Ch 25 ~ 開始 Part 3(連載日期:2023/04/18)

「喬喬呀,依家軒仔佢喺治療室裏面,醫生幫佢檢查緊啦!」天殷嘅語氣相對頭先嚟見係平靜咗少少,畢竟都唔想自己嘅大話會驚動急症室裏面嘅醫護人員「喬喬你去到邊呀?」

「我依家去到西營盤,應該…好快就到咖啦,幫我叫小軒撐住呀!嗚嗚嗚!」韻喬又心急到開始喊。

「我會咖啦,你都小心啲啦,知道未呀!」天殷安慰韻喬道「好啦,唔該殷殷,拜拜!」

喺收線之後,韻喬依然都仲係好心急,於是就同的士司機講話「司機大哥,求下你可唔可以再開快少少呀!我趕住去醫院見個好緊要嘅人呀!我唔想佢有事!唔該你啦!」
 


「我盡量啦妹妹,不過呢條都係山路嚟,都唔可以開太快,而且都好容易畀人影快相咖!不過妹妹你放心啦,你要見嘅人一定唔會咁容易有事嘅!」的士司機一邊揸車一邊安慰韻喬「多謝你先呀,希望真係唔係受重傷啦!」

同一時間,當天殷收線之後,就喺Signal同俊軒、禮謙講...

「5A李天殷:喂軒仔,喬喬話已經去到西營盤啦,你準備好未呀?        12:50」

「5A林俊軒:咁快?嘩!我都係再準備一下先!        12:51」

「5A李天殷:係呀,應該仲有幾分鐘就到,不過頭先我聽到喬喬好緊張咁         12:51」
「5A李天殷:我諗一陣間喬喬見到你冇事嘅樣,應該都會扮嬲你,然後我覺得佢都會應承你嘅        12:52」



「5A林俊軒:希望啦           12:52」

過多差唔多10分鐘,韻喬坐嘅的士就嚟到瑪麗醫院急症室門口「妹妹多謝,要唔要單?」司機問。

「唔使啦,唔該司機!」韻喬將的士車費交比司機同找錢之後,就一支箭咁衝入急症室大堂。

「小軒!小軒!你喺邊呀?小軒!……」韻喬一進入急症室大堂,就不停咁大叫,去搵“受傷”嘅俊軒。

不過,韻喬由繳費處、分流處到治療室,搵咗好幾分鐘,都搵唔到俊軒嘅身影,就連通知自己嘅天殷,以及5A其他同學,都唔係度,搞到韻喬心裏面嘅不安感就更加大。


 
而坐近門口匿埋一邊、喺度扮睇報紙等見醫生嘅禮謙,喺見到韻喬急步衝入急症室大堂之後,就喺耳機度同天殷、俊軒講「喂兩位,小喬已經入咗大堂啦!依家不停咁喺度叫緊小軒你個名!」
 
「收到,我自己會睇住…….等等先……我聽到佢越來越大聲!小喬好似過緊嚟我呢邊啦!」俊軒喺男厠裏面好緊張咁講。

正如之前講過,今日為咗再做得逼真啲,俊軒其實有掛號睇醫生,不過係去睇胃痛,而且到依家都未到俊軒見醫生。
 
「謙謙呀,你依家見唔見到喬喬佢行咗去邊個方向呀?」而收埋自己喺藥房附近、扮等攞藥嘅天殷,喺聽到上面俊軒同禮謙嘅對話之後,同樣都變得非常緊張咁問禮謙韻喬嘅去向。
 
「應該唔係去你嗰邊啦,放心啦殷殷…」禮謙依然好細聲咁回答“小軒、小軒!你喺邊呀?”「喂兩位,我又聽到小喬叫我啦,我諗我都唔好再拖延時間啦,應該要出去咖啦!」

俊軒喺耳機裏面通知兩位,於是天殷就話「大家都準備啦,正式埋尾啦!加油呀林俊軒!」
 
之後,俊軒就慢慢咁離開收埋自己嘅男厠,行出醫院走廊橫視兩邊,就喺望向右邊嘅時候,見到好緊張咁喺度搵緊自己嘅韻喬「小軒、小軒!」俊軒聽到韻喬凄厲嘅喊聲,心裏面頓時變得百感交集。
 


一來自己都好唔忍心,要韻喬為自己喊得咁傷心難過,甚至畀醫院嘅人,當咗韻喬係傻人嚟睇。

但同時都因為今日嘅安排,俊軒對於韻喬,已經將自己當成心裏面最重要嘅人,心感安慰,至少之前嘅努力追求,最終到有得到回報。

然而,俊軒都知道,就算可以同心愛嘅韻喬一齊都好,喺佢地呢段得來不易嘅關係後面,其實都背負住一個隱憂,就係已經沉默咗幾個禮拜嘅嘉惠,到底今日會喺自己屋企度,同黃氏伉儷搞咩花款逼自己就範。

俊軒於是就望向韻喬背影嘅方向,認為自己都係時候,將眼前嘅美人兒嘅心緊緊收好喺自己手上,於是就好大聲咁講...

(待續 ~)

IG link https://instagram.com/bear_big_big_writer
已有 0 人追稿