《愛在。貴族學園》: Ch 24 ~ 心碎 Part 15

Ch 24 ~ 心碎 Part 15（連載日期：2023/04/07）

喺同天殷等車嘅時候「你呀，返到屋企記得signal我呀，知唔知呀？！」韻喬吩咐天殷道。

「得啦，長氣鬼，真係煩過我媽媽呀！都唔知小軒第日忍唔忍到你咁添呀哈哈哈！」天殷古古惑惑咁對韻喬講。
 
韻喬自然就即刻面紅，然後就好似對住俊軒咁，一嘢拍落天殷手臂度，不過就比起打俊軒嘅力度細力少少「喂呀！李天殷你個死人頭！我幾時……有話過鍾意林俊軒嗰個衰人呀？」
 
「哈哈！張韻喬！鐘唔鍾意林俊軒呢，你就真係要問你自己啦！不過，由你最近嘅動靜上面見到，恐怕你嘅潛意識都已經出賣咗你自己啦」天殷一改平日喺學校嘅嬉皮笑臉，語重心長咁同韻喬講……





「而且有時候，有啲嘢到最後都係要自己勇敢面對，咁樣對大家先會有好處咖，自己今晚或者聽日再諗清楚啦！好啦，車嚟啦，我走啦，星期一返學校見啦！」李家座駕同時間都去到北角，天殷就等司機開門之後就上車離去。

而韻喬喺送完天殷返上屋企之後，就好安靜咁喺客廳陪住張太睇電視。

不過佢好快都再一次，記起天殷同自己講過嘅說話，然後再記起今日成日都冇見過嘅俊軒，於是就自己一個返入房，想話搵俊軒傾計。

正如之前都講過，俊軒同韻喬經歷過咁多事之後，都開始慢慢再同對方認識同傾密計，以及傾下功課咁，基本上已經進化到日日都傾。

不過，俊軒今日一直都冇覆韻喬嘅訊息，都搞到韻喬心裏面越來越掛住對方。
 




至於天殷，佢喺同家人出去食完飯、返到李家大宅之後，就即刻同俊軒、禮謙兩個男仔，交代返下晝同韻喬見面所發生過嘅事。

不過，俊軒同禮謙兩個聽完之後，都冇咩特別野講「軒仔，我想問下你爸爸媽媽仲有冇講更多關於聽日黃家上去你屋企嘅嘢啊？」天殷好好奇咁問。
 
「冇啦殷殷，而且我都有問過佢地，我使唔使留埋喺屋企，陪埋佢地一齊同黃家傾生意。不過我啊媽就話都係大人傾生意嘅時間，留我喺度我都只會覺得悶，再加上我都應該要同小喬去“拍拖”，所以咪唔使我留喎…」俊軒都解答返天殷嘅疑問。
 
「照Auntie咁講嘅意思，我諗林auntie甚至林uncle應該都唔知道，黃家聽日到你地屋企，係同嘉惠同學有關。但我怕到時候黃家一提出要求，林uncle、auntie可能會被嚇親，而且未必知道要點應對。」禮謙好快就同另外兩個人分析。
 
「點解咁講呀謙謙？」天殷表示非常疑惑，所以禮謙就繼續講落去...





「始終小軒之前同林auntie講過，小喬係佢女朋友嘛！但依家殺個黃嘉惠出嚟話要搶人，你話點會唔嚇親！分分鐘仲以為自己個仔咁有本事，可以一腳踏兩船添！」

「原來係咁！」天殷明白之後，就繼續同兩個男仔，決定整個行動嘅細節。

經過上次喺林家“見家長”穿煲事件之後，今次佢地幾個喺計算上，就要更加精密，做到滴水不漏，等女主角韻喬冇咁容易懷疑同發現。
 
「唉，我都唔知點同佢地解釋呀…」俊軒好無奈咁講，但之後就好大決心咁話「但唔理點樣都好，我都希望聽日“和你一起”個行動大成功啦！無論如何，聽日一定要將張韻喬追到手！咁先至可以同黃嘉惠一決高下！」

「哈哈！好有火呀！不過軒仔你喺得到我地喬喬嘅愛之後，你都要keep住依家呢團火，然後好好咁照顧佢呀！知道未呀？」天殷再一次提醒俊軒。

「知道啦！好啦，講講下原來時候都唔早啦，大家聽日照頭先嘅計劃，12點去到瑪麗醫院急症室見啦！bye！」

「晚安啦，聽日加油呀小軒！！」天殷同禮謙答完俊軒之後，就各自收線。

不過，俊軒就見到韻喬搵咗自己好多次，初時都話想唔搵韻喬，等對方可以掛住自己多少少。





但最後俊軒都唔忍心，而且都怕韻喬會諗得太多，所以俊軒最後都同韻喬，傾咗20分鐘電話，先再去休息。

（Ch 24 心碎 ~ 完）

IG link https://instagram.com/bear_big_big_writer