《愛在。貴族學園》: Ch 21 ~ 一巴掌 Part 7

Ch 21 ~ 一巴掌 Part 7（連載日期：2022/11/29）

「嗯…..一係咁啦，我幫你入去洗手間睇下佢，你就返去課室準備上堂先啦，費事一陣Ms張又閙我地啦！」天殷提議道，但俊軒就即刻拒絕

「我地一齊等啦，畢竟原本呃我阿媽個大話，都已經喺學校講咗出嚟啦，咁扮女朋友嘅事，自然依家變咗要每日都要做啦，既然要咁就更加要等埋小喬啦。」
 
「不過殷殷呀，其實呢…我對小喬真係認真嘅，因為經過咁多事之後，天殷你都應該知咖。所以，就算依家未正式追到小喬都好，我都要留喺小喬身邊照顧佢，由其是依家嘉惠對小喬敵意咁大嘅時候，就更加要企出嚟支持佢，同佢一齊面對。」
 
天殷非常滿意咁點點頭「咁好啦，我都希望你真係對小喬認真，畢竟小喬依家……其實已經開始慢慢鍾意你，所以你點都要照顧好佢。好啦，我唔講咁多先啦，我入去睇下佢先，你喺度等我一陣啦！」





「好！唔該！」天殷說罷就入咗洗手間。
 
喺推開洗手間度門之後，天殷就見到韻喬喺度洗面“你兩個使唔使咁快就咁心有靈犀呀？一個話洗面另一個就真係喺度洗面，想曬死本小姐咩！”天殷心裏諗起俊軒頭先嘅說話，就即刻喺心裏面講。
 
「喬喬，你點呀？塊面仲痛唔痛呀，拎嚟畀我睇下！」天殷拎咗幾張抹手紙畀韻喬，等韻喬可以抹乾塊面，然後抱一抱對方嘅腰間，以示對好姐妹嘅無限支持。
 
韻喬好快就接過紙巾「唔…唔該你呀殷殷，我洗個面之後叫做好少少啦，不過我塊面好似仲有少少痛咁。」韻喬一邊抹面一邊講，然後就摸住自己塊面「殷殷呀，一係麻煩你呢，幫我睇下係咪仲係好紅吖？唔該！」
 
喺天殷檢查過之後「喬喬呀，你塊面好似有少少紅喎，你一陣間要唔要戴返個口罩先上堂呀？我書包裏面有喎，我可以借一個畀你用！」天殷提議道。





但韻喬好快就拒絕咗天殷「唔使啦殷殷，我依家又冇做錯到，點解我要屈服畀黃同學喎？！而且唔戴嘅話，我可以畀其他同學睇到佢打我吖嘛！」韻喬其實到依家都仲有少少嬲，而且都好唔憤氣點解要咁樣畀人打。
 
「但係個印咁紅，我怕一陣間其他唔知情嘅同學，會誤會係林俊軒打你呀！你都係戴一戴，應該會好少少呢！」天殷堅持佢嘅立場「就咁決定啦喬喬！唔好同我say no啦！」
 
韻喬見天殷咁堅持，就唯有點點頭聽從，同時將自己個頭挨落天殷膊頭度「真係好多謝你呀殷殷！以前就話我幫你搵朋友啫，依家竟然要你掉返轉嚟安慰我！搞到我都唔知要點還個人情畀你……」
 
韻喬開始掩住自己個嘴，然後開始眼紅紅。天殷知道韻喬想點，於是就話「喬喬你唔好又喊啦，再喊就唔靚女咖啦！好啦，而且唔好要軒仔喺出面等你太耐啦，而且外面今日又大風，我地唔好冷親佢啦！」韻喬聽完之後就點點頭，再同天殷踏出洗手間，會合返俊軒。
 
「有冇好啲呀，小喬？陰功囉，無啦啦畀惠嘉打到塊面紅哂！唔得一陣真係要同老師講」俊軒喺見到韻喬之後，就好輕聲咁問侯道。





「我冇咩事啦，多謝你地關心我，天殷、小軒！」韻喬報以微笑感激佢嘅兩位好朋友。
 
「噹噹噹噹……」學校上堂嘅鐘聲隨之響起「好啦，我地要行快少少啦，如果唔係Ms張快過我地到班房就麻煩啦！」天殷催促韻喬同俊軒，不過自己就故意行前少少，等俊軒同韻喬兩個可以一齊行。
 
同頭先出去嘅時候一樣，當兩人經過其他同級嘅班房嗰陣，有唔少隔離班嘅同學都專登望出去，覺得俊軒同韻喬會一齊行，表示不可思議。

畢竟大家都覺得俊軒同韻喬之前仲係勢如水火，但都估唔到，依家嘅韻喬居然會同俊軒一齊行。

（待續 ~）

IG link https://instagram.com/bear_big_big_writer