《愛在。貴族學園》: Ch 18 ~ 鬧翻 Part 3

Ch 18 ~ 鬧翻 Part 3（連載日期：2022/08/15）

（雙平台纍積點擊數50萬，多謝大家喺呢一年裏面嘅支持，如果唔係我都唔可以喺一年裏面，就達到呢個成就，本熊都一定會珍惜大家，當然大家都可以去我IG同我傾計）

「不過小軒呀，今日小息你行開咗之後，你同嘉惠去過邊？而且做過啲咩嚟呀？」韻喬用略帶逼宮嘅語氣去追問俊軒。
 
「做咩呀小喬你，依家有新對手出現就即刻呷醋呀？」俊軒先下意識咁挨後，然後就想恥笑韻喬。

不過就算未一齊都好，韻喬食住俊軒真係有一手，即刻用女朋友嘅語氣問「林俊軒！我依家畀個機會你再講多次？！！←_←」之後韻喬又想一嘢打落去俊軒手臂。
 




「喂！小喬，你使唔使用咁嘅眼神望住我呀？一陣我先話你知啦小公主！」俊軒冇好氣咁講。

點知韻喬仲係好不滿「哼！咩小公主呀？刁蠻公主就有你份呀！你你你要唔要呀？！」

「係係係！要要要！點會唔要呀！全世界係你最刁蠻啦，得未？」俊軒面對韻喬嘅脅逼之後，都被逼投降，畢竟俊軒都呢一刻，都未有辦法可以令韻喬聽自己話，不過韻喬都接受咗俊軒嘅提議，而冇再講過啲咩。
 
好快，林家座駕就去到韻喬屋企樓下，俊軒喺司機停低部車之後，就同司機講「照舊啦司機，你去附近停車場泊低部車休息下吧。今日張小姐應該未必咁快搞掂，一陣差唔多嘅時候，我再通知你嚟接我地啦！」
 
「知道啦，二少爺！」「一陣見啦，司機，唔該哂！」韻喬落車之前，都有唔該林家嘅司機。然後韻喬就帶住俊軒返自己屋企。





今次應該係韻喬第二次，單獨帶一個男仔上自己屋企。而上一次，其實就係韻喬整親腳嗰次。
 
喺入到屋放低書包之後，韻喬就拎咗盒維他檸檬茶同少少餅乾出嚟，等俊軒可以一邊等一邊食「喂！衰人！我去沖涼換衫先，你自己睇住電視或者做住功課先啦，招呼唔到啦，失陪！」

「好，唔該小喬！」之後，俊軒就坐喺飯廳一邊做功課，一邊等韻喬沖好涼。
 
但係俊軒做咗一陣功課，就覺得自己有少少攰，於是望一望張家嘅佈置，“麻雀雖小五臟俱全”俊軒道。而喺客廳嘅牆上面，襄起咗張家嘅全家福喺度。
 
不過，喺俊軒仔細咁睇嘅時候「咦！呢個係小喬？但係點解小喬…同佢爸爸媽媽個樣好唔似咁嘅？」俊軒覺得非常奇怪，但自己都冇再考究個問題，應該話唔想深究落去……





「唔會嘅，可能係我…自己眼花睇錯咖啫，應該唔係去嗰個方向掛！依家又唔係拍戲！」之後俊軒就開咗一盒檸檬茶，然後咬住嚟繼續做功課，但係俊軒都係若有所思咁，似乎畀幅奇怪嘅全家福，影響到自己嘅思緒。
 
「喂！林俊軒！你喺度諗咩諗到入哂神呀你？」用毛巾包住自己個身嘅韻喬，突然之間走到俊軒面前，搞到正喺度集中精神做功課嘅俊軒，都成個嚇咗一跳「有冇咁細膽呀你！？」
 
「冇呀！我邊度細膽呀！？」不過俊軒好快就畀韻喬嘅另一面吸引住「但…但係小喬你……做咩…」俊軒唔能夠相信自己眼前所見到嘅一切，因為韻喬美妙嘅身形，已經畀條毛巾顯哂出嚟。

但係好快，韻喬就知道俊軒不停咁望住自己個身，所以塊面都即刻紅埋。而畢竟俊軒只份屬同班同學嘅關係，所以韻喬當然都覺得唔習慣，自然選擇強硬嘅語氣去教訓一下呢個男仔。
 
「你……你個死咸濕鬼望咩呀望！？我……我裏面有着衫咖！！我先唔會咁容易畀你睇哂呀！哼！！」不過其實講大話嘅係韻喬，因為佢其實喺毛巾裏面，係咩都冇着，只要條毛巾一鬆就…..大家都懂的。
 
「冇呀！我……我幾時有呀？，只不過我依家諗起一首歌啫 不穿衣衫多麽俏 體態好嬌小……」俊軒喺答緊韻喬嘅時候，韻喬就攞住個風筒入房吹頭。
 
「你……你個死人頭咸濕老伯軒！！你到底係咩年代咖！？咁舊嘅歌都拎出嚟唱，正一成日都冇嚟正經！！」韻喬一臉嫌棄咁講。
 
「你就老伯！好啦小喬呀，我諗我地時間都差唔多咖啦，你好快啲入房換好衫啦，唔好要我地司機等太耐，同唔好凍親自己啦！」





「知道啦！長氣！咁你等多我一陣先啦！」韻喬好快就自己入房，然後鎖起門着衫，同時都繼續留低俊軒喺客廳度。

（待續 ~）

IG link https://instagram.com/bear_big_big_writer