《愛在。貴族學園》: Ch 21 ~ 一巴掌 Part 11

Ch 21 ~ 一巴掌 Part 11（連載日期：2022/12/13）

「小喬呀！我想問呢，你今日放咗學之後有冇嘢做呀？」

「嗯？今日我放咗學之後…應該都冇咩做呀。不過我想去圖書館搵一搵書呀，做咩呀小軒？你係咪……要陪我一齊？」韻喬突然之間不由自主咁，哄到個人好近咁望住俊軒講，搞到俊軒一時之間都好怕醜而且都唔知道要點反應，仲有少少想縮後個人咁。
 
「今日我都…呃……可……可以陪你呀，不過我地去圖書館之前，我地都要先去搵Ms張先喎！」俊軒收起頭先嘅嬉皮笑臉，非常認真咁望住韻喬。
 
「搵Ms張？做咩呀小軒？你有嘢頭先冇同佢講咩？」韻喬用一個非常疑惑嘅語調問俊軒，而且韻喬都因為自己喺位度做嘢，而冇為意到俊軒喺小息嘅時候，曾經出去同Ms張講過幾句「定小軒你係咪有嘢唔識呀？唔識嘅話我可以教你哦！」
 




俊軒聽到韻喬咁樣講，自然非常心動，但同時間都hand埋機唔識反應。天殷見到俊軒咁樣先係喺心裏面暗笑，然後就好認真咁放低筷子話「嗯喬喬呀，軒仔唔係有嘢唔識所以搵Ms張。而其實係因為我地幾個一致同意，想將小嘉欺凌你嘅事，同Ms張講清楚，包括上星期五晚party上發生嘅事。」
 
韻喬聽到之後碌大眼道「殷殷呀，點解你地要……咁做喎？就算你話佢喺學校打我就可以告啫。但係party裏面發生嘅事，都唔係喺學校裏面發生，而且又唔係學校活動，或者返學時間裏面發生，就算你地同Ms張講嘅話，學校又點會處理呢？」
 
「小喬，請你冷靜少少聽埋我地講先！」今次到禮謙解釋咁做嘅緣由「其實我地會講喺party發生嘅嘢，都只不過係佐證，畢竟主要要同Ms張講嘅事，都係今朝嘉惠同學無端端喺課室打你，而打你嘅動機，都係因為喺party裏面，你同俊軒kiss嘅事…」
 
「不過小喬呀，其實我地幾個考慮過之後就覺得，如果可以由你親口講出嚟嘅話，Ms張會比較容易相信，然後pass去disclipine嗰邊跟進嘅機會都大啲。但如果你唔想講嘅話，我地三個都可以幫你講，但係最好你都在場啦！」俊軒眼神好堅定咁望住韻喬話。
 
聽到俊軒咁講，韻喬一時之間深受感動，同時覺得自己個心跳得好快，連之前對住俊軒嗰種亂紅心跳感覺，又再一次出現。





所以韻喬喺心裏面都再一次問自己“唔通我真係……鍾意咗小軒？點解每次佢幫我嘅時候，我都會有呢種感覺？無可能……無可能咖！”
 
「喬喬！？喬喬！？你做咩突然之間呆咗嘅？」天殷嘅一句話，又一次將韻喬拉返出嚟現實，但係韻喬都仲係覺得，自己個身都係好熱「你係咪又唔舒服呀？」
 
「我冇……冇嘢呀。既然你地都講到咁，咁我都無謂拒絕你地嘅好意啦！咁一陣放學之後，我同你地一齊去搵Ms張啦。但係，我都要多謝你地幾個，咁多次都咁義不容辭去幫我…」韻喬低頭感激佢地三個。
 
「唉呀喬喬呀，我地幾個friend嚟咖嘛，成日都咁客氣講呢啲嘅！？」天殷搭住韻喬膊頭道「不過，如果你要多謝嘅話，你就多謝軒仔啦，因為係佢主動話要幫你篤灰告發嘉惠同學咖！」
 
韻喬聽到之後，就對住俊軒鼓起泡腮扮到好嬲咁講「林俊軒！！你真係好鬼多事咖喎！我有話過要你出聲幫我咩？！」然後一拳打落去俊軒個肚度。天殷同禮謙見到韻喬又出手之後，先係非常愕然，然後就喺度大笑。
 




「哇！！你使唔使咁大力！……嘩幫你都仲要畀你打！張韻喬你個暴力女！」俊軒彎低身摸住自己個肚，狀甚痛苦。

而天殷都話「哎呀，喬喬你就唔好口不對心啦，明明你頭先個樣，就話緊畀我地知你好想軒仔幫你出氣！」

（待續 ~）

IG link https://instagram.com/bear_big_big_writer