《愛在。貴族學園》: Ch 32 ~ 陸運會之一 Part 2

Ch 32 ~ 陸運會之一 Part 2（連載日期：2025/09/23）

不過，原來喺頭先韻喬落車嘅時候，放工返到北角嘅張太，就喺前面街口行緊返福生大廈，目睹韻喬落車嘅一刻。

起初張太都唔能夠相信自己嘅眼睛，但好快就痛自己講“奇怪啦，阿女做咩會由一部好似好豪華私家車都落車嘅？而且，我之前都好似見過呢部車？”

於是張太就刻意放慢步伐，等林家嘅座駕開走咗之後，自己先至再返上去屋企...

“唔通……呀女真係畀我講中咗，依家佢有拍緊拖？不過，尋晚韻喬先否認過一次嚟，如果今晚再問佢嘅話，啊女都唔會認咖啦”張太冇再考究呢件事，然後都直接上樓去。
 




「咦媽子，你放工返嚟啦？」啱啱返上屋企幾分鐘嘅韻喬，喺聽到有人開門之後，就擰轉自己個頭，然後對住推開門入屋嘅張太講。

「係呀啊女。咦喂，你做咩仲着住件校服呀？放學返到屋企咁耐都仲唔換衫嘅？作反啊你？！」張太用一個近似咆哮嘅語氣同韻喬講。
 
「唔……唔係啊媽子，我都係啱先入門口幾分鐘咋！所以咪未換衫囉！依家我即刻去換！」

面對張太如斯語氣，作為學校裏面，同埋俊軒心中嘅女强人張韻喬，都要臣服喺張太之下，於是韻喬就匆匆走入睡房換衫。而張太就去厨房，準備今晚嘅晚餐。
 
「呼！媽媽又會突然之間咁惡都有嘅？唔通……媽媽喺公司做嘢唔開心？」韻喬一邊除低校服，一邊同自己講...





「定係媽咪又畀爸爸激親呀？如果係嘅話，我今晚都係醒定少少好啲啦！」

於是喺離開睡房、將校服放入洗衣機之前，韻喬都預先將自己嘅功課，放定喺枱面上。

當然，韻喬都冇忘記俊軒嘅吩咐，將俊軒今日求婚嘅時候，所送畀自己嘅鑽石戒指，收喺書枱其中一個櫃桶嘅深處，免得被家人發現。

而喺收埋之前，韻喬都趁房裏面冇其他人，偷偷地打開盒戒指，然後就記返起今日午飯時間，俊軒喺班房同自己求婚嘅事。

韻喬於是就感到自己塊面好紅，然後都即刻好怕醜咁喺度傻笑，然後仲同自己講話「真係呀，咁快就同我求婚！明明先喺埋一齊第二日……」





但韻喬好快都諗深一層，就知道俊軒咁做嘅原因，就係自己要鬥贏嘉惠，其實都好困難...

「希望，我都真係可以有機會，再戴上呢隻戒指，同我心愛嘅佢，着起禮服同婚紗，步入婚姻嘅殿堂裏面啦！」然後仲差少少就想喊。

不過，既然自己都曾經應承過俊軒，大家都唔可以放負，所以韻喬都好快冇再諗起呢樣嘢，只係好好咁收藏自己隻戒指，然後就行出自己睡房……

「咦媽媽，爸爸做咩仲唔返嘅？佢老細又要佢OT呀？」韻喬喺厨房裏面問張太。

「唔係呀，爸爸就搞埋多少少野就會返。你去沖涼先啦，未食得飯住！」但係喺度準備晚餐嘅張太，居然趁機問韻喬一個問題...

「喂，阿女你仲未答我，做咩咁夜先返屋企呀？你俾人罰留堂定係同咗男仔去拍拖呀？」
 
「哦，咁我去沖涼先啦！咪住先！媽子，我……我咪同你話過，過多兩日就係陸運會，我地要去練習咖嘛！邊……邊度有去拍拖啊！你……諗多咗啦！」

韻喬吞吞吐吐回應嘅同時，神色都顯得有少少慌張，自然都引起張太心中嘅懷疑。





而喺入到洗手間嘅韻喬，喺聽到媽媽再一次查問自己係咪拍拖之後，就好似上次一樣咁緊張起嚟，於是就好細聲咁，對住鏡裏面嘅自己講...

「唉呀！點解媽媽又會咁問我咖？唔通……我嘅戲真係咁渣？」

「但冇可能咖喎！我自己喺學校上Ms Chan堂，戲劇嘅分數都唔低咖喎！定其實…媽媽已經發現到我有啲咩蛛絲馬跡？」韻喬於是就喺度諗，自己有咩機會畀媽媽發現自己嘅行蹤...

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer