《愛在。貴族學園》: Ch 18 ~ 鬧翻 Part 15

Ch 18 ~ 鬧翻 Part 15（連載日期：2022/09/24）

俊軒面對呢個情況，當然都唔係省油的燈，於是都帶有口氣回應嘉惠「隨便你點諗啦！不過我希望你都可以吸取一下，李家二孫之前被曹家公子推倒嘅教訓。另外我都真係唔好意思啦，我嘅朋友依家喺出面等緊我，失陪啦，黃同學！」

俊軒就此離開現場，向門口方向走去，而其他5A嘅同學都望咗嘉惠一個白眼之後，都離開嘉惠。

嘉惠對於全部人都離開自己，然後附近嘅賓客繼續望住自己嘅時候，大感無癮同尷尬咁話「車！我都唔明點解每個人都要護著佢呀？張韻喬只不過佢個樣係幾唔錯咋嘛！到底佢仲會有咩咁奇妙嘅光芒呀？！」
 
過多一陣，既然都冇人陪自己跳舞，嘉惠嘅心情既憤怒又失落，於是就眼紅紅咁，鼓起泡腮返埋自己位，再嬲爆爆咁坐喺位度抱怨「車！都唔好玩嘅呢個party！個個都針對我咁，都唔知出席嚟做咩？」





喺身邊嘅黃太，見到自己個女咁快返埋位，而且隻眼又紅哂咁，於是就關心下個女「惠惠，你頭先發生咩事呀？你唔係話要出去跳舞咖咩？做咩咁快返番嚟，隻眼又紅哂又嬲爆爆咁？」

嘉惠唔理其他賓客嘅眼光，就好似一個細路女咁，直接撲入黃太嘅懷裏，同黃太哭訴「咪就…..就係今日第一日返新學校，我嗰班裏面.....有…..有一個貧賤低級嘅女仔喺度，然後全班都為咗呢個女仔而蝦我呀！！」
 
「另外頭先….頭先我想同嗰個我鍾意嘅男仔跳舞，個男仔就話寧願要同嗰個貧賤低級嘅女仔跳…..都唔同我跳！話咩因為個低級女仔喺佢家人請嘅，所以一定唔會同我跳！媽咪呀！佢地由學校蝦我蝦到嚟呢個party呀！！」

黃太聽到嘉惠咁講，竟然全盤相信個女喺度歪曲事實，於是臉色隨即一沉，大怒道「咩話？！今日你第一日轉校，竟然發生咁多咁樣嘅事？！點解你頭先放學嗰陣，唔同我地講學校嘅事呀！？」
 
「但係我記得我地喺轉校之前，唔係已經打聽過，你會係全班裏面屋企最有錢嗰位同學咩！點解你會畀一個普通女仔搞到咁冇面呀？」黃太續道。





「係囉！」嘉惠隨即和應媽媽道，當然都係狡辯啦「佢地頭先有個男仔，仲話我咩“我恃著自己屋企有錢就，可以喺學校同呢個party上面為所欲為”喎！佢地真係太過分啦！」
 
「仲有呀，嗰個女仔蝦我之後，佢仲同其他人講話係我蝦佢呀！我都唔知點解啲人可以咁厚顔無恥咖！」嘉惠繼續哭訴嘅時候，黃太都喺度考慮幫個女討回所謂嘅公道。
 
不過，到底邊個先係喺度搬弄是非，大家都自然已經有答案。而且嘛，呢個世界係會有報應嘅。

黃太於是繼續拍拍嘉惠膊頭，安慰自己個女「呀女，你就唔好喊住先啦，呢度都好多uncle、auntie喺度。咁你可唔可以話畀媽媽知道，到底係邊個女仔，做咁多嘢去咁樣對付我個寶貝女呢？」

嘉惠聽到黃太咁樣講都開始收聲「呢……呢個女仔叫張韻喬，同我都係5A嘅，佢係全校唯一嘅窮人！媽媽你應該好容易會搵到。」
 




「好啦，媽咪我知道點做咖啦。寶貝女你放心啦，我一定唔會放過呢個蝦我個女嘅女仔！你就唔好再喊啦，你依家去洗手間洗個面先啦，喊到個妝都溶埋，就唔靚女呀！」黃太下定決心向韻喬、林家同張家報復。
 
「知道啦，多謝媽咪，我就知道媽咪係最錫我嘅！」嘉惠嘴角露出可怕嘅表情，因為喺黃太幫助之下，佢終於可以名正言順搞韻喬佢地。

（Ch 18 鬧翻 ~ 完）

IG link https://instagram.com/bear_big_big_writer