《愛在。貴族學園》: Ch 25 ~ 開始 Part 2

Ch 25 ~ 開始 Part 2（連載日期：2023/04/14）

「張韻喬……你真係呀……我都未講完，使唔使cut線cut得咁快呀？！」天殷講完之後就即刻失控狂笑。

然後就望住一臉灰嘅禮謙「哎呀謙謙呀，你就唔好咁灰機先啦。雖然喬喬潛意識上唔鍾意你啫，但係以你嘅條件，應該都……有人會…睇上你嘅！順其自然啦呢啲嘢！」但係天殷講嘅時候，塊面都變得好紅。
 
「你兩個唔使咁擔心我喎，我真係冇嘢！」禮謙好豁達咁講「其實喺圖書館件事上面，甚至之前我同喺醫院留醫嘅小喬表白之後，我都已經做好咗心理準備咖啦，所以，其實小喬最後冇揀，我都無所謂啦。」
 
「依家嘅我，都只係希望小軒可以好好咁對小喬同學，然後兩個都可以好幸福咁，一直行落去，我就已經好滿足啦。」禮謙搭一搭俊軒膊頭「以後小喬嘅幸福就正式交畀你啦！」





「嘩！估唔到你會咁大愛喎謙謙，心地真係好好呢！」收拾好情緒嘅天殷微笑咁講「不過軒少呀，唔該你真係唔好浪費謙謙嘅一番心機同期望啊！人地都係因為愛喬喬、想喬喬幸福先放手畀你咋！知道未呀！？」
 
「知道啦長氣！不過我估小喬應該會坐的士過嚟醫院，大家都係盡快去stand-by先得！」俊軒有少少緊張咁講「你地兩個搵到地方收埋自己未咖？唔好一陣間咁容易就畀小喬發現呀！」
 
「哈！你就同我地兩個少擔心啦！我一早就已經搵到啦！！等陣你自己執生啦林俊軒！」天殷自信滿滿道「謙謙王子你都係呀！知道未呀！」

「知道啦！Good show啦一陣，好兄弟！」之後佢地幾個都暫時分開，靜待韻喬上到嚟瑪麗醫院。

當然，佢地幾個都好緊張，到底喺韻喬嚟到之後，會發生點樣嘅結局。所以喺電話裏面，佢地都要一邊傾計，一邊交換情報，一邊去舒緩一下緊張嘅氣氛，同埋因為期待而所產生嘅不安感。
 




而喺同一時間，當韻喬非常匆忙同焦急咁收線之後，連涼都唔夠時間冲，就即刻喺房求其換好套衫，再孭埋個有銀包、電話嘅斜孭袋仔，之後再衝出去門口着鞋。

喺見到韻喬突然之間咁匆忙咁出門口，自然就引起張太嘅注意「咦？呀女你做咩突然之間咁急趕嘅？係咪你約咗人但訓到唔知時間遲到呀？」
 
「唔係呀媽媽，我……我地有兩個同學出咗事，我地依家全班出去，睇下佢地咩情況！」韻喬一邊着鞋一邊好急咁講。

「下？咁大件事呀？你地班主任知道未呀？咁你今晚返唔返屋企食飯呀乖女？」連好少出場嘅張生都關心一下。

「我都唔知呀，我都係啱啱先知道咋，不過你地都係預我應該唔返先啦！好啦我要出去啦，bye bye爸爸媽媽！」





「小心啲呀阿女，唔好亂過馬路呀！」「知啦！」落樓之後，韻喬好快就走出渣華道搵的士。

不過咁啱得咁好彩，韻喬只係等咗一分鐘就有的士，就好似個天幫韻喬打助攻咁。

韻喬一上到的士，就好急趕同司機講「司機，我要去瑪麗醫院急症室，不過麻煩快少少呀唔該！」「收到，妹妹！想行香港仔隧道定行薄扶林？」

「是但啦，行最快唔塞車嘅路就得，唔該你。」韻喬此刻根本都冇心情，心裏面只係擔心俊軒嘅情況係點。
 
韻喬講完之後，司機就將車由渣華道開上東區走廊，然後行過中環灣仔繞道，唔使十分鐘就已經去到西營盤，準備由西邊街（呢個平時成日塞車嘅地方）轉上去薄扶林道。
 
「小軒呀小軒，求下你啦，希望……希望你唔好有事，吉人天相啦！你……你掉低我嘅話，我地以後點……點算喎！」韻喬此時眼淚開始爆發，因為怕俊軒喺交通意外受重傷而捱唔住。

同時，韻喬都再一次打電話畀天殷，想update下俊軒嘅最新情況……

（待續 ~）





IG link https://instagram.com/bear_big_big_writer