《愛在。貴族學園》: Ch 18 ~ 鬧翻 Part 4

Ch 18 ~ 鬧翻 Part 4（連載日期：2022/08/18）

韻喬都好快吹好頭同抹乾個身，然後着上尋晚由天殷屋企攞返嚟嘅晚裝。為咗唔好畀bra帶影響，所以韻喬今晚都係着平時好少用嘅透明帶胸圍，始終平時用膠帶勒住膊頭嘅話，其實都好唔舒服。
 
「林俊軒！我想化埋個妝先呀，我想問我地時間夠唔夠呀？」韻喬突然由睡房大嗌出廳。俊軒對表之後就話「嗯……如果唔太耐都ok啦，我地仲有啲時間嘅！」但係韻喬都喺30分鐘内化好妝，然後身穿紫色晚裝行出自己間房。
 
身為女神級人馬嘅韻喬，幾乎以國色天香嘅姿態，行到俊軒面前「小軒，幫我set埋個頭呀，唔該！」

「係……係！」俊軒隔咗成二十秒先回過神「點呀死人頭林俊軒，你又想講啲咩口花花說話畀我聽呀？！」韻喬見俊軒咁嘅反應，就知道對方一定又喺度望實自己望到入哂神咁。
 




「嘩！唔知眼前呢個咁靚嘅女仔，係咪我林俊軒嘅女朋友呢？！」俊軒剩係講咗呢句，就即刻畀韻喬打咗一野「你個死人頭！依家邊個應承做你女朋友呀！？好心你就唔好FF咁多，傷身呀老伯！！」
 
「暴力喬，你好啦下你！！你再打我嘅話，我就唔幫你set頭啊啦！」俊軒講完呢句之後，韻喬竟然乖乖地，坐喺俊軒面前，等對方幫自己set頭。
 
喺set到一半嘅時候「喂張韻喬，你又話想知道，嘉惠今日小息嘅時候同我做咗啲咩嘅？」

「哼！咁你講啦！」韻喬喺俊軒提起嘉惠嘅時候，居然都會醋意大發。呢個反應，都令到俊軒大感不解。
 
之後俊軒就將同嘉惠去花園嘅事，一五一十咁講哂畀韻喬聽，包括嘉惠突然向自己表白嘅事...





「所以到最後，你就拒絕咗黃嘉惠啦喎？」韻喬嘅語氣比俊軒嘅想象中平靜，睇落韻喬都係刻意試探自己。
 
「咁呢個當然啦，因為我真係覺得實在太快，同埋就算我地兩家有生意來往都好，本身我真係唔識好熟悉嘉惠，平時都好少傾計。不過，依家都唔緊要啦，因為我鍾意嘅人，就係你，張韻喬。」俊軒不經意嘅表白，都氹得韻喬有少少怕醜，面紅紅咁。
 
「又……又口花花啦你！我都唔明林俊軒你，點解喺你講呢啲說話嘅時候，可以完全唔面紅都有嘅？」韻喬其實都係喺度扮下嘢，繼續睇下俊軒點答，去測試對方到底喺咪真係有心鍾意自己。
 
「下！我認真咖喎張韻喬！你到依家居然仲覺得我係玩玩下？唉！好唔開心囉！」俊軒今次就扮無辜道，抱怨韻喬咁樣睇自己。
 
「你最好係啦下，不過，by the way，認真問你呀林俊軒，今晚我呢套衫，你覺得ok嘛？」韻喬照住連身鏡問身後嘅俊軒，但俊軒依然都好輕佻咁答「小喬你係我地嘅女神喎，梗係着咩都好睇咖啦！」
 




「林俊軒你認真少少得唔得呀？我都唔知你聽唔聽人講野咖！我依家認真問你我套衫點呀？」然後韻喬又打咗俊軒一拳。
 
「都話咗我好認真咯，條裙真係好襯你！係你成日覺得我喺度講笑咋嘛！不過，難得小喬你今晚着得咁好睇，不如同你影兩張相先出門口啦，好冇呀？」

「好呀！」喺韻喬點點頭之後，俊軒就同韻喬影咗一張二人selfie，同一張只有韻喬獨身照。而呢張，都係俊軒同韻喬近年第一張自拍。
 
「好啦小喬，我地要行啦，司機已經喺樓下等緊我地啦，我地一陣去到我屋企先再影啦！記得要帶藥同披肩呀！」俊軒喺出門口之前，再三提醒大頭蝦嘅韻喬。「帶哂啦，長氣！行啦！」
 
於是韻喬就拎住個天殷借畀自己嘅手拿包，然後同俊軒出發去林家大宅。而個手拿包，就係同韻喬套晚裝屬於同一個系列，所以整個連貫性都好好，而且都顯得韻喬高貴大方。
 
不過，喺上車之後，可能今日返學好攰嘅關係，韻喬好快就喺車度，挨住俊軒訓着咗。

不過好快，座駕就返到林家大宅「懶訓豬，我地到啦，起身啦！」俊軒拍一拍韻喬道。俊軒之後就拖住“女朋友”韻喬入到大宅。

（待續 ~）





IG link https://instagram.com/bear_big_big_writer