非常感激咁講，而且仲開始流眼淚。
 
「下張韻喬你唔好咁誇張啦！！呢度就好普通一碗嘅湯麵咋喎，你使唔使咁快就好食到好似好耐冇嘢食咁，流哂眼淚呀小喬？」天殷略帶諷刺嘅語氣講。
 




「哈！你地班有錢仔女，點會明我地啲貼地階層講咩呀！」韻喬反諷道「如果你地想知嘅話，你地就夾一塊自己試下，自然就明我講咩咖啦！」衆人於是夾起韻喬指住嘅醫院餐，然後再放入口。

但到最後，佢地都得出一個結論「搞錯呀，都冇味嘅，完全唔知自己喺度食緊咩......」俊軒先放低筷子抱怨道。
 
「都話咗你離地咖啦少爺仔！咁你地依家明點解我會覺得碗南記好食到喊啦？」韻喬又一邊咬春卷一邊好諷刺咁講「春卷真係正！真係食幾多都唔會厭！」
 
「我完全明白呀小喬，好心我地香港特區政府，就投放多啲錢落嚟醫院啦，改善一下醫院嘅環境，好過走去搞咩美化街邊鐵欄，又或者無端端幾千萬，喺觀塘起個有泡就壞嘅爛鬼噴水池啦」禮謙今次好認真咁，直接批評政府亂洗錢。
 
大家聽到之後都喺度笑「謙謙呀，既然你咁有政見，你第日係咪諗住大個之後，要唔要考慮下出去選立法會呀？哈哈我搞笑咋！勿認真！」天殷趁機串下呢位身邊好友「但係如果你真係選嘅話，我都一定會支持你咖！」
 




「呃…呢啲到時先算啦天殷同學，到我地大個嗰陣，香港都唔知會變成點啦。可能到時候我地選都冇得選，全部都係熊爺話事呢？」俊軒繼續就政局，喺病房裏面爆seed咁講。
 
「食嘢啦你，唔好咁多嘢講啦！」韻喬知道，醫院並唔係高調談論政局嘅好地方，於是好果斷咁截停呢個話題。

喺食完飯之後，大家都繼續喺度討論功課之餘，都喺度吹水，直到醫院嘅探病時間完結為止。但係，佢地都冇再提到表白嘅事。
 
之後嘅幾日，因為佢地三個各自都有嘢做嘅關係，所以佢地都要分別去醫院探病。

而同時間韻喬都慢慢繼續好返，於是到星期一下晝嘅時候，喺梁醫生檢查完之後，話韻喬唔使再吊鹽水，但依然要接受針藥治療。

於是韻喬聽到之後都好開心，同埋相對要吊鹽水之下，韻喬都可以有更多空間自由走動，同埋至少韻喬都可以冲涼。

但韻喬並唔知道，喺自己康復嘅同時，兩個男仔之間嘅關係，都隨住呢幾日嘅時間而起咗變化……

一個唔係太好嘅變化……只不過大家都唔想韻喬擔心而冇出聲……





（Ch 15 告白 ~ 完）

IG link https://instagram.com/bear_big_big_writer