Ch 17 ~ 大小姐駕到 Part 2(連載日期:2022/07/03)

(Penana 版500喜歡加更,多謝大家嘅支持,加更先會咁密。希望下一次都可以更加快啦!)

而就喺呢個時候,同樣得罪韻喬嘅禮謙,都去完Locker拎書返到嚟,咁啱就見到俊軒同韻喬互動嘅呢一幕,心裏面自然又一次唔好受。

不過,因為尋日自己同俊軒激嬲咗韻喬嘅關係,所以都唔敢再同俊軒,咁明刀明槍喺度爭韻喬,所以只係輕輕咁話……

「好啦小喬,你就唔好再打俊軒啦,而且佢其實…都已經唔敢再調戲其他女仔好耐咖啦!」韻喬見禮謙居然主動幫俊軒cover之後,只係輕輕「哼!」一聲咁,返埋自己個位,再喺自己個位度食早餐。
 


俊軒就咩都冇講,只係自己一個返埋位做自己嘢,同時俊軒同禮謙都各自喺位上面,諗緊點樣為尋日發生嘅事,同韻喬道歉……

而喺同一時間,喺學校嘅校務處裏面,Ms張拎住一大曡學生嘅資料同文件,然後就喺校務處書記陪同之下,由校務處裏面行出嚟,企喺一個着住全新校服嘅陌生女同學面前……

「早晨,請問你係咪……新嚟嘅黃嘉惠同學?」Ms張於是就對住呢個,坐咗喺校務處門口嘅凳上面、有少少不安兼且四圍望嘅新同學問。
 
「早晨啊老師,我就係黃嘉惠同學,請問你係……?」呢位望落有少少高竇嘅新女學生,喺聽到有老師叫自己個名之後,就即刻企喺身,同Ms張打招呼。
 
「果然係你呢…你好呀,黃同學,我係Ms張,將會係你今年嘅班主任,兼且係中文科老師…」Ms張喺核對過嘉惠嘅身份之後,就正式同嘉惠介紹自己,然後伸出手同對方打招呼。
 


「Ms張你好!」嘉惠自然都好有禮貌同Ms張握手。Ms張望一望資料之後就再問嘉惠...

「我想問校務處理嘅書記,係咪已經幫你搞好哂注冊手續?同埋學生手冊、學生證、eclass之類嘅嘢都畀齊你未?」
 
「係呀,Ms張。嗰啲嘢我都已經收齊啦!」嘉惠再三檢查手上嘅資料之後,再同Ms張講。

而校務處書記都點點頭同Ms張講「係Ms張,頭先喺你落嚟之前,我地已經同嘉惠同學做過入學手續。」
 
「好嘅,唔該書記。咁嘉惠同學,麻煩一陣間打鐘嘅時候,你就跟我一齊上去班房啦。我仲有少少嘢要入一入去office度整理一下,你可以坐喺度等我一陣,又或者如果你有需要去洗手間嘅話,你依家可以行去前面走廊尾嘅洗手間…」



「知道啦,唔該Ms張!」說罷Ms 張就返入咗校務處,而嘉惠都趁住打鍾之前嘅空蕩,自己一個去洗手間,而且都望下學校其他學生上堂之前嘅情況。

不過,學校裏面就冇人認得出身為世界財團黃氏嘅獨生女嘉惠。
 
「噔噔噔噔…」8點15分,上堂鐘聲響起,走廊上邊只有零星啱啱好冇遲到返到學校嘅同學,急步咁喺班主任點名之前行返去班房。

而嘉惠都啱啱好返到校務處外邊等Ms張,而Ms張都好快咁,準備由校務處行出嚟……
 
「行得啦,黃嘉惠同學!依家就請你帶齊嘢,跟住我上去我地嘅班房啦!」「知道啦,Ms張!」Ms張一邊由校務處拎住叠通告,一邊同嘉惠講。

而嘉惠聽到Ms張嘅吩咐之後,就孭埋個書包,跟住Ms張上去5A嘅班房。
 
喺行去班房嘅途中,Ms張都要趁難得嘅機會,親自了解眼前呢位新同學嘅性格同背景「係呢嘉惠同學,首先Ms張都歡迎你,加入我地學校同Form 5A。」

「多謝Ms張!」「不過,Ms張都想知道,點解你會突然之間,喺學期中轉到嚟我地學校呢?」


 
嘉惠聽到Ms張呢條非常普通嘅問題之後,表情突然之間有少少微妙,但好快都答Ms張「嗯,其實係因為喺之前間學校,我都唔係話過得太過開心,所以想喺呢個時候轉過一個環境,可以等自己考好個DSE咁…」

雖然嘉惠嘅回答,Ms張都聽得出有少少官腔,但係自己都冇質疑嘉惠太多。
 
「原來係咁!不過無論之前喺舊校過成點都好,或者喺舊校嘅唔開心嘢,就忘記咗佢啦,過到嚟我地學校,就象徵住一個全新嘅開始,希望你可以盡快習慣同投入我地學校嘅生活啦!」

「另外,如果嘉惠同學你喺適應期間有啲咩唔習慣,又或者有咩問題想問嘅話,你就搵我地5A嘅同學,又或者可以去staff room度搵我傾下,知道未?」Ms張微笑道。
 
「明白,我會努力咖啦,多謝Ms張!」「唔好客氣!最重要都係嘉惠你可以融入到我地學校嘅生活,然後好好讀書,達到你對你自己嘅期望」

講下講下,Ms張就已經帶住嘉惠,去到Form 5A嘅班房面前……
 
於是,Ms張就轉身同嘉惠講「好啦嘉惠,我地已經到我地班房啦,記住喺係506室呀,之後唔好行錯班房啦!」



「知道Ms張!」嘉惠點點頭表示明白,然後Ms張就打開班房道門。

(待續 ~)

IG link https://instagram.com/bear_big_big_writer
已有 0 人追稿