《愛在。貴族學園》: Ch 16 ~ 麻煩的一天 Part 21

Ch 16 ~ 麻煩的一天 Part 21（連載日期：2022/06/29）

點知，聽完天殷咁講，韻喬就好大反應「你唔好再玩啦李天殷，我點……點會鍾意嗰個花心flirt女王呀！？我都已經講……講過好多次啦！而且，個衰人仲要我…我一直幫佢講大話呃Auntie，你話嘞，我點會鍾意佢呀？！」
 
「我唔係玩呀張韻喬，因為喺你地兩個之間對話嘅嗰個感覺，比起你同謙謙之間，係明顯多啲feel同生動啲咖喎。乜你自己唔覺得咖咩？」天殷好認真咁反駁。
 
「呃……咁我自己又冇太留意喎，就算我對你都可以七情上面咖啦！點會又會係鍾意呢？」韻喬一時間都唔知點反應...

「不過，如果你真係要我由朋友嘅關係，跨到上去情侶關係嘅話，我自己覺得好似有少少難囉，至少我都需要時間調整心態。」
 




「咁又係啊喬喬，真係唔好為拍拖而拍拖呀。所以我先至叫你自己諗清楚，到底鍾意邊個先好發展落去呀！至於我呢，額，係囉，我都係慢慢等下就算啦…」天殷喺講最後一句嘅時候，語氣中流露出一種失落嘅感覺。
 
「慢慢等咪慢慢等囉，拍拖呢樣嘢，我就真係唔急啦，順其自然就算啦，大家都係將精神focus 返喺DSE先囉。」一向讀書之上嘅韻喬又喺度講。

但天殷又好似少女懷春咁講「但係……我都想試下，着住校服拍拖呢種感覺喎……」

「哈哈，咁咪學你話齋，如果搵到一個啱feel嘅，咪試下拍下拖囉！」講完之後然後韻喬睇一下表「咦，乜原來成十點咖啦？殷殷呀！我諗我要返去啦，聽日我地仲要返學咖！」
 
天殷於是都睇下電話「啊又係喎！哈哈哈，開心嘅時間原來真係過得咁快咖喎！咁喬喬你執好嘢先啦，然後我同你一齊坐我屋企車返去北角？」天殷提議道。
 




「下！我怕你咁夜都要為我過兩次海，會唔會唔太好呀？不如……介唔介意你叫司機車我落去最近嘅地鐵站或者巴士站，然後等我自己坐車返去咪算囉！」韻喬一邊開始執嘢一邊講。
 
「但係咁夜我怕會冇車喎。唔緊要啦喬喬，橫掂我地都做好哂功課啦，我喺度又冇咩做，我陪你一齊返去，順便可以喺車都傾下計呀嘛！」天殷依然堅持要送韻喬返屋企。
 
雖然韻喬真係好怕麻煩到人地，但係喺天殷再三堅持之下，自己都盛情難卻，於是就話「咁好啦，多謝你啦，殷殷！」

「客咩氣呀！不過套衫……你今晚不如帶埋返去，放住喺你屋企先啦，因為我怕你聽日唔夠時間再上嚟我呢度換呀。不過我都講明先呀，你聽日就算喺屋企換都要快手喎。」天殷再三同大頭蝦張韻喬講。
 
「知道啦長氣！咁好啦，我搞掂啦！行啦！」之後兩個就帶埋套衫落樓，同時天殷吩咐司機準備車。





「媽，我送小喬返屋企呀！」天殷同坐喺客廳睇文件嘅李太講。
 
「哦！小喬你返屋企啦？」「係呀李Auntie！」韻喬一邊孭袋一邊回答道。

「咁你地要小心啲啦！咁小喬聽晚喺會場見啦！」李太揮揮手同韻喬講。
 
「知道啦李Auntie，咁聽晚見啦！另外今晚都打搞哂你地啦！再見！」韻喬好有禮貌回應道，然後就同天殷上車向北角開去。
 
喺李家嘅座駕上面「喬喬你呢件都揀得唔錯喎！如果聽日化埋妝，再着埋條裙上去嘅話，我諗真係會好好睇呢！」天殷一邊睇住自己借畀韻喬嘅晚裝，一邊嘗試想象個效果之後就講。
 
「哈哈李天殷，你真係會氹人咖啫！而且你自己都夠着得好睇啦，使乜喺度同我比喎？」韻喬笑一笑咁講「不過殷殷呀，其實呢，點解咁多年嚟，我都唔聽見你話有鍾意邊個男仔嘅？」
 
對於韻喬突然提出呢個問題，天殷突然之間一臉尷尬，直接面紅紅咁講「我…我都唔知…但係我其實……都有鍾意嘅人嘅，只不過我都唔知佢點諗啫！但係都學你話齋，搞掂DSE先再算都未遲啦！」
 
「嗯，原來係咁。不過殷殷你都要諗清楚咖啦，你自己都識得話我啦，唔係咩？」韻喬點一點頭，然後喺度笑。





但之後天殷就冇講呢個話題，只係好安靜咁拖住韻喬。不過好快，李家座駕就返到福生大廈。
 
韻喬於是就收拾細軟「殷殷，我到啦！聽日喺學校見啦！」「下！我送埋你上樓啦喬喬！」

「唔使啦，而且時間都唔早啦，你都係快啲返去沖涼啦！聽日仲要返學同去party咖，如果唔夠訓嘅話，搞到成隻熊貓咁就靚女啦！」韻喬拎住背囊同見晚裝道。
 
「咁既然喬喬你都開到口啦，咁小女子就唔強人所難啦。咁你都早啲休息啦，聽日返到學校見啦，Good night！」

「Good Night，殷殷！」之後韻喬就自己行入大廈上樓，而李家座駕都絕塵而去。
 
好快，韻喬就將啲嘢，放哂喺自己間房，然後拎衫褲入去洗手間「唉！今日真係過得漫長啦，佢地兩個真係太多事！都唔知我有咩咁好爭！」

「不過我真係咁靚咩？點解啲男仔冇一個唔係想追我而接近我嘅？」韻喬除完衫之後，就對住鏡入面全裸嘅自己講，然後……





「嗯，都係快D沖好涼，然後上床休息啦！」於是韻喬就開大個水喉，等自己冷靜一下。

而喺韻喬沖完涼之後，天殷傳來Signal報平安，同韻喬講自己返到去，
 
「5A李天殷：喬喬我返到屋企啦！        23:04」

「5A張韻喬：知道啦殷殷，咁你快啲休息啦，今日大家都好攰啦！而且都要多謝你同你屋企！             23:12」

「5A李天殷：Thanks。不過呢，今日嘅事唔好太上心啦，而我都同哂兩個男仔講咖啦         23:13」
「5A李天殷：依家你就好好ready定聽日啦！記得食藥呀！Good night      23:14」天殷打完呢句就off咗line。

「5A張韻喬：知道啦，多謝殷殷，晚安        23:14」

而韻喬都喺執一執個書包之後，就望一望聽晚要着上身嘅晚裝裙，同自己講「希望聽晚可以安安全全咁渡過啦」喺食完藥之後就上床休息。





（下一章，會有第一個新人物出現，到底會係一個咩人？而佢嘅加入，又會對佢地幾個嘅關係，又會發生咩變化呢？就請大家拭目以待啦！）

（Ch 16 麻煩的一天 ~ 完）

IG link https://instagram.com/bear_big_big_writer