《愛在。貴族學園》: Ch 16 ~ 麻煩的一天 Part 7

Ch 16 ~ 麻煩的一天 Part 7（連載日期：2022/05/29）

（Penana 400喜歡加更，多謝大家過去一段日子嘅支持，希望可以好快喺Penana到有500喜歡，到時候再加更）

禮謙於是就開始扭計話「小喬呀！嚟啦！今日就同我食啦！第一日復課咁重要嘅日子，當然係留畀我啦！」

俊軒聽到於是都反擊話「小喬，唔係呢，話哂之前我都花咗咁多時間教你功課喎，你唔係應該要同我食好啲咩？…..」
 
兩個死黨繼續爭奪同韻喬兩個人食飯嘅權利，你一言我一語咁，喋喋不休，而且各不相讓，基本上就差少少就可以開拖。
 




對於兩個男仔可以喺隔咗一晚嘅時間裏面，由好朋友變成咁，所以韻喬都忍唔住問佢地兩個「呃，你地兩個喺度做咩呀？我地唔係不嬲都係四個人一齊食開咖咩？做咩我一返嚟之後，你地就奇奇怪怪咁？」

但兩個男仔冇理到韻喬，繼續要求韻喬同自己單獨食lunch。
 
韻喬初時都覺得受寵若驚，畢竟一直都係覺得，自己當俊軒同禮謙都只係好朋友，而韻喬同時都覺得，一男一女單獨食飯，都只係情侶先會做嘅事。於是韻喬為咗避免大家誤會，先會喺心裏面都想話四個人一齊食。
 
不過，因為喺俊軒同禮謙兩個不斷催促同轟炸之下，韻喬終於都覺得，兩個人開始係有惡意咁，要自己選擇同邊個男仔食飯，於是就心諗......

“你兩個男仔都唔知喺度搞咩？！真係煩死本小姐啦！而且佢地一定要我二揀一下話？好，就畀多三十秒時間你地，睇下你兩個識唔識睇我面色做人先！”





於是，韻喬就冇出聲，但係就黑起自己嘅口面。不過，俊軒同禮謙兩個，都觀察唔到韻喬面部表情開始有微妙嘅變化，只係繼續你一言我一語咁互相爭奪韻喬。

韻喬見佢地兩個都仲係咁，於是就真係嬲啦，先同自己講“好，既然兩個都唔理我吖嘛！今次我就一於兩個都唔陪，睇下你兩隻嘢仲爭唔爭！“於是韻喬就鼓起泡鰓話……

「夠啦！好嘈好煩呀你地兩個！！即刻同我停呀！！！點解……點解我一返嚟，就一定要我揀其中一個單獨去食飯呀！？」韻喬好大聲咁講，基本上成個班房都聽到哂，所以大家都望住韻喬。

俊軒同禮謙就即刻停口，好愕然咁望住嬲到出面嘅韻喬。但韻喬就冇理佢地，繼續喺度講......

「頭先我問你地兩個啊，點解唔好似一直以來咁，四個人一齊食lunch，我都被人放置play！你地兩個就不停咁喺度嘈嘈嘈，你兩個到底有冇尊重過我、理過我嘅感受咖！？」面對韻喬突然爆seed，俊軒同禮謙都低頭不語。
 




不過，佢地兩個隔咗好耐都冇出聲「咁點呀你兩個，仲一唔一齊四個食飯咖？」韻喬繼續嬲爆爆咁問，嚇到兩個男主角都繼續唔敢出聲。

於是韻喬都失去耐性，好大聲話「唔答啦嘛？既然係咁，今日我就兩個都唔會陪！我自己會同殷殷兩個食飯！That’s It！」

俊軒同禮謙喺聽到韻喬嘅決定之後，面上都流露出一個不能相信嘅表情，於是一齊反問嬲到面紅嘅「小……小喬，你話咩話？！你唔同我食？」同時間韻喬就坐返喺自己個位上面，嬲爆爆咁唔出聲坐喺度發脾氣。
 
但兩個男仔問完韻喬，兼且得唔到韻喬嘅回應之後，佢地都再次互相用眼神鄙視對方，佢地兩個依然認為係對方錯先，所以先會形成如今兩敗俱傷嘅局面。
 
當然，韻喬都意識到兩個男仔嘅諗法，於是用一個居高臨下嘅語氣，企起身反問兩個男仔......

「唔同你地兩個食咪唔同你兩個食囉！你地好巴閉呀依家？！我鐘意今日剩係同我嘅殷殷食飯，可以兩個girls’ talk呀，咁係咪有咩問題呀？！」

「冇……冇問題，呢個係你嘅自由…」「我都冇問題呃！」面對突然如此強勢嘅韻喬，俊軒同禮謙都不敢多言。
 
「冇問題就得啦！咁今日你兩個自己食Lunch la！係咁！！」韻喬一邊講一邊行去洗手間，而俊軒自己走出班房發夢。至於禮謙就返埋自己位休息。





但係佢地三個人塊面都黑到不能再黑，完全係話畀其他人知係生人勿近嘅狀態咁。

（待續 ~）

IG link https://instagram.com/bear_big_big_writer