《愛在。貴族學園》: Ch 26 ~ 好景不長 Part 1

Ch 26 ~ 好景不長 Part 1（連載日期：2023/06/04）

俊軒講完上面簡單嘅表白之後，韻喬内心就震蕩得好厲害，因為韻喬睇得出，再配合返近期大家相處嘅情形，俊軒今次係認真，而唔係好似以前對住其他女同學咁，喺度玩弄自己嘅感情。

而韻喬喺自己嘅腦海裏面，好快咁將呢半個學期同俊軒嘅一點一滴，快速咁喺腦海入面投影住。

於是韻喬喺諗咗兩諗之後，就將原本因為想掉頭離開，而將已經鬆開咗嘅手，重新咁拖起俊軒，面紅紅甜甜一笑咁對住俊軒講「傻瓜呀，到咗呢個時候，你都已經做到咁啦，乜我仲可以話唔可以咩，林俊軒先生？」

俊軒喺聽到韻喬咁快應承自己之後，即刻先驚後喜咁對個女朋友話「多……多謝你呀小喬！嗱，不過講明先啊小喬喬！我地冇逼你同我一齊咖，係你自己應承話做我女朋友咖！」





之後，俊軒就輕輕咁將韻喬收入自己懷中，一對新嘅小情侶，都洋溢出一副幸福嘅表情。

韻喬即刻鼓起泡腮表達少不滿話「好啦好啦！我都冇話你地逼我，做咩咁快同我割席呀？下？阿男朋友先生！」

衆人隨即哈哈大笑，然後俊軒就趁機，輕輕錫咗韻喬塊面一啖。

而面對自己喜歡嘅男仔錫自己，韻喬當然冇抗拒，而且仲笑得好甜咁，望返自己個男朋友。

旁邊兩位花生友都睇得非常興奮同投入，而天殷仲好高興咁微笑話「Wow！喬喬終於應承軒仔啦！依家真係皆大歡喜啦。不過真係吖，我地搞咗咁多野，邊個都估唔到喬喬會咁容易應承都有嘅，早知我地就唔搞咁多嘢啦！」
 




韻喬聽到天殷講完呢句，並冇即刻回答天殷，就直接望向俊軒同禮謙，然而兩個都即刻笑到鬆唔到，韻喬就知道成件事都係天殷一手策劃，於是鬆開拖實俊軒嘅手，然後就打落天殷手臂度「李天殷你個衰人！你終於露出你嘅狐狸尾巴，肯認呢壇野係你諗出嚟嘅屎橋嚟啦咩？！」
 
「冇錯呀小喬！不過好坦白，成件事其實一開始就係為咗你地兩個先會開始計劃，而且以天殷嘅性格，佢做得出嘅話都絕對唔意外吧！」禮謙笑住咁回應「依家你同俊軒可以成為一對，你就接受佢嘅一番好意啦，小喬！」
 
「你仲好講喎！程禮謙！你到底仲係唔係鐘意我咖！？」韻喬繼續對有份策劃同參與今次事件嘅人問責。

但係禮謙就冇再講太多，只係送上祝福話「小喬，到咗呢個時候，呢個都已經唔重要啦，畢竟你依家已經有咗俊軒啦。而且，呢個世界上面有一種愛，叫默默祝福。你地兩個可以幸福，對我就已經好好咖啦，之後一定好好咁同俊軒相處呀！」
 
「嘖，有冇咁偉大呀你程禮謙？不過你就放心啦，我一定會應承，而且都做到你滴哦我嘅要求，好好咁同俊軒喺埋一齊，作為好好報答你對我嘅愛，好多謝你對我嘅愛先！」韻喬之後就去抱咗禮謙一下「但係禮謙啊，我知道你愛我，但最後冇揀到你，真係唔好意思呢！」





「冇事啦，而且你放心啦小喬，我知道俊軒追你追得咁辛苦，都一定會好好咁愛你嘅。不過小喬呀，如果俊軒之後夠膽蝦你嘅話，你一定要記得同我地講，等我地幫你教訓佢！」禮謙講嘅時候，韻喬又用好犀利嘅眼神望住俊軒，嚇到俊軒都即刻唔敢亂嚟。

不過，就喺呢個時候，俊軒嘅電話鈴聲突然響起，大家嘅注意力自然就集中落去俊軒身上。

俊軒本來唔想聽電話，但喺俊軒拎起電話嘅時候，就見到來電顯示為“屋企”，於是就十五十六咁，考慮緊聽唔聽電話好。

（待續 ~）

IG link https://instagram.com/bear_big_big_writer