《愛在。貴族學園》: Ch 32 ~ 陸運會之一 Part 1

Ch 32 ~ 陸運會之一  Part 1 （連載日期：2025/08/22）

俊軒一行人喺練習咗成個半鐘之後，個天就已經黑哂，於是林家、李家同程家嘅座駕，都相繼去到黃竹坑運動場，準備接佢地幾個返屋企...

「小喬呀，不如我叫司機車埋你返去啦，好嗎？我怕你呢個鐘數好難坐車，要你喺條街度等咁耐就唔好啦！」俊軒同換返校裙嘅韻喬講。
 
當然，俊軒嘅呢一句說話，都畀天殷聽到，於是就喺度發出嗚嗚聲「軒仔，你睇下你呀，依家成個愛妻號咁，好似成個世界都只係得喬喬咁！張韻喬你就執到啦！一個男仔為咗你，可以顛覆一直嘅性格喎！」

韻喬聽到天殷咁樣講，自然就好怕醜同唔好意思啦，所以韻喬就婉拒俊軒嘅好意啦「下，會唔會唔方便啊小軒？我怕你搞到好夜就真而且，而且你屋企嘅司機，唔使去你地屋企公司，車uncle翻屋企咩？我怕你車我去北角嘅話，會阻住你地屋企食飯啊，所以…我都係自己出去坐巴士返去就得啦！」
 




「聽日見啦，小軒，愛你！」之後韻喬就孭起自己嘅書包同裝住運動服嘅袋，準備行去巴士站。

但係突然之間，俊軒就捉住韻喬嘅手臂，然後好溫柔咁話...

「當然唔可以啦！小喬你，依家多咗一層身份，就係林家二公子嘅未婚妻，以後你嘅事就係我嘅事，所以……為咗你嘅安全，我一定要叫司機車你放學翻屋企！」
 
韻喬聽到之後甜甜一笑，但又用一個非常嫌棄嘅語氣回答俊軒「我真係冇你咁好氣呀林俊軒！得啦得啦，今次就畀你送啦，不過你要唔要問下你司機，啲時間得唔得喎？因為北角呢個時間，都可以好塞車咖喎！」

於是俊軒就將原先捉住韻喬嘅手，改為拖住對方，然後一齊行去林家嘅座駕度。
 




「二少爺你好！」林家嘅司機喺離遠見到俊軒同韻喬過緊嚟嘅時候，就已經打開定後座嘅車門，等佢地上車...

「司機，我想問我地有冇時間去一趟北角先？我想送張小姐返屋企先，然後先再返屋企食飯，唔知時間上得唔得呢？」俊軒非常有禮貌咁問司機。
 
司機對一下自己隻表，然之後就話「可以嘅，二少爺，因為老爺話今晚話要喺公司開會，吩咐我夜少少先去公司接佢，所以要送完張小姐返屋企，再返大宅嘅嘅話，應該問題唔大。」
 
俊軒聽到之後就好開心咁同韻喬講話「Very good，小喬咁你上車先啦！Please,  my lady！」

韻喬見到俊軒咁嘅樣之後就撲哧一笑，再用一貫嘅禮貌同林家嘅司機道謝，然後再同俊軒安坐林家座駕裏面。
 




當司機閂好門之後，座駕就離開黃竹坑，直奔北角嘅福生大廈。

喺一路沿途上，韻喬都同俊軒手拖住手，互相咁望住對方微笑。兩人雖然冇講啲咩，但都洋溢住一股幸福嘅氣氛。
 
不過，可能因為之前一晚訓得唔係太夠嘅關係，韻喬好快就挨咗落俊軒嘅膊頭度，而且好快就訓着咗。

眼見面前可愛嘅美人兒，俊軒都即刻忍唔住，輕輕一吻韻喬嘅額頭，而韻喬嘅嘴角喺感覺俊軒一吻之後，就即刻向上翹。
 
雖然路上都有少少塞車，但係好快林家嘅座駕就去到韻喬屋企留下「小喬，要起身啦，到啦！」俊軒好細聲咁叫韻喬起身。

於是韻喬就伸一伸懶腰，然後就孭番起自己個書包道「嗯！咁我地聽日翻學校見啦小軒！記得你今晚唔好太夜啦！」之後韻喬就主動錫咗俊軒個嘴一啖，然後就離開座駕。
 
「咩唔好太夜呀，喬喬？」俊軒今次喺度明知故問，搞到韻喬都即刻鼓起自己泡鰓表達不滿「蠢人！你今晚唔想同我講一陣電話咩？！」

俊軒於是就輕輕一笑「哈哈喬喬，我又點會唔知呢！放心啦，我今晚會早少少打畀你咖！」





「仲有呀，記得收好今日我送畀你嘅禮物呀，知道未呀？」韻喬一記起今日俊軒送畀自己嘅鑽石戒指之後，就即可會心一笑..

「知道啦！好啦，我返上去啦！今晚見啦小軒！Love you！」「Love you too ！」

「唔該司機，再見！」

「張小姐唔使客氣！慢行，再見！」韻喬向林家司機道謝之後，就向車上面嘅俊軒揮揮手，然後自己行入大廈裏面，上樓翻屋企。
 
不過...

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer