《愛在。貴族學園》: Ch 17 ~ 大小姐駕到 Part 12

Ch 17 ~ 大小姐駕到 Part 12（連載日期：2022/08/03）

面對嘉惠突然向自己表白，甚至出動到肉體上嘅引誘，俊軒依然一碌木咁唔識反應，完全冇縮手。但俊軒好快都清醒返過嚟，知道自己心繫韻喬，所以就放甩嘉惠隻手。
 
「哦！原來你就係黃氏集團嘅千金！」俊軒終於都諗起呢件事，自己的確喺班大人嘅party見過嘉惠。

「Yeah！俊軒你終於認得我啦！」嘉惠聽到俊軒認出自己就好開心，但係俊軒好快又跟住話「不過嘉惠……呃……點講呢？我好多謝你鍾意我。不過….，我諗….我唔可以同你喺埋一齊，對唔住。」
 
嘉惠聽到俊軒拒絕自己嘅愛意之後，雙眼變紅然後仲開始想喊，同時都伸出手想捉住俊軒「點….點解唔可以呀？唔通俊軒……你有鍾意嘅人？定其實你已經有同人一齊咗啦？」
 




俊軒於是就對住嘉惠微笑「嘉惠，你真係聰明啦，果然同黃uncle一樣聰穎過人。不過，我真係要同你講聲對唔住啦！」

「因為林俊軒我，依家只係會對一個女仔情有獨鍾，佢個名，你今日應該都聽過咖啦，個女仔，就係坐你前面隔離嘅張韻喬同學…」

「點…點解…會又係張韻喬咖？！」嘉惠聽到自己嘅心上人，鍾意嘅唔係自己，而係自己眼中睇唔起嘅窮鬼嘅時候，先係顯得難過，進而喊得好大聲咁講「點…點解你會鍾意嗰個唔係我，而係嗰個乜嘢張韻喬呀？應該話點…點解你地每個男仔…都會鍾意佢呀？！」
 
嘉惠嘅喊聲大到基本上喺二樓都聽到，所以好多同學喺聽到之後，都望向花園嘅兩人，然後就喺度繼續食花生。
 
俊軒見到嘉惠咁嘅反應，先係顯得有啲措手不及，但俊軒知道如果情況再係咁落去嘅話，一定會有老師嚟找自己麻煩，所以就同已經有啲小脾氣嘅嘉惠講話…





「啊嘉惠呀，你冷靜少少，然後跟我過一過嚟先！呢度學校嚟咖。而且你今日先第一日喺呢度做插班生，你咁大聲喺學校喊嘅話，一陣畀老師發現就唔好啦！而且都好容易畀人講閒話咖！」
 
俊軒於是好快就將嘉惠帶到雨天操場，咁樣其他樓上嘅同學，自然就唔會見到佢地兩個，最後都唔會咁容易喺secret造成話題。
 
雖然嘉惠心裏面，既唔鍾意而且自己睇唔起韻喬，但係又為咗要避免破壞自己喺俊軒心中嘅形象，唯有就委屈一下，暫時收起呢份充滿敵意嘅感覺「俊軒同學，咁唔知你介唔介意話我知，點解你會鍾意呢個普通人呢？」

俊軒於是就嘆一口氣，然後就好語重心長咁講「嘉惠呀，其實…我唔怕坦白同你講啦，喺你嚟到我地學校之前，一直都有好多女仔同我表白，而且我都同好多女同學玩得好埋，甚至我…已經擁有咗成個Form 5女仔嘅電話號碼，基本上我要追一個女同學嘅話，根本就唔成問題…」
 
「但偏偏就唯獨有一個女同學係例外，嗰個同學就係小喬啦。小喬佢…一直都係我唯一搞唔掂嘅女仔，佢人又靚，人緣又好，而且喺Form 1插班入嚟我地學校之後，成績一直都好過哂全部人，而喺佢嘅身邊一直都有好多男同學，不斷好努力咁嘗試去得到小喬嘅芳心，但全部人都係無功而還。當然我自己都係小喬心目中，留咗個唔係太好嘅印象喺度…」
 




「直至到早一排，小喬佢因為唔識照顧自己，搞到自己發高燒同肺炎，入咗幾日醫院，於是我同另外兩位同學，畀Ms張委以重任，去幫手照顧小喬。而我嘅工作，主要就係幫小喬預備notes，方便小喬就算喺醫院養病嘅時候，佢都可以跟貼我地學習嘅進度，而喺過程中，我先發現自己鍾意咗佢。」
 
「所以如果你話，點解我會鍾意小喬，而唔係你，我諗我會話喺呢班，呀唔係，應該話，喺呢個宇宙入面，只有小喬一個人，先可以發出呢種十分特別嘅光芒，去吸引到我，甚至我會為咗佢去改變自己。」俊軒一下子就講哂自己同韻喬之前發生嘅事畀嘉惠知道。

嘉惠聽完俊軒講之後一臉疑惑，但心裏面聽到俊軒呢番近似對韻喬表白嘅說話，自然不是味兒，於是就再問俊軒「原來係有段咁嘅故事喺裏面。但係，話哂你地林家自己，喺香港都叫做有錢人家呀，如果你鍾意一個普通人嘅話，你唔怕你父母甚至其他親戚會反對咩？」
 
俊軒於是就點點頭，然後都記起之前帶韻喬呢個“女朋友”，上去自己屋企見父母嘅事，所以都毫無戒心咁同嘉惠分享「其實小喬喺之前，已經見過我父母咖啦，但佢地喺見過小喬之後，到依家都冇畀過負面嘅說話我聽。我諗，佢地應該都覺得小喬ok吧！」
 
「所以，我真係好對唔住呀，嘉惠，我諗我唔可以接受你，但係我都好多謝你鍾意我…」嘉惠聽完俊軒同韻喬嘅故事之後，就若有所思，冇再講任何嘢，但心中開始盤算，製造一個想破壞俊軒同韻喬嘅計劃……
 
「不過嘉惠呀，你頭先先喊過嚟，不如我帶你去附近嘅洗手間度，你自己入去洗個面先啦。如果唔係，我怕你返到班房之後，又或者喺走廊上面，你會畀其他同學講閒話！」俊軒都好關心表面上好柔弱嘅嘉惠。
 
「好啦，唔該俊軒！」於是俊軒就帶嘉惠去二樓女厠，然後等嘉惠搞掂之後，先再一齊返去5A班房。不過都好在5A都冇再引起躁動，但又唔少其他班嘅同學，知道黃氏太子女轉校之後，都走去5A班房門口，睇下嘉惠係何許人。

喺之後嘅課堂裏面，因為其他老師都發現嘉惠呢個新面孔，所以基本上每轉一次堂之後，嘉惠都要起身同老師做自我介紹。但係，喺其他人嘅幫忙下，嘉惠都好快都適應，再慢慢融入呢間學校嘅生活，但同時都暗藏一場大戰，去到某一個時候就要爆發。





（待續 ~）

IG link https://instagram.com/bear_big_big_writer