《愛在。貴族學園》: Ch 17 ~ 大小姐駕到 Part 1

Ch 17 ~ 大小姐駕到 Part 1（連載日期：2022/07/02）

經過尋日超級漫長嘅一日之後，韻喬今日都早咗少少起身，然後坐喺書枱面前，花少少時間化咗一個淡妝，為今晚嘅party做準備，當然就係畀天殷睇下覺得o唔ok啦。喺搞掂哂之後，韻喬就如常出去坐巴士返學。

然而因為今日韻喬有化少少妝嘅關係，所以巴士上都有人望下韻喬呢名靚女，所以韻喬都有少少唔自然。
 
「咦！早晨呀天殷！」韻喬喺學校門口撞到啱啱喺李家座駕落車嘅天殷。

而天殷見到韻喬之後，自然都好興奮「喬喬早晨呀！咦！今日你睇落好似仲精神咗喎！尋晚一定好好訓啦你？！」
 




「哈哈殷殷，你其實都講得冇錯呀！因為尋晚我真係訓得好呀嘛！而且我身體都越來越好啦嘛，所以精神咪都飽滿返少少…」韻喬微笑道「不過天殷你今日望落都唔差喎！」

「我ok啦，雖然我尋晚係夜訓呀，但因為我今朝一起身，就偷時間敷完個mask先返學嘛！」天殷都講出令自己精神嘅方法。

「哈哈！你睇下你個太子女啊，真係識嘆世界呀！」韻喬恥笑完天殷之後，佢地兩個慢慢行上5A班房。
 
「Ms張早晨！」韻喬同天殷喺樓梯度，見到去緊校務處嘅班主任Ms張，所以佢地兩個都有同Ms張打招呼……
 
「早晨呀，李天殷、張韻喬同學。係啦，我想問下你地呢，依家我地班房係咪都仲有空位剩喺度咖？」
 




韻喬同天殷喺聽到Ms張嘅問題之後，心裏面就有少少奇怪，所以韻喬就想八卦一下原因「嗯…….我地班房好似係有兩個位冇人嘅，請問有咩事呀Ms張?」

「冇事呀韻喬同學，如果可以確定係有空位就得啦，唔該哂你地先，一陣喺班房點名見！」Ms張喺講完之後，冇等韻喬同天殷講再見，就自己好急咁繼續行去校務處。
 
韻喬同天殷於是就同對方對望「奇怪啦喬喬，Ms張又會無啦啦問我地班房仲有冇空位嘅？」天殷一臉奇怪咁問韻喬。

「而且又好似行得好急咁去office，嗯…….唔通我地班會有……新嘅插班生？」韻喬跟住天殷講。
 
「下！新嚟嘅插班生？但係喬喬呀，我地依家已經Form 5，而且依家都已經11月啦喎，冇理由依家先會走嚟轉校下話？！」天殷非常驚奇咁講「定會唔會只係今日有教育局啲官員，走嚟我地班視學咋話？你都知啦，我地學校雖然財雄勢大，但係要玩政治嘅話，學校都未必夠教育局玩咖嘛！」
 




「唔知呀殷殷！不過，其實依家離我地嘅DSE，都叫仲有年幾嘅時間，如果依家再轉校嘅話，都勉強叫仲有時間嘅…」韻喬一邊思考回答天殷嘅疑問

「不過，我地都係唔好理啦喬喬，一陣間打鐘之後，我地咪知道謎底囉！」於是兩個人好快就返到5A班房，但都冇再提起呢件事。
 
「小喬、天殷，早晨呀！」同佢地兩個講野嘅，正正就係俊軒「咦，你地兩個睇落都好似春風滿面咁喎！唔通……你地兩個已經有男朋友啦？」俊軒擺明喺度flirt佢地兩個，韻喬聽到之後就先反俊軒白眼，然後再面紅紅咁，唔敢望住俊軒。
 
「你喺度講咩呀？！而且我見你面色都唔差喎林俊軒，你咪又係春風滿面，唔通你又有新女女睇中咗，再準備出擊啦咩？！」天殷見俊軒喺度寸自己，所以都勁蠱惑咁，喺韻喬面前反攻對方，等韻喬冇咁容易對俊軒動心至於，都等韻喬一陣有嘢可以寸俊軒。
 
「殷殷！你依家咁講就大錯特錯啦！因為依家喺我林俊軒嘅眼内，只係得一個女仔咖咋！」俊軒非常輕佻咁回答，而然後將視線，斜向旁邊嘅韻喬。韻喬出於尷尬，於是就回避俊軒嘅眼神。
 
「係啦係啦係啦！最好係啦下！仲冇嚟正經！假到死假到死！bullshit啦你！」韻喬非常不滿俊軒咁樣講，然後仲好似之前喺醫院嘅時候一樣，好大力咁一嘢打落去俊軒隻手臂度。
 
俊軒於是就好痛苦咁喺度講「喂！痛咖！張韻喬你個暴力女！成立借啲意就暴力狂上身打人！而且次次都咁鬼大力……痛到我！」

「林俊軒！本小姐我就畀多次機會你再講多次！我到底係唔係暴力女呀？！」畀俊軒話自己係暴力女嘅韻喬，自然就非常不滿咁反駁俊軒，再用凌厲嘅眼神警告對方。




 
上面嘅一幕，基本上5A好多同學都可以親眼目睹，而且從俊軒同韻喬嘅表情同反應嘅真實同自然，基本上都一定有人覺得，佢地兩個就好似情侶咁，日日公然喺學校裏面耍花槍。

（待續 ~）

IG link https://instagram.com/bear_big_big_writer