Ch 16 ~ 麻煩的一天 Part 6(連載日期:2022/05/27)

「咦,張韻喬同學你返嚟啦?唔知道你嘅康復進度如何呀?」Ms張問。

「係呀,Ms 張,因為醫院都見好得八八九九,所以就放我出院。而我見到今日自己都幾精神,所以咪返學囉。但係我都好多謝Ms張同埋大家,呢個幾禮拜對我嘅關心。」韻喬再一次感謝大家嘅關心。
 
「咁就好啦,不過你之後都要好好照顧身體,天氣轉涼啦,希望各位同學都唔好冷親,知道未?」

「知道啦!」全班同學回答道。



「呼!過咗一個禮拜5A都終於叫“齊人”啦!」Ms張又載講「張韻喬同學,麻煩你將醫院開畀你嘅假紙交出嚟畀我,我一陣間幫你交埋落去office。」

「知道啦Ms張…」於是韻喬就行出自己個位,將出院紙交畀Ms張。
 
Ms張喺睇過係咪屬於韻喬之後,就問韻喬「咁你有冇留低一份copy畀自己呀,韻喬同學?你都知你自己幾咁大頭蝦咖啦……」

全班聽到Ms張咁講之後於是都笑出嚟,而韻喬就顯得非常尷尬,面都紅哂,但唯獨俊軒今次冇笑得咁誇張。
 
「有……有呀Ms張,醫院嘅姑娘喺我出院之前,已經幫我影定一份,而且我都好多謝姑娘呀,因為由我尋日出院到依家,我都仲未見到有影印機-,-所以多謝你提點啦Ms張!」韻喬非常尷尬咁答。



對於連班主任都知道自己係一個大頭蝦之後,韻喬基本上都欲哭無淚咁,頭耷耷咁行返埋位。
 
「(喬喬呀,對於依家全班都知道,你唔識照顧自己,係一隻真材實料嘅大頭蝦,請問你有咩意見想發表咁咖?)」天殷細細聲咁喺韻喬嘅耳邊補刀,然後用手扮記者揸住支咪,喺度訪問對方。
 
韻喬聽完之後,塊面就已經紅哂,好誇張咁喺度講「(搞錯呀,超mean囉你李小姐!我知道我自己係好論盡,我真係會改咖啦!但係你都唔好再喺度抽我水啦,就快成包鹽水都畀你抽乾啦!)」
 
「哈哈哈……」天殷笑到成個趴喺枱度震哂,搞到韻喬完全冇乎咁坐喺度。

而喺同一時間「(小喬早晨呀,其實你係咪真係好返哂咖啦?因為當初聽到殷殷話你肺炎入院,然後呢個幾禮拜都唔見你,真係擔心死我啦!)」坐喺旁邊嘅文曦好緊張咁追問韻喬。
 


「(有心啦,雖然我依家都仲食緊藥,但係我真係好返咖啦。放心啦文曦,我都係因為有殷殷、俊軒同禮謙三個同學,仲有醫院嘅醫生、護士都照顧得我好好,所以我先可以好得咁快咋!)」韻喬露出佢迷人嘅微笑回答道。
 
「(哦,聽到你咁講就好啦。不過俊軒同……)」「shhhh….」天殷呢個時候即刻掩住文曦個嘴,打斷咗佢嘅說話...

「(我地都係上堂先啦,冇事呀小喬!)」天殷再同韻喬講「哦!好呀殷殷……」但係天殷都注意唔到,韻喬塊面嘅表情,已經有輕微嘅變化……
 
聽到天殷呢句說話,就算係小學雞,都知道一定有嘢啦,更何況係全級考第一嘅超級高才生,又點會唔知道呢句嘢係幾假呢?所以韻喬都喺心裏面,有無數嘅疑問湧出心頭…

“有事就一定有咖啦,而且係同小軒個衰人有關嘅?到底仲會關邊個事呢?而且又會關於啲咩呢?咁點解殷殷又要出手,阻止文曦繼續講落去呢?而最重要嘅係,到底5A呢幾日又發生過咩事呢?”
 
一連串嘅疑問,都喺韻喬嘅腦海之中揮之不去,再加上啱啱先好返嘅關係,所以基本上韻喬都好難集中精神上堂。

而且聽完文曦咁講,都令韻喬覺得一場大戰會一觸即發。但由於自己冇主動權嘅關係,於是韻喬都決定見步行步。
 
結果就喺小息嘅時候,天殷因為有事,所以好快就去教員室搵老師,而禮謙喺等老師一離開班房嘅時候,就即刻跑去韻喬個位,然後就話「小喬,話說你都幾日冇返學啦,今日……不如你同我食lunch吖,好唔好呀?」


 
俊軒見到禮謙一打鐘就立即采取主動,即刻面露不悅,於是決定打個快速反攻,就跑去韻喬個位度講「no no no,小喬呀,我都見你咁耐冇返學,今日你都應該同我一齊食lunch啦!」
 
兩個好朋友就開始互相敵視對方,而且眼神非常凌厲。周圍嘅同學都覺得,俊軒同禮謙呢股氣場有啲可怕。

於是大家都唔敢出聲,部分同學甚至以離開班房嘅方式嚟逃避“戰火”。而韻喬喺心裏面都開始估到,頭先文曦同自己講嘅說話係咩意思。

(待續 ~)

IG link https://instagram.com/bear_big_big_writer
已有 0 人追稿