《愛在。貴族學園》: Ch 18 ~ 鬧翻 Part 1

Ch 18 ~ 鬧翻 Part 1（連載日期：2022/08/10）

經過一整日嘅課堂，或者話係一個星期嘅課堂之後，終於都到星期五嘅放學時間。

由於喺上個禮拜，韻喬因為入咗醫院嘅關係，所以俊軒佢地嘅四人組，相隔咗成個幾禮拜，先可以再一次一齊放學。
 
只不過，今日新加入5A班，而且表明鍾意俊軒嘅新同學黃嘉惠，居然喺放學嘅時候，又一次跟住俊軒行，所以今日佢地就變咗做五人同行。

但因為韻喬都喺度嘅關係，所以有嘉惠同場出現，氣氛都變得非常詭異同尷尬。





無耐之後，當一行人到達林家嘅座駕時，韻喬都開始認得呢部坐過幾次嘅車，然後就轉身同俊軒講「好啦小軒，你屋企部車喺度喎，咁我地星期一見返學見啦！Bye bye！」

如果換轉喺平時，聽到韻喬咁樣同自己講，其實都好正常。但係俊軒喺聽到韻喬今日都咁樣同講自己講之後，就感到非常奇怪，所以就開聲同韻喬講「小喬呀！你其實今日應該要上呢部車咖喎！而且做咩同我講星期一見呀？！」

「下咩呀！？呢部車明明係你屋企咖喎！點解要我上你部車呀？小軒你傻鬼咗呀依家？！」韻喬好明顯load唔到，自己今日放學之後有嘅行程，估計都係因為大病初愈，身體依然都係太攰，所以反應都有少少遲鈍。

「傻鬼咗嗰個係你呀張韻喬！你係咪唔記得咗，今日放學之後有啲重要嘢要做呀？我尋日喺食lunch之後嘅時候，唔係已經同你講咗啦咩？」俊軒一本正經咁同韻喬講，目的就係試圖要韻喬自己醒起，今日放學要做咩。
 
「喬喬呀，你再諗清楚少少先啦，尋晚你自己做過啲咩嚟呀？你咁快就唔記得咗當冇事發生啦？！哈哈又會突然之間咁冇記性，唔似係你喎天才喬！」天殷都加把口入嚟提醒韻喬。





面對俊軒同天殷嘅密集式提水，遲鈍嘅韻喬到要load咗成30秒之後，先至好驚醒咁講「啊！我記得啦，係喎可，小軒我地今晚要出席郭氏個party喎！小軒呀，我地都係快啲走先啦！咁其他人…一陣間喺會場裏面見啦！」
 
「嘩！好在你仲記得咋張韻喬，幾驚你完全冇咗件事呀！」俊軒喺飽吃驚風散之後道「不過都話你咖啦，你呀讀書咁叻，但份人成日都咁鬼大頭蝦都有嘅！都唔知你個腦咩構造嚟咖！」俊軒抱怨韻喬記性嘅同時，又一次喺度寸韻喬。
 
「死人頭林俊軒！你喺度講咩呀！？」韻喬即刻心有不甘咁啤住俊軒，然後按照一直嘅正常操作，好大力咁一野打落去俊軒手臂度。

然後俊軒就痛到大叫話「喂！痛咖大佬！都唔知點解你可以咁鬼暴力咖張韻喬！！」韻喬之後就上咗車先，但喺上車之前又再打多次俊軒一下。
 
禮謙同天殷見到俊軒同韻喬兩個鬥氣冤家喺度耍花槍，雖然都已經司空見慣，但係都忍唔住喺度大笑。





至於嘉惠呢，佢喺親眼見到自己鍾意嘅俊軒俊軒，同自己最睇唔起嘅韻喬，舉動可以如此親密之後，都顯得有少少唔高興而黑面。

「咪住先俊軒，頭先話……韻喬話會一陣喺會場度見大家？」嘉惠自己都load咗一陣，直到後來都先load到，韻喬講嘅係今晚個郭氏party，於是嘉惠就好快咁對俊軒講「俊軒呀，我今晚都會出席郭氏個party咖喎！咁一陣間見啦！」
 
不過除咗俊軒之外，天殷同禮謙兩個都冇理嘉惠，始終喺今日全日，嘉惠都冇點主動同過其他嘅同學認識同埋傾計，只係成日都圍住俊軒氹氹轉。

再加上嘉惠今朝先同韻喬嘈過交嚟，所以天殷甚至5A其他同學，都係唔太想理佢。

「咁小軒呀，我地時間真係無多啦！禮謙、天殷，我地一陣間喺會場再見啦！see you！」韻喬喺車上同另外兩個好友講道，而且都專登skip開嘉惠。

「好啦，一陣再見啦，小喬、軒仔！」禮謙同天殷向車上嘅俊軒同韻喬揮揮手，之後林家嘅座駕就離開學校。

至於禮謙、天殷同嘉惠，都分別坐上自己嘅座駕各自返屋企，為出席今晚嘅party做準備。

（待續 ~）





IG link https://instagram.com/bear_big_big_writer