Ch 18 ~ 鬧翻 Part 9(連載日期:2022/09/02)

「劉生劉太你地好呀!好耐冇見!」林生林太先同劉氏伉儷同佢地嘅千金打招呼。

劉家好快都見到林家之後,就即刻變得非常客氣「喔!原來係林家!你好你好!」劉生劉太之後向林氏一行人逐個握手。
 
「嘩,令公子都已經咁大個啦?又幾靚仔喎!一表人才將來必成大氣!飲杯!」劉生對林生講,搞到林生笑到見牙唔見眼,而成為大人討論對象嘅俊軒,就一下子變得好尷尬。

當然,喺俊軒身邊嘅韻喬,聽到啲大人咁樣喺度討論自己個同學私底下嘅一面,都忍笑忍得好辛苦「哈哈,你太過獎啦劉生,不如等佢介紹自己,同埋旁邊佢個女朋友仔畀大家認識啦!」林生繼續笑笑口咁,就將個波抛到俊軒身上。
 


「哈哈,過獎啦劉uncle,佳澄小姐都好靚呀今晚!」俊軒接住林生講「呀,介紹埋啦劉uncle劉auntie,身邊呢位係我女朋友,張韻喬小姐!」

「呃…劉uncle劉auntie你地好!初次見面,你地可以叫我做小喬得咖啦!」韻喬都非常識做,好有禮貌咁叫人。
 
「小喬你好,呢位係我個女,劉佳澄小姐,佳澄小姐同林二公子係同年嘅!」劉生向第一次見嘅韻喬介紹佳澄。

「你好呀,小喬!」之後韻喬就同佳澄握手。

「佳澄小姐你好,其實我都同你同年咖!」「喔,多多指教啦,小喬!」佳澄微笑咁再同韻喬講。
 


「好啦,林生林太,我地都要同主人家去打個招呼先,夜少少再一齊傾生意啦,失陪啦幾位!」「好,一陣見呀劉生!」

劉氏都好快離開。但喺離開之時,頭先一直冇點出聲嘅劉太,故意擰返轉頭望向韻喬。
 
不過好在,經過一輪嘅社交之後,原先非常緊張嘅韻喬,情緒都終於冷靜咗落嚟,可能都係因為可以遇到一啲,同自己年紀差唔多嘅人吧。

就喺俊軒同韻喬繼續坐喺度嘅時候,就有認識嘅人走到佢地兩個面前……

「hi!小喬、小軒!」「咦,禮謙、殷殷!等咁耐終於都可以見到你地啦!」韻喬見到自己嘅好朋友,當然都感到非常興奮。



「殷殷呀,我都嚟咗好耐啦喎,但係點解頭先都唔見你地嘅?」天殷拖住韻喬隻手,然後問俊軒。
 
「哦!頭先我同小喬都想去搵你地兩個,於是喺會場裏面行咗一個圈,不過行咗好耐都係見唔到你地,所以咪翻番嚟個位度先囉。」

「點知曹氏成家都過咗嚟打招呼,然後因為我父母又離遠見到劉氏一家,所以就到我地出咗去打招呼咋嘛!」俊軒將頭先情況還原,而韻喬都一直點頭同意。
 
「你話曹氏依家走嚟同你地打招呼?!我仲記得曹氏成家都係女人嚟咖喎,而且個個都好靚女咖喎!」天殷喺記得曹家之後,就即刻插嘴講。
 
「今年曹家終於多咗個男仔啦,而且同我地嘅年紀一樣,頭先仲趁傾計嘅時候,我地已經交換埋signal啦!」俊軒答返天殷天殷頭先嗰句「但係殷殷、禮謙呀,你地其實幾時嚟到會場咖?」韻喬將話題拉返返嚟。
 
「我……我就20分鐘之前先到咋,因為頭先喺屋企有少少事,所以我地咪遲咗少少出門口,而且出面都好塞車下。」禮謙先回答韻喬嘅問題。
 
而天殷就跟住話「而我就到咗一陣咖啦,不過我就一直陪住父母去social啦,然後頭先行行下就見到謙謙,所以我咪…拉埋佢過嚟搵你地囉……」

「話說謙謙呀,你覺得喬喬今晚着得靚唔靚呀?」喺天殷突然cue到自己之後,韻喬即刻紅都面哂咁。


 
於是禮謙就將視線,全部投放落去韻喬身上,喺睇咗一陣陣就話...

「嘩!小喬同學你今晚……簡直好似仙女下凡一樣咁!實在係靚到不得了。平時小喬喺學校着住校服都已經咁靚,今晚小喬着埋晚禮服之後,就更加係女神級一樣!」禮謙呢個答案,好明顯係想捧到韻喬上天,但之不過….

(待續 ~)

IG link https://instagram.com/bear_big_big_writer
已有 0 人追稿