Ch 25 ~ 開始 Part 1(連載日期:2023/04/11)

講咗咁耐,終於都嚟到星期日,就係大家要幫韻喬同俊軒喺埋一齊嘅大日子。而俊軒、禮謙同天殷三人,喺中午十二點之前,齊集瑪麗醫院急症室外面(作者按:醫院乃係需要分秒必爭救治傷病嘅地方,請各位讀者嚴禁模仿幾位主角嘅行為,以免妨礙醫院正常運作)
 
但同時都因為係星期日嘅關係,好多私家診所都冇開門,所以醫院都有唔少人去急症室睇醫生,多數都係感冒、發燒、腸胃炎之類嘅病症,偶爾先可能會有一個比較急嘅病人需要治理。

「一陣間,我就同謙謙會匿埋一邊先,軒仔你就由治療室嗰邊行出門口,然後再行過嚟……」身為軍師嘅天殷對俊軒做最後吩咐道。

「知道啦,軍師!做到之後,我一定會好好咁報答你!」俊軒搭住天殷膊頭道,不過天殷就打一打俊軒手背。
 


「死人頭!都就快有女朋友啦,竟然仲咁夠膽抽本小姐水喎!」天殷鼓起泡腮咁對俊軒表達不滿「咁你地兩個ready未?如果都ready嘅話,我就打電話通知小喬過嚟咖啦!」

俊軒同禮謙都點點頭之後,就等天殷醖釀情緒。過咗一陣之後,天殷就打電話畀韻喬。而俊軒都專登掛咗號,話自己胃唔舒服,要睇醫生。
 
韻喬好快就聽咗電話「喂,殷殷?你搵我做咩事呀?」不過因為天殷未正式開口,所以韻喬就好似平時嘅語氣,去接天殷嘅電話。
 
「嗚嗚嗚……小喬,大件事啦…..%^&$%#」戲精上身嘅天殷,醖釀完嘅情緒非常到位,喊哂口咁同電話裏面嘅韻喬講。

而喺旁邊嘅俊軒同禮謙,喺睇到天殷嘅賣力演出之後,就好辛苦咁喺度忍笑,當然其他病人都望下佢地到底發生咩事啦。
 


「殷殷!你做咩事呀?做咩一打嚟就喊呀?!喂你唔好喊住先、冷靜啲慢慢話我知發生咩事先啦好冇?你講到咁我都聽唔到你喺度講咩?!」電話裏面嘅韻喬,語氣冷靜之中又帶點緊張,畢竟都估唔到會接到個咁嘅電話。

天殷為求逼真自然,於是就繼續喺度喊,之後先慢慢咁調整好心情。喺收聲過後,天殷再同韻喬慢慢講「小喬呀,頭…頭先小軒同禮謙佢地兩…兩個出街途中發…發生咗意外啊!嗚嗚嗚……」此時佢地之間嘅氣氛又再度緊張起嚟。
 
「下,點解無端端會咁咖!天殷呀!你冷靜少少話我知,到底佢地發生咩事?同埋會唔會好嚴重呀?不過殷殷你就唔好喊得咁誇張先啦,醜怪呀!」韻喬繼續保持冷靜嘅頭腦,繼續問天殷關於佢地“出事”嘅詳情。
 
「頭……頭先小軒同禮謙兩個,約埋去唔知做咩,但係佢地喺半路中途發…發生咗交通意外呀……」天殷繼續喊哂口咁喺度講「然後小軒頭先send signal同……同我講,話我知佢同謙謙兩個都受咗傷呀!嗚嗚嗚!」

韻喬喺聽到俊軒同禮謙兩個都受傷之後,就終於都開始忍唔住自己嘅情緒,開始有少少想喊,然後就再問天殷話「咩話?!佢地撞車出事?點解會咁咖?不過殷殷,我想問你知唔知,到底小軒畀人送咗去邊間醫院呀?」
 


俊軒喺聽到韻喬關心嘅人係自己之後,就用一個暗爽嘅表情對住天殷。天殷喺見到之後就差少少破防笑出聲,但係天殷就即刻打眼色,叫俊軒安慰冇被韻喬問候嘅禮謙。

而天殷就繼續同韻喬講「呃,小……小軒同我講話,謙謙佢會被送去律敦治醫院,而小軒就話會送去瑪麗醫院喎!喬喬,你要去睇哂佢地兩個?但…但係佢地兩個喺……唔同醫院喎!」
 
天殷之所以要喺劇本度,安排俊軒同禮謙被“送”去唔同嘅醫院,無非就係要韻喬必須二揀一,選擇到底去睇邊一個,從而佢地就可以知道,韻喬嘅潛意識到底係鍾意俊軒定禮謙多啲。

「嗯。咁好啦,唔該殷殷,我依家即刻過嚟睇佢,你就唔好再喊得咁傷心啦!佢地一定……一定會冇事咖!一陣見啦!Bye!」

「小喬你去…….」天殷都仲未講完,韻喬就即刻cut咗線。

(待續 ~)

IG link https://instagram.com/bear_big_big_writer
已有 0 人追稿