《愛在。貴族學園》: Ch 18 ~ 鬧翻 Part 14

Ch 18 ~ 鬧翻 Part 14（連載日期：2022/09/20）

「點呀？依家就兩個人走咗去咋嘛，然後你地一堆人望過嚟做咩啫？而且都係啦，張韻喬只不過係一個普通人咋嘛！都唔知點解你地係都要護住一個普通人囉！！」
 
嘉惠講呢句嘅時候略顯不滿。不過，俊軒同禮謙都不值嘉惠嘅所為，所以聽到之後都嬲到爆炸。

但同時間，佢地都好擔心一日内被無辜欺凌兩次嘅韻喬，同埋急於照顧好姐妹嘅天殷。

所以就喺呢個時候，禮謙同俊軒打咗一下眼色，睇嚟兩個兄弟今次終於要聯手出擊，同喺度搞事嘅嘉惠攤牌。
 




而呢一個聯合行動，係自從喺兩個都開始追韻喬之後，就冇再出現過，但今次因為係自己鍾意嘅愛人畀人蝦，唯有兩個聯手一致將槍口對準嘉惠。
 
首先出聲嘅，係禮謙呢位平時都唔會無啦啦鬧人嘅謙謙君子，大家可想言之禮謙今次有幾嬲...

「黃同學，我諗你都知，大家都係同學，而且仲要同班！今晚大家都係出嚟開心嘅，但如果你真係抱住呢種思想，去睇自己嘅同班同學嘅話，你今次真係大錯特錯啦！」
 
「韻喬同學其實都同我地一樣，佢都係我地呢間學校嘅學生嚟！既然大家嘅身份都係同學嘅話，就應該要平等對待！咁點解嘉惠同學你，要對韻喬甚至張家，抱有呢種歧視嘅諗法呢？！」
 
「唔通你就一定要恃著自己屋企大把錢，或者人脈夠廣可以show power，就可以喺學校，甚至喺人地個party上面，當住咁多人面前為所欲為咩？我程禮謙真係不齒你呢種行為！」講完之後，禮謙就即刻離開會場，跑去搵韻喬同天殷。
 




到最後，得返俊軒自己一個面對嘉惠「小軒，唔會連你都會鬧埋我一份下話？我知道，你一定會支持我，唔捨得鬧我咖嘛，係咪？」嘉惠用好溫柔嘅語氣喺俊軒耳邊講，同時間，再吹咗俊軒隻耳仔一下。
 
不過，嘉惠一下子將氣氛搞到咁僵，而且仲要係針對自己追求嘅對象，俊軒又點會咁容易忘記韻喬，而受到嘉惠呢種刺激嘅動搖呢？

所以，俊軒深呼吸一下之後，就好認真對嘉惠講…

「黃嘉惠同學，對唔住，你今次真係太錯、太過分啦！今朝喺學校嘅時候，你已經搞到小喬唔開心咗一次，我都已經忍咗你一次。到咗夜晚出到嚟社交場合，我都已經刻意唔提起日頭嘅事，你都仲要想嚟多一次？」

「而且，大家都已經Form 5咖啦，你係咪真係唔知道咩叫喺適當嘅時候做適當嘅野呀？」
 




「仲有我想講嘅係，既然黃同學你咁樣做，當衆將小喬整喊，而且搞到我班好朋友唔開心，我林俊軒肯定唔會畀你喺學校有好日子過！我一定會將今晚發生嘅事，除咗同Ms張講之外，我都會同全班講得清清楚楚！」

嘉惠聽到俊軒威脅自己之後，就將自己嘅拳頭握緊，然後再向俊軒露出可怕嘅微笑「喔，林俊軒同學，你都仲係咁大膽咖喎，你依家居然仲用咁嘅態度同口氣同本小姐講野？咁你即係大我啦啵咁話啦喎係咪呀？！」
 
「不過，我都代我爸爸提醒你一樣嘢，唔好唔記得我屋企同你屋企嘅實力，都係相當懸殊咖可？我話你知，如果我地真係要搞死你同你屋企嘅話，對黃氏絕對都唔係咩困難嘅事，所以你最好自己自重一下啦。」
 
「而且，你要講嘅咪返去學校同5A講囉，我黃家大小姐無任歡迎，就即管睇下佢地會信你呀，定還是會信我講野吖啦？林俊軒！天榮集團喎！哈哈哈！真係笑大我個口呀！」

俊軒面對呢個情況，當然都唔係省油的燈，於是...

（待續 ~）

IG link https://instagram.com/bear_big_big_writer