《愛在。貴族學園》: Ch 21 ~ 一巴掌 Part 9

Ch 21 ~ 一巴掌 Part 9（連載日期：2022/12/06）

其實經過一連串事件之後，依家距離上學期考試都越來越近，喺老師講解得越來越快，同埋都越來越深入嘅時候，上堂嘅時間都過得特別快。

而部分老師喺見到韻喬復課之後，都表示非常高興，同時都慰問一下韻喬嘅身體同康復情況如何。

至於嘉惠，有時候都要同第一次見面嘅老師，再做自我介紹，等老師可以更快認識自己。正如頭先都話過，上堂嘅時間都過得好快，所以轉眼間就到咗lunchtime嘅時候。

天殷喺一打鐘之後，就即刻拖住韻喬，然後走去俊軒同禮謙個位度，就同兩位男仔講話「軒仔、謙謙呀，今日我地係咪照舊四個人一齊食飯呀？」
 




「呢個就梗係啦！喂我地仲企喺度做咩呀？！仲唔快啲落去canteen度霸位！？大佬呀我今日好肚餓啊！」俊軒唔知做咩，非常心急咁同其他人講。
 
「林公子！你今日咁多嘢要處理，仲掛住食！？你至少都要顧掂你自己個”女朋友“先啦！」當然，禮謙都係故意高少少音量，去講出呢句說話，目的就係想嘉惠聽到，以示抗議。
 
而韻喬聽到之後，就睥咗禮謙一眼，然後就話「嗯，咁一係你地兩個去霸位先囉，然後我同小軒去買野食先好唔好？」喺大家都同意之後，天殷同禮謙於是就行快兩步，落去飯堂度霸咗位先。

當佢地兩個搵到個四人位坐低之後，天殷就好緊張捉住禮謙講話「唉呀謙謙呀！依家件事搞到好似好複雜咁，而且都已經超出當初我地幫小軒嘅範圍啦。如果再係咁樣落去，除非佢地繼續講大話嘅話，我都真係唔知點算呀？」
 
「而且，嘉惠依家仲要咁樣去針對喬喬喎！我怕再咁樣落去，喬喬同小軒之間嘅感情，好大機會唔可以開花結果啦。而且……都唔好講話要咩開花結果啦，搞得唔好嘅話，隨時連發芽都唔可能添呀！唉呀今次真係好煩呀！！！」天殷差少少就想R爆自己個頭。





禮謙聽到之後摸下自己個額頭道「咪就係，雖然到依家我都仲未正式話退出同小軒爭小喬同學嘅戰爭。但係對於嘉惠同學呢種”盲搶軒“行為，可能真係會浪費咗我嘅一番心機都唔出奇。」天殷聽到之後點點頭。
 
「不過天殷呀，其實黃嘉惠同學今朝嘅說話，我諗多兩諗之後，真係有少少耐人尋味下，到底咩係”自然有自己特有嘅辦法“呢？」

「係呀！我都覺得有啲奇怪，基本上件事一定冇可能就咁完…」天殷專登細聲少少咁答禮謙。

「我都係咁覺得呀天殷。不過，如果我嘅直覺係冇錯嘅話，唔知點解我會覺得，軒少將來可能會同黃嘉惠同學，會有一段政治感情，不過其實可以話係只有政治，但係就係冇感情咋嘛！」禮謙繼續講。
 
「政治感情？謙謙你咁講……即係咩意思呀？！」天殷聽到嗱埋口面咁問「而且你咁講嘅話……會唔會傷害到喬喬咖？」
 




「政治感情……咪就好似嗰個大台啲劇集套路咁，由兩家人嘅家長，安排男女主角拍拖、結婚。但最後可能兩個男女主角都唔會開心、幸福，甚至打從一開始就已經唔開心，最後就可能會離婚收場甚至殺人都唔出奇。我意思大概就係咁啦，總之成件事就係好狗血同埋公式化啦。」禮謙試圖同天殷解釋。

「喂，你地兩個喺度講緊咩講到咁投入呀？？」

（待續 ~）

IG link https://instagram.com/bear_big_big_writer