Ch 18 ~ 鬧翻 Part 10(連載日期:2022/09/06)

「誇張啦你程禮謙!又喺度學埋死人頭林俊軒啲衰嘢,一樣喺度口花花!!」韻喬之後一野打落禮謙度,結果打到禮謙個人即刻彎低腰「嘩……痛!唔怪得小軒話你暴力狂啦!講一句啫,就打到人咁鬼痛囉。」

而喺身邊嘅俊軒,就一邊飲punch一邊偷笑禮謙,但係自己都唔敢喺呢個場合,再話韻喬係暴力狂,畢竟都唔係一個合適嘅地方去講。
 
就當佢地幾個傾到興高采烈嘅時候,大會MC突然之間喺咪度宣佈「各位來賓,今晚嘅晚宴好快就會開始,請各位貴賓馬上返回座位就坐,多謝大家合作!」
 
「咦!今晚咁快就開始啦?咁喬喬、小軒,一陣間你地再匯合啦我地…」天殷同俊軒、韻喬佢地講完之後,就自己一個行開咗。不過天殷好快就發現,林家同李家原來坐埋同一張檯,所以大家坐低之後都變得好尷尬……



「咦,乜林氏原來你地都係坐呢張檯呀?」李生先開口同林生笑笑口咁講,而天殷都同時都同俊軒父母打招呼「林uncle、auntie你地好!」
 
「李uncle、李auntie你地好!」俊軒同韻喬自然都要回禮「小軒,我地都好耐冇見啦!話說小軒、小喬,你地兩個今晚都好合襯喎!」李太同俊軒、韻喬佢地兩個講。
 
「哈哈邊度係呢,李auntie你太過獎啦,而且都係因為小喬本身都生得咁標緻,而且都要尊重一下場合嘛。不過天殷其實今晚都着得好好睇!可以同小喬一齊搶下鏡嘛哈哈!」俊軒咁樣嘅回應,搞到韻喬同天殷兩個面都紅埋。
 
「咁都係因為小軒喺之前同我講話,今晚嘅場合始終都比較正式,所以我都選擇着得grand少少,去尊重主人家同場合嘛!」韻喬接住俊軒回應。「係呀,不過無論點都好啦,小軒你身為韻喬小姐嘅男朋友,記得一定要好好對韻喬啦!」李太再吩咐俊軒道。
 
「知道啦李auntie!」俊軒講完之後,都故意望一望韻喬。不過……



「天殷呀,林auntie我想八掛下呢,我地小軒同張小姐,平時喺學校有冇做啲咩親密嘅舉動呀?」林太呢個炸彈頓時搞到幾個細嘅,都唔知點回答呢個尷尬嘅問題,而俊軒同韻喬覺得都非常難為情。
 
天殷好快就兜到「咪同依家差唔多啦哈哈,係咪呀喬喬?」

「哈哈,都係啦,我相信如果林auntie問令公子嘅話,佢都會有一個好好嘅答案!」然後韻喬都啤咗天殷一眼,示意天殷唔好喺度搞事。

而韻喬同時都喺檯底度,搣咗俊軒大髀一下,而且都用咗好大力,再一次非常“關愛”咁“提醒”對方唔好亂嚟。不過就算畀韻喬搞到好痛都好,俊軒冇叫出嚟,只係自己死忍韻喬嘅攻擊。
 
至於李生同林生,佢地喺席間都開始掛住討論兩個家族公司之間嘅商業合作,同時都考慮要唔要喺呢個場合,同其他嘅家族或者公司打好關係,方便未來嘅潛在商業合作,而完全冇再去理班細嘅喺度講咩。



好快,晚宴部分都嚟到尾聲,之後就到跳舞嘅環節。天殷一邊享用tiramisu一邊講「小喬呀,你覺得今晚啲嘢好唔好食呀?」

「還好啦!菜餚嘅combination都叫好好啦,而且感覺啲食物都好名貴!」韻喬直接講出心中嘅感覺,但係韻喬嘅表情就話畀大家知道佢好悶。

就喺大家繼續傾計嘅時候,禮謙突然之間走過嚟,喺大家面前出現,順便都統幾家嘅家長打招呼「幾位朋友,你地食飽未呀?呀hello林uncle、auntie、李uncle、auntie!好耐冇見!」

不過,天殷喺見到禮謙之後,突然之間塊面都紅哂。

(待續 ~)

IG link https://instagram.com/bear_big_big_writer
已有 0 人追稿