《愛在。貴族學園》: 特別篇 5 ~ 萬聖學園祭 Part 1

特別篇 5  ~ 萬聖學園祭 Part 1（連載日期：2025/10/27）

（本篇時間設定為Ch 1前半個月，部分時間會同正章重叠，敬請留意）

就喺9月中某一日，大家準備落去早會之前，5A嘅班主任Ms張喺點名之後，就叫班會主席趙建龍出去…

「班會主席啊趙建龍同學，我呢度有一張SA畀你嘅通告，你一陣有時間同班會傾下，睇下可以點樣搞啦！」建龍聽到Ms張嘅說話之後，就離開自己位行去Ms張度，然後接過學生會出嘅通告。

建龍一邊行返埋位嘅時候，大家都一直望住佢，因為都好想知道，到底學校畀咩通告佢。





至於建龍行返埋位嘅時候，塊面嘅表情都顯得奇怪，結果就令更多同學注意到，包括部分要做領袖生嘅同學。

Ms張喺臨行之前，其實都已經見到大家都非常好奇，所以就話「大家一陣小息先再討論啦！」

大家聽到Ms張嘅說發之後都收起表情，而建龍自己都決定過咗早會之後，都先通知全班同學，然後先再同班會傾要點做。

而身為領袖生嘅韻喬，喺離開班房準備去自己負責嘅班度，帶同學去早會嘅路上，都因為建龍嘅通告而不停想象...

“到底我地學校就會又發生咩事呢？不過，Ms張嘅通告係畀建龍，而建龍係我地今年班會主席，唔通…我地有大型活動要搞”





不過韻喬都冇再去諗太多，因為好快自己帶嘅呢班低年級同學，已經準備好去禮堂上早會。

然而，對於班裏面嘅男同學嚟講，每次準備上早會嘅時候都特別精神，因為都代表可以近距離接近身為校花嘅韻喬。

但係女神又邊咁容易可以融化，皆因韻喬基本上都唔會同呢班師弟妹有太多交流，原因都係要保持住自己身為領袖生兼模範生嘅威嚴，甚至因為咁而對呢班師弟妹特別嚴格，但正因為咁，班主任都好多謝韻喬將自己班嘅秩序搞得好。

無聊嘅早會好快就結束，大家返到班房之後，因為要上選修科嘅關係，所以全班都冇齊人。

唯一大家可以溝通嘅就只可以用班group。好快建龍就喺班group上面同大家交代通告嘅内容…





「5A趙建龍：大家唔使心思思啦！SA張通告係關於學校準備搞一年一度嘅學園祭！       08:43」
「5A趙建龍：搞嘅時間都係大約10月底，都係喺Open Day嗰日舉行    08:43」

見到學園祭呢三個字，大家對眼都即刻閃閃發光，皆因呢個活動係學校年度盛事，各班同學同各個學會為咗爭奪大獎，都會施展渾身解數，去整出一個具有創意嘅活動吸引一衆評審同埋師生，當然仲有到時候會到學校參觀嘅家長，以及其他賓客。

結果到小息嘅時候，除咗要去當值嘅同學之外，其他5A嘅同學都齊集班房，討論一下學園祭嘅事…

「5A！大家有冇咩想喺學園祭度做啊？因為出年我地就DSE，未必再有時間搞大製作啦！」講上面呢句說話嘅，當然就係建龍。

「所以我覺得如果要大搞嘅話，就趁今年大家仲有時間搞好佢！」身為女班長嘅洪雪盈都附和建龍嘅講法。

而韻喬同天殷兩個，就喺位裏面安靜咁聽住。天殷聽到之後就好興奮咁捉住身邊嘅韻喬講...

「喬喬啊，學校又準備搞學園祭，你覺得我地班應該搞乜好呢？」





「嗯，我都唔知啊，年年學園祭嘅時候，都係大家鬥到你死我活，隨時Secret上面啲花生仲多人留意過學園祭本身。」韻喬一邊咬住塊餅一邊講。

天殷都即刻點頭回應話「你都講得有啲道理嘅！」

韻喬之所以會咁樣講，都係因為好多學生同佢地嘅屋企，往往利用學園祭去展現家族嘅財力，而對項目提供大量嘅資助試圖去爭取勝利，目的都係想喺學校裏面甚至社會上爭取更多利益。

當然，學校都有用手段去阻止學生家長喺背後“發功”而令比賽不公或者商業味道過重嘅行為，包括喺活動裏面禁止展示任何商業標識、品牌、產品宣傳，又或者派發之家公司商戶優惠券等等；同一時間，而喺同學正式可以實行佢地嘅計劃之前，每班同埋學會都要交計劃書，裏面仲要做埋預算、物資來源等。

做完計劃書，參加嘅班同學會都要經過面試評審，兩邊都合格之後，計劃先可以正式落實，所以有好多別有用心嘅班同埋學會，往往都會想突破呢一連串嘅關卡去自肥，以往學校都曾經ban過唔少idea唔錯但違規嘅計劃。

但係好快，俊軒就同禮謙一齊去到韻喬同天殷個位度。韻喬當然仲未習慣俊軒又一次喺自己身邊存在，表情自然都唔係咁自在，所以都同之前一樣，由俊軒同韻喬嘅common friend天殷去開始話題…

「軒仔，你同禮謙過嚟做咩啊？」天殷用一個幾開朗嘅語氣問俊軒，但天殷講嘅時候都有少少面紅。

俊軒好快就答返話「哦，係呀殷殷，因為我地都想同你同小喬傾下學園祭嘅事囉。」





聽到俊軒會想同埋自己商量嘅時候，韻喬都即刻一臉嫌棄，非常冷淡咁話「下林俊軒同學，你同殷殷傾咪得，你同我商量做咩啊？」

天殷由韻喬嘅語氣裏面，都知道唔想俊軒喺度，但自己身份又唔方便，就唯有用一個理由要韻喬去接受…

「喬喬啊，個學園祭喺全班都有份咖，我地都可以試下propose啲方案出嚟，然後我地大家都要一齊做，我諗你都應該好難唔同軒仔相處吧？」

「咁好啦。林俊軒同學，咁你對呢件事有咩高見？」韻喬回答天殷之後，就再免為其難咁問同為學霸嘅俊軒意見。

俊軒諗一諗之後就話「我自己覺得可以玩攤位遊戲？」

「下，個個唔係都搞遊戲就話小型體驗喎，會唔會行咗少少啊？」韻喬好冷淡咁答俊軒，而且同時都表明俊軒嘅諗法麻麻地。

「但係大家應該唔需要去學會度擺攤幫手咩？」禮謙提出自己嘅疑問。





「我都唔知喎禮謙，可能今日放學嘅時候，啲學會Chair都會開會，照道理過多兩日都會知自己要唔要去學會帶班低Form參加學園祭嘅。」天殷回答道，而俊軒都都點頭同意。

韻喬跟住又話「如果講學會要喺操場同低form擺攤位的話，的確會比較難有發揮空間；但如果有自己地方嗰啲，可以玩嘅空間都大嘅。」

「不過幾位啊，聽建龍嘅意思，佢想趁今年大家仲有少少時間玩嘅時間玩大佢，會唔會真係試下搞啲大型同出少少嘅？」天殷嘅見解，自然都引起韻喬佢地幾個嘅注意。

俊軒好快都明白天殷嘅意思，然後就話「早幾年某一次學園祭嘅時候，記得有一班Form 5喺自己班房度，搞咗個小型遊樂場，如果全部都通關嘅話，就好似有小禮物送當獎勵咁…」

「Exactly啊軒仔！我就記得好似係我地Form 2嗰年5D佢地搞咖！」天殷記得之後都表現的好興奮「我仲記得嗰日同喬喬返嚟玩！但好在有喬喬喺度，我先可以通到全部關咋！多謝你啊喬喬！」

被提起往事嘅韻喬，而且仲要喺自己討厭嘅林俊軒面前提起，自然都唔係咁高興，所以韻喬就話「其實佢地啲關卡唔難喎，都唔明咁簡單嘅嘢都要我Carry你，如果你有溫書嘅，就自然會識啦。我反而鐘意佢地啲好有創意嘅設計就真！」

「呃，點解咁都有位畀學霸喬入咖！」天殷即刻將自己挨去韻喬膊頭度，但換來韻喬嘅繼續攻擊「我都係講事實啫，你到依家咪又係成日都要我Carry你！你啊真係用多啲時間溫書啊，得返年半睇你點追！」

「唉呀，唔好再話我啦喬喬！」天殷已經掩住耳仔，唔想再面對韻喬嘅吐槽，但係俊軒就問天殷「殷殷你其實都可以搵我咖，而且有時我地見面嗰陣，你都會問我功課嘅！」不過，韻喬又點會放過一個可以攻擊俊軒嘅機會呢…





「哈！你真係搞笑啦，林俊軒同學！殷殷成日都同我講話你好忙吖，所以先會搵我咋！都唔知你個花心flirt女王放假嗰陣，走咗去邊度溝女啦，所以先會唔得閒理殷殷咋嘛！」

「張韻喬你！」俊軒都已經被韻喬激到要發癲，但好在禮謙都打圓場話「啊韻喬同學、軒仔啊，其實我地可以繼續討論返正題嘅！」

「我自己都覺得搞過關個idea幾好，或者我地有機會再同建龍佢地討論下？」「都好喎！」天殷第一個附和。

「希望我地都會過到個評審啦！喬喬我地去洗手間啦！」天殷之後就拉咗韻喬出去，而佢地四個嘅對話就結束。

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer