《愛在。貴族學園》: Ch 17 ~ 大小姐駕到 Part 3

Ch 17 ~ 大小姐駕到 Part 3（連載日期：2022/07/04）

當5A班房門口被打開時，全班同學嘅眼神都集中落喺Ms張後面嘅嘉惠身上「嘉惠你企喺黑板面前先啦。」Ms張好細聲咁喺嘉惠嘅耳邊講，然後自己行去老師枱度，放低點名簿同埋叠通告。
 
「（果然畀我估中咗，我地班會有插班生！）」坐喺位上面嘅韻喬，好細聲咁同身邊嘅天殷講。

天殷隨即對韻喬嘅表示讚嘆「（睇嚟呢個世界，真係冇嘢可以呃到天才喬！咁都畀你睇得穿Ms張！實在佩服佩服！請喬喬你接受小妹一拜啦！）」

「（誇張啦你！）」韻喬於是將白眼反上天。





而企喺Ms張隔離嘅嘉惠，就有少少緊張，而且都唔知道可以將眼神望去邊，直到佢自己見到一個男同學之後，就開始面露微笑……
 
喺一衆同學同Ms張敬禮之後，Ms張於是就一邊開電腦點名，一邊同5A嘅同學話...

「各位同學早晨！由今日開始，我地5A班會有一位新嚟嘅插班生。黃同學，麻煩你先同大家簡單介紹一下自己先，等大家可以認識下你！」然後大家都等嘉惠開聲。

「早晨呃…各位同學大家好，我個名叫黃嘉惠，我原先來自聖士提反書院。今日好榮幸可以加入呢間學校，同埋5A嘅大家庭，而大家平時可以叫我小嘉……」嘉惠好快就用充滿自信嘅語調，同5A嘅自我介紹，而大家都好專心咁聽。

「不過因為人生路不熟嘅關係，所以嚟緊就等各位同學，可以帶我認識學校唔同嘅地方，等我可以更快融入大家。另外，如果我之後有咩做得唔好，或者有做錯嘅地方，就可以請大家多多提點同包涵啦！」





「嗯…我諗我要講嘅嘢就係咁多，希望各位同學以後多多指教！」嘉惠講完就同大家鞠個躬道謝，而大家都好有禮貌咁拍手，歡迎嘉惠嘅加入。

Ms張之後就非常滿意咁講「唔該嘉惠同學，咁我都希望在座嘅其他同學，呢排可以嘅話，就盡量幫新同學融入我地學校同5A嘅生活。」

「咁，嘉惠同學，咁就請你坐喺嗰邊個空位嗰度先啦！如果有睇黑板睇得唔清楚嘅，就記得要同我講，到時候我會再同大家調位！」Ms張所指嘅空位，其實就係天殷後面個空位。
 
「好，唔該Ms張！」之後嘉惠就喺衆目睽睽之下，行去天殷後面個空位度坐低。不過嘉惠都有意無意咁，不停咁望向一個男同學。

而至於坐喺嘉惠前面嘅韻喬，萬萬都意想不到，新同學嘅加入，將會喺學校引起一場又一場嘅風暴……
 




「（天殷呀，我想你知唔知道新同學係邊個？點解我覺得…佢個氣場，好似有啲背景咁嘅呢……）」喺嘉惠坐低之後，韻喬就開始好奇寶寶咁上身，然後就問隔離位嘅天殷，到底識唔識呢個新同學。
 
天殷於是就搖一搖頭，然後同韻喬講「（我自己就唔識嘉惠同學嘅，不過我好似有少少印象，我同嘉惠好似喺啲party上面見過面……但我唔係太記得，佢係咪跨國企業黃氏集團嗰個太子女？）」
 
「（喔…….原來都係太子女呀，呢間學校冇嘢多，最多就係少爺同大小姐，嗯……希望我地大家可以好相處啦！都係上堂先啦！）」韻喬講完之後就冇再出聲，繼續自己喺位上面溫習功課。
 
而Ms張就繼續處理班務「啊雪盈呀！麻煩你幫我派咗叠通告佢呀！另外，除咗嘉惠同學之外，其他同學麻煩傳你地本週記出嚟呀，唔該！」

「知道Ms張」雪盈之後就幫Ms張派通告，而大家都開始傳功課出去前面嘅同學，然後再由Ms張親自收簿。

而嘉惠喺坐低咗之後，就自己準備上堂嘅用品，喺自己準備好之後，就拍一拍坐喺前面嘅天殷嘅膊頭。天殷於是就「嗯？」一聲之後就擰去後面。

（待續 ~）

IG link https://instagram.com/bear_big_big_writer