《愛在。貴族學園》: Ch 21 ~ 一巴掌 Part 10

Ch 21 ~ 一巴掌 Part 10（連載日期：2022/12/09）

「喂，你地兩個喺度講緊咩講到咁投入呀？？」去咗買午餐嘅韻喬同俊軒，突然間拎住自己嘅午飯出現，嚇到正喺度討論眼前兩人嘅天殷同禮謙，差少少就成個彈起「嘩！你地兩個做咩突然間出現咁恐怖嘅！？」

「咩突然出現咁恐怖呀？！我地買完嘢食啦嘛，咪過返嚟搵你地囉！」俊軒一邊坐低一邊放低自己同韻喬嘅食物講「不過，見你地兩個講到七情上面咁，應該都係有八卦聽啦！嗱，大家咁熟不如講嚟聽聽啦！！喂小喬，你個飯！」

「唔該你……小軒！」韻喬喺俊軒手上接過自己嘅食物然後放低。

天殷煞有介事咁去回應俊軒嘅提問「我……我地冇講過咩呀！只不過頭先我地喺度傾緊啲明星八掛嘢，講下大台啲膠劇咋嘛，係咪呀謙謙？」
 




「係……係囉天殷，我有時我睇嚟睇去都唔明，唔知點解大台啲套路可以咁冇新意啫？而且有時候都覺得編劇，有時候寫嘅劇情真係好荒唐同公式化啫！」但係禮謙都已經唔知道，要點樣繼續接落去，所以就話……

「天殷同學，我地都係去買嘢食先啦，我怕一陣間我地想食嘅嘢會賣哂，不如我地一陣先再傾啦，軒仔、小喬！」

「好呀！謙謙！」禮謙之後就急急腳咁，拉住天殷隻手出去買食物。

不過，正因為禮謙呢一下嘅動作，搞到天殷心裏面，猶如小鹿亂撞咁劇烈跳動，呼吸不斷加速之餘，而且塊面都好紅咁。

「喔！咁我同小軒食住飯等你兩個先啦！」韻喬於是就開始打開自己個飯，同時又碰一碰俊軒隻手「小軒呀，唔知你頭先覺唔覺得呢，殷殷同禮謙佢地兩個都好似怪怪地咁呀？」
 




俊軒一邊打開食物一邊點點頭話「我都覺得啊小喬，佢地兩個好明顯喺度講緊大話啦，無啦啦喺度講咩大台膠劇套路先得咖！哇好肚餓呀小喬，我都係食野先啦！」俊軒話口未完，就已經開始食飯，而且仲要食得好急下。
 
但係，俊軒如斯誇張嘅食相，根本就唔似一個富家公子所為，就令到韻喬顯得非常不滿，於是就鼓起泡腮話「死人頭林俊軒！你有冇咁誇張呀！死到臨頭都仲係剩係識得食飯，食懵你呀食食食！」
 
然而，俊軒其實都仲未非常清楚韻喬嘅性格，於是就口輕輕話「咁我真係好肚餓呀嘛！不過小喬喬呀，如果你想男朋友餵你食飯嘅話，咁你咪出聲囉！我實做得…….哇！！！痛！」

不過，俊軒講出呢番話，再順便夾菜去韻喬盒飯度嘅時候，韻喬一腳踢咗落俊軒度。
 
「阿…張韻喬呀！你可唔可以唔好咁暴力呢？人地都係好心想夾條菜畀你啫，你都唔使咁樣對我下話？！」俊軒非常無奈，而且面容扭曲咁講，同時都彎低個身，睇下隻小腿有冇畀韻喬踢到流血。
 




「咩呀！明明係你頭先喺度亂講嘢在先呀！？但我同你講我係咁暴力咖啦，唔得、唔鍾意嘅，你就唔…..好…….咩我啦！哼！」韻喬雖然好嬲，但講到後面嘅時候，塊面已經紅哂。

而喺佢地喺度打鬧嘅時候，天殷同禮謙都買完食物返嚟，之後四個人就好一邊食飯一邊傾其他嘢。
 
「小喬呀！我想問呢，你今日放咗學之後有冇嘢做呀？」俊軒突然打破四人食飯嘅沉默，徐徐開口問道。

而被叫嘅韻喬，自然用一個非常驚奇嘅表情望住俊軒。

至於天殷同禮謙，大概都知道俊軒想做咩，於是都冇出聲，想睇下韻喬嘅反應。

（待續 ~）

IG link https://instagram.com/bear_big_big_writer