《愛在。貴族學園》: Ch 17 ~ 大小姐駕到 Part 13

Ch 17 ~ 大小姐駕到 Part 13（連載日期：2022/08/05）

至於頭先喺班房裏面，當天殷接過韻喬交低嘅工作之後，天殷就即刻開始幫韻喬整理，始終天殷自己都唔知道，到底Ms張幾時需要呢啲名單，所以天殷都決定快手快腳完成佢。

而同一時間，韻喬嘅喊聲都開始越來越大，已經有好多同學，都不停咁打眼色，叫天殷照顧一下韻喬嘅情緒。初時天殷一開始都因為全程投入幫韻喬手而冇為意。

但韻喬偷偷飲泣嘅聲音都越來越大，所以天殷都放低手上嘅工作，轉而望下身邊嘅韻喬。

而喺天殷同韻喬講嘢之前，天殷心裏面都嘆一口氣，然後喺心裏面話“你個傻妹真係呀！頭先問你有冇事、係咪喊過嚟，你又話冇，依家又自己喺度偷喊，真係咁唔坦白都有嘅？”





好快天殷就好溫柔咁話「喬喬！喬喬！你冇事呀嘛？做咩無啦啦伏喺張枱上面，然後喺度偷喊呀？」韻喬一開始都只係搖搖頭，唔肯承認自己喺度喊嘅事，然後又繼續伏喺枱面度，然後個身繼續喺度震。

眼見韻喬依然都係唔肯講，天殷都係時候要出口術逼韻喬就範「張韻喬！你如果唔同我講嘅話，你就真係唔當我係姐妹啦！你好講啦下！到底林俊軒點解會無端端成個人會唔見咗咖？！」

聽到天殷講到咁嘅時候，韻喬都無謂得失眼前嘅呢個姐妹，所以就即刻起身抱一下天殷，而喺天殷見到韻喬塊面嘅時候，韻喬隻眼早就已經喊到腫埋。天殷都見如果韻喬喺度講嘅話，一定會有其他同學喺度食花生，所以就話…

「喬喬呀…呃，不如呢，我地去一個人少啲嘅地方先講啦，好冇？」韻喬好快就點點頭同意，於是天殷好快就拖住韻喬，去到一個人少嘅地方，皆因依家距離上堂時間都唔係得番好多時間。

喺去到一個角落之後，天殷首先就睇下，到底林俊軒喺唔喺附近。喺確定唔係附近之後，天殷就好擔心咁開口問...





「喬喬呀，其實到底頭先發生咩事呀？明明我落去小食部之前，你都好地地咖喎！做咩我返嚟之後就唔開心都有嘅？」

韻喬一聼到天殷咁講，就即刻撲入天殷嘅心口度，然後就開始喊起嚟。天殷第一時間都就住韻喬個頭，然後話「冇事呀喬喬，我咪話過好多次，有咩嘅話我都會陪住你同聽你講咖嘛！你就慢慢同我講，到底頭先發生咩事啦！」

韻喬於是就開口，將頭先嘉惠專登過嚟引走俊軒嘅事，一五一十咁同天殷講清楚…「就…就喺頭先你落咗去嘅時候，小軒佢見到我好似好精神咁，就過嚟問下我點，咁我就當然話我自己ok啦！」

「同時佢都見到我喺都幫Ms張手整嘢，為咗我唔想太辛苦，所以就話…想幫我一齊整啦，點知今日新嚟個黃嘉惠，就好似發哂姣咁，喺度要林俊軒陪佢出去喺學校四圍參觀…」

天殷聽到韻喬咁樣形容，就已經搖搖頭表示好嬲，然後韻喬就繼續講「然後林俊軒就想拒絕啦，話要幫我手整Ms張吩咐我做嘅嘢，而反提議個黃嘉惠，叫佢搵班上其他同學同佢去行啦…」





天殷聽完之後就更加不滿，所以就再問韻喬「真係呀！擺到明喺特登咖啦，咁黃同學有冇講咩說話你聽呀？」

「咁梗係有啦嗚嗚嗚！」韻喬講講下又開始喊「咪就係話點解個個一見到我，就一定會“小喬”“小喬”咁叫我！我心諗有咩問題呀？唔通我喺呢度就一定要賤過地底泥咩？！」

「唔係唔係！」天殷第一時間安撫韻喬「咁你之後點反應呀？」

「我咪因為唔想見到個黃嘉惠，所以咪叫林俊軒同佢出去行囉，然後過多陣你就返嚟啦！」韻喬好簡單咁交代件事嘅結果。

天殷再一次握實拳頭，然後就話「真係呀！黃同學擺明就挑機咖啦，不過你做咩放過軒仔呀？見到你咁樣，都好難唔畀人話你鍾意軒仔咖咩？」天殷呢一句唧講笑，都差少少令韻喬招架不住「喂呀！做咩又拉到去呢件事上面喎！完全都唔同！」

不過，天殷都繼續大笑「哈哈，果然張韻喬都已經慢慢接受啦喎…」

「李天殷！」就喺韻喬大叫天殷個名嘅時候，上堂嘅鐘聲都響起，所以天殷同韻喬都即刻起步行返班房。

但係喺俊軒同嘉惠返到5A班房之後，天殷都第一時間，睥住嘉惠同埋俊軒。不過俊軒好快就知道天殷嘅眼神係咩意思，所以俊軒好快都喺Signal裏面，先後同韻喬同埋天殷道歉，然後先繼續上堂。





（Ch 17 大小姐駕到 ~ 完）

IG link https://instagram.com/bear_big_big_writer